05-Sep-2022

ବରଗଡ:-ବରଗଡ଼ ଜିଲ୍ଲା ସରକାରୀ ଉଚ୍ଚ ବିଦ୍ୟାଳୟ, ବିଜେପୁର ଠାରେ ଛାତ୍ରଛାତ୍ରୀମାନଙ୍କ ଦ୍ଵାରା ମହା ଆଡ଼ମ୍ବରରେ ଗୁରୁ ଦିବସ ପାଳନ କରାଯାଇଛି। ବିଦ୍ୟାଳୟର  ପ୍ରଧାନ ଶିକ୍ଷକ  ଶ୍ରୀଯୁକ୍ତ  ମନୋଜ ବେହେରା ସର୍ବପଲ୍ଲୀ  ରାଧାକୃଷ୍ଣନଙ୍କ ଫଟୋ ଚିତ୍ରରେ  ପୂଜାର୍ଚ୍ଚନା କରି ମାଲ୍ୟାର୍ପଣ କରିଥିଲେ । ଏହି   ଅବସରରେ ଛାତ୍ରଛାତ୍ରୀମାନେ ଗୁରୁ ଶିଷ୍ୟ ପରମ୍ପରାର ଏକ ଅନନ୍ୟ ଉଦାହରଣ ସୃଷ୍ଟି କରିଛନ୍ତି ।ସମସ୍ତ ଛାତ୍ରଛାତ୍ରୀ ଜଳ ଓ କ୍ଷୀର ଦ୍ଵାରା ଗୁରୁମାନଙ୍କ ପାଦ ଯୁଗଳ ଧୌତ କରି ଚନ୍ଦନ, ସିନ୍ଦୁର, ପୁଷ୍ପ ଦ୍ଵାରା ଗୁରୁଙ୍କ ବନ୍ଦନା କରିଥିଲେ । ଛାତ୍ରଛାତ୍ରୀମାନେ ଗୁରୁମାନଙ୍କୁ ଉତ୍ତରୀୟ ତଥା ବିଭିନ୍ନ ଉପହାର ପ୍ରଦାନ କରିଥିଲେ। ଛାତ୍ରଛାତ୍ରୀମାନଙ୍କ ଦ୍ଵାରା ଗୁରୁଙ୍କ ଉଦ୍ଦେଶ୍ୟରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ

ପରିବେଷଣ  କରାଯାଇଥିଲା । ଛାତ୍ରଛାତ୍ରୀ ତଥା ଶିକ୍ଷକଶିକ୍ଷୟିତ୍ରୀ ମାନେ ଗୁରୁ ଦିବସ ବିଷୟରେ ନିଜର ମତାମତ ରଖିଥିଲେ। ଶିକ୍ଷକ ଶିକ୍ଷୟିତ୍ରୀମାନେ ଛାତ୍ରଛାତ୍ରୀ ମାନଙ୍କର ଉତ୍ତରୋତ୍ତର ଉନ୍ନତି ପାଇଁ ଆଶୀର୍ବାଦ ପ୍ରଦାନ କରିଥିଲେ। ସମାଜରେ ଜଣେ ଜଣେ ଭଲମଣିଷ ହୋଇ  ରାଜ୍ୟ ତଥା ଦେଶର ବିକାଶରେ  ଯୋଗଦାନ କରିବାକୁ ଆହ୍ଵାନ ଦେଇଥିଲେ ।ପିତାମାତା ତଥା ବୟୋଜ୍ୟେଷ୍ଠମାନଙ୍କୁ ସମ୍ମାନ ଦେବା ପାଇଁ ଉପଦେଶ ଦେଇଥିଲେ। ଆୟୋଜିତ ସଭାଟି ଛାତ୍ରଛାତ୍ରୀମାନଙ୍କ ଦ୍ଵାରା ପରିଚାଳିତ ହୋଇଥିଲା। କାର୍ଯ୍ୟକ୍ରମ ଶେଷରେ ସମସ୍ତେ ମିଷ୍ଟାନ୍ନ ଗ୍ରହଣ କରିଥିଲେ।