02-Aug-2022

ବଲାଙ୍ଗୀର(ପ୍ରେରଣା ଖବର) -  ହାଟପଦା ପଡ଼ା ମୁଖ୍ୟ ଶ୍ମସାନରେ ବିଶୁଦ୍ଧ ଥଣ୍ଡା ପାନୀୟ ଜଳ ଉପଲବ୍ଧ କରିବା ପାଇଁ ଆବଶ୍ୟକୀୟ ଯନ୍ତ୍ରାଂଶ ସାରଞ୍ଜାମ ରାଜ୍ୟ ପର୍ଯ୍ୟଟନ ନିଗମର ଉଦ୍ୟମ କ୍ରମେ ଋଚି କମ୍ପାନୀ ପ୍ରଦାନ କରିଥିବା ଜଣାଯାଇଛି । ଗତ ମଇ ୯ ରେ ବଲାଙ୍ଗୀର ଯାଦବ ସମାଜ ପକ୍ଷରୁ ପ୍ରଶାନ୍ତ ମହାକୁର ଓ ବଲାଙ୍ଗୀର ବାସୀଙ୍କ ପକ୍ଷରୁ ସାମ୍ବାଦିକ ବିଭୁ କଲ୍ୟାଣ ଗଡତ୍ୟା ରାଜ୍ୟ ପର୍ଯ୍ୟଟନ ନିଗମର ପୂର୍ବ ଅଧ୍ୟକ୍ଷା ଶ୍ରୀମୟୀ ମିଶ୍ରଙ୍କୁ ସାକ୍ଷାତ କରି ବଲାଙ୍ଗୀର ହାଟପଦା ପଡ଼ା ଶ୍ମସାନରେ ଏକ ବିଶୁଦ୍ଧ ଥଣ୍ଡା ପାନୀୟ ଜଳ ପ୍ରକଳ୍ପ ସ୍ଥାପନ କରିବା ପାଇଁ ଅନୁରୋଧ କରିଥିଲେ । ଏହାକୁ ଦୃଷ୍ଟିରେ   ରଖି ଶ୍ରୀମତି ମିଶ୍ରଙ୍କ ଉଦ୍ୟମ କ୍ରମେ ଆବଶ୍ୟକୀୟ ଯନ୍ତ୍ର ଯୋଗାଇ ଦିଆଯାଇଥିବା କଥା ପର୍ଯ୍ୟଟନ ନିଗମ ପକ୍ଷରୁ ପ୍ରଶାନ୍ତ ମହାକୁରଙ୍କୁ ସୂଚନା ପ୍ରଦାନ କରାଯାଇଛି । ବଲାଙ୍ଗୀର ଜନତାଙ୍କ ବୃହତ୍ତର ସ୍ଵାର୍ଥ୍ୟ ଦୃଷ୍ଟିରୁ ଏହାକୁ ଅତିଶୀଘ୍ର ସ୍ଥାପନ କରିବା ପାଇଁ ପୌର ପରିଷଦ ଅଧ୍ୟକ୍ଷା ଶ୍ରୀମତୀ ଲିକା ସାହୁଙ୍କୁ ନିବେଦନ କରାଯାଇଥିବା ମହାକୁର ସୂଚନା ଦେଇଛନ୍ତି । ଏଠାରେ ଉଲ୍ଲେଖଯୋଗ୍ୟ ଯେ, ବଲାଙ୍ଗୀର ଶ୍ମସାନ ମାନଙ୍କରେ ବିଶୁଦ୍ଧ ପାନୀୟ ଜଳର ବ୍ୟବସ୍ଥା ନାହିଁ । ଶବଦାହ ପାଇଁ ଶ୍ମସାନକୁ  ଯାଉଥିବା ଲୋକେ ପିଇବା ପାଣିର ଘୋର ଅଭାବ ଯୋଗୁଁ  ଅସୁବିଧାର ସମ୍ମୁଖୀନ ହୋଇଥାନ୍ତି । ଶ୍ମସାନରେ  ପିଇବା ପାଣିର ବ୍ୟବସ୍ଥା ପାଇଁ  ଦୀର୍ଘ ଦିନରୁ ଅନେକ ଅନୁଷ୍ଠାନ ଦାବୀ କରୁଥିଲେ ମଧ୍ୟ ବର୍ତ୍ତମାନ ପର୍ଯନ୍ତ ଫଳପ୍ରସୁ ହୋଇ ନଥିଲା । ଅତିଶୀଘ୍ର ଏହାକୁ କାର୍ଯ୍ୟକ୍ଷମ କରାଗଲେ ଜନତା ଉପକୃତ ହେବେ ବୋଲି ଯାଦବ ନେତା ମହାକୁର ଜଣାଇଛନ୍ତି ।