19-Aug-2022

ବଲାଙ୍ଗିର(ପ୍ରେରଣା ଖବର)-ସ୍ଥାନୀୟ ଗାନ୍ଧୀ ନଗର ଜୁହ୍ନାଡିହି, ବଲାଙ୍ଗିର ଠାରେ ସଂସ୍କାର  ଭାରତୀ ବଲାଙ୍ଗିର ଆନୁକୁଲ୍ୟରେ ଶ୍ରୀକୃଷ୍ଣ ଜନ୍ମାଷ୍ଟମୀ ଉତ୍ସାହର ସହ ପାଳିତ ହୋଇଯାଇଛି । ଏ ଅବସରରେ ଏକ କୃଷ୍ଣଲିଳା ବେଷ ପ୍ରଦର୍ଶନ କାର୍ଯ୍ୟକ୍ରମରେ ବଲାଙ୍ଗିର ର ବିଭିନ୍ନ ଅଂଚଳର ଅନେକ ଛୋଟ ଛୋଟ ପୁଅ - ଝିଅମାନେ ଭାଗ ନେଇ ନିଜକୁ ରାଧା, କୃଷ୍ଣ, ସୁଦାମା, ବଳରାମ, ଯଶୋଦା ତଥା ନନ୍ଦରାଜା ଭାବରେ ବିଭିନ୍ନ ରଙ୍ଗ ବେରଙ୍ଗ ବେଶ ପୋଷାକରେ ସଜେଇ ହୋଇ ଏକ ରଙ୍ଗମୟ ପରିବେଶ ସୃଷ୍ଟି କରିଥିଲେ । ସ୍ଥାନୀୟ ରାଧାକୃଷ୍ଣ ମନ୍ଦିରରେ ପୂଜାର୍ଚ୍ଚନା ପରେ ସମସ୍ତ କୃଷ୍ଣଲିଳା ବେଶଧାରୀ ଶିଶୁଗଣଙ୍କୁ କିର୍ତ୍ତନ୍ୟ ଦଳର ଖୋଳ କରତାଳ ଓ ଭଜନ ସହ ନଗର ପରିକ୍ରମା କରିବା ସହ ଶ୍ରଦ୍ଧାଳୁ ନଗରବାସୀ ନିଜ ନିଜ ଦ୍ୱାର ସମ୍ମୁଖରେ ପୂର୍ଣ୍ଣକୁମ୍ଭ ସ୍ଥାପନ ପୂର୍ବକ ଧୂପ, ଦୀପ, ନୈବେଦ୍ୟ ଓ ଫୁଲ ଚନ୍ଦନ ଦେଇ କୃଷ୍ଣଲିଳା ବେଶ ଧାରୀ ବାଳକ - ବାଳିକାମାନଙ୍କୁ ବନ୍ଦାପନା କରିବାର ଏକ ମନୋରମ ଦୃଶ୍ୟ ଆମ ସାଂସ୍କୃତିକ ପରଂପରାକୁ ସ୍ମରଣ କରାଇ ଦେଉଥିଲା । ତାପରେ ସଭା କାର୍ଯ୍ୟରେ ସଂସ୍କାର ଭାରତୀ ବଲାଙ୍ଗିର ର ସାଧାରଣ ସଂପାଦକ ଦିଲ୍ଲୀପ କୁମାର ସିଂହଦେଓ ଆଜିର ଯୁଗରେ ପରମ ଯୋଗୀ ଶ୍ରୀକୃଷ୍ଣଙ୍କ ମହାତାଦର୍ଶର ପ୍ରାସଙ୍ଗିକତା ସମ୍ବନ୍ଧରେ ପ୍ରତିଭାଗି ତଥା ଅଭିଭାବକ ଓ ଅଭିଭାବକମାନଙ୍କୁ ଆଲୋକପାତ କରିଥିଲେ । ସଭାପତି ବାସୁଦେବ ମେହେର ସଭାକାର୍ଯ୍ୟ ପରିଚାଳନା କରିଥିଲେ । ଜିଲ୍ଲା ସଂଯୋଜକ ପ୍ରଭାକର ମିଶ୍ର, କାର୍ଯ୍ୟକାରୀ ସଂପାଦକ ମଳୟ ତ୍ରିପାଠୀ, ଉପସଭାପତି ମୁରଲିଧାରୀ ପତି, କୋଷାଧ୍ୟକ୍ଷ ମାନସ ରଂଜନ ସାହୁ, ସଭ୍ୟ ନିରଂଜନ ରଥ, ବୁଦ୍ଧିସାଗର ଯୋଷୀ, ରାହାସ ବିହାରୀ ଭୋଇ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମକୁ ପରିଚାଳନା କରିଥିଲେ । ଡ. ବ୍ରଜ କିଶୋର ପଣ୍ଡା ମଂଚ ପ୍ରଦାନରେ ସହଯୋଗ କରିଥିଲେ ଓ ଆର୍ତ୍ତତ୍ରାଣ ବାଗ ଓ ସାଥି କିର୍ତ୍ତନ ରେ ସହଯୋଗ କରିଥିଲେ । ବିଭିନ୍ନ ବେଶ ପୋଷାକରେ ସୁସଜ୍ଜିତ ଶିଶୁମାନେ ମଂଚରେ ନିଜ ନିଜ ଚରିତ୍ରାଭିନୟ ପ୍ରଦର୍ଶନ କରିଥିଲେ ଓ ପରେ ପରେ ସେମାନଙ୍କୁ ବିଶିଷ୍ଟ ବ୍ୟକ୍ତି ବିଶେଷଙ୍କ ଦ୍ୱାରା ପ୍ରଶସ୍ତି ପତ୍ର ପ୍ରଦାନ କରାଯାଇଥିଲା । ପରିଶେଷରେ ପ୍ରସାଦ ସେବନ ପୂର୍ବକ ଏହି ମନୋରମ କାର୍ଯ୍ୟକ୍ରମଟି ମହାନନ୍ଦରେ ପରିସମାପ୍ତ ହୋଇଥିଲା ।