18-Jul-2022

ବଲାଙ୍ଗୀର,(ପ୍ରେରଣା ଖବର)ବଲାଙ୍ଗୀର ଜିଲ୍ଲାର ମରୁଡିପ୍ରପିଡିତ ଦେଓଗାଁ ବ୍ଲକ ଓ ସଦରବ୍ଲକର ୪୦୦୦ହେକ୍ଟର  ଜମିକୁ ଜଳସେଚିତ କରିବାକୁ ଥିବା ପ୍ରସ୍ତାବିତ ସୋନଗଡ ବ୍ୟାରେଜ କରାଇବାକୁ ଦାବି ହେଉଛି । ଦେଓଗାଁ ବ୍ଲକବାସୀ ମୁଖ୍ୟମନ୍ତ୍ରୀଙ୍କ ପରାମର୍ଶଦାତା ତଥା ପଶ୍ଚିମଓଡିଶା ବିକାଶ ପରିଷଦର ଅଧ୍ୟକ୍ଷ ଅସିତ ତ୍ରୀପାଠୀଙ୍କ ଜରିଆରେ ଏହି ପ୍ରକଲ୍ପ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପତ୍ରଲେଖି ଏହି ଦାବି କରିଛନ୍ତି । ଏହା ସହିତ ଦେଓଗାଁର ପୂର୍ବତନ ବ୍ଲକଅଧ୍ୟକ୍ଷ ଲକ୍ଷ୍ମଣକୁମାର ମେହେରଙ୍କ ନେତୃତ୍ୱରେ ଏକ ପ୍ରତିନିଧିଦଳ ଜଳସମ୍ପଦ ବିଭାଗର ମନ୍ତ୍ରୀ ଟୁକୁନୀ ସାହୁ ଓ ବିଭାଗୀୟ ସଚିବଙ୍କୁ ଭେଟି ଦାବିପତ୍ର ଦେବା ସହିତ ଆଲୋଚନା କରିସାରିଛନ୍ତିି । ଆସନ୍ତା ଜୁଲାଇ ୨୦ ତାରିଖରେ ବିଧାନସଭାରେ ଜଳସେଚନ ବିଭାଗର ବଜେଟ ଉପସ୍ଥାପନ ହେବ ଓ ସେଥିରେ ସୋନଗଡ ବ୍ୟାରେଜ ପ୍ରସ୍ତାବ ପାଇଁ ଅର୍ଥ ମଞ୍ଜୁର ହେବ ବୋଲି ଚାଷି ଆଶା ରଖିଛନ୍ତି । ସୋନଗଡରେ ବ୍ୟାରେଜ ପ୍ରସ୍ତାବ ବହୁବର୍ଷ ହେଲା ପଡିରହିଛି । ଏଥିପାଇଁ ଆବଶ୍ୟକ ସର୍ଭେରିପୋର୍ଟ ସହିତ ଡିପିଆର ପ୍ରସ୍ତୁତ ହୋଇ ଉଚ୍ଚପରାମର୍ଶଦାତା କମିଟିରେ ଅନୁମୋଦିତ ହୋଇଛି । କିନ୍ତୁ ଅର୍ଥ ମଞ୍ଜୁର ହୋଇପାରୁନାହିଁ । ବର୍ତ୍ତମାନ ବଲାଙ୍ଗୀର ଜିଲ୍ଲାର ଟିଟିଲାଗଡ ବିଧାୟୀକା ଟୁକୁନୀ ସାହୁ ଜଳସଂପଦ ବିଭାଗର ମନ୍ତ୍ରୀ ଥିବା ବେଳେ ଅସିତ ତ୍ରୀପାଠୀ ମୁଖ୍ୟମନ୍ତ୍ରୀଙ୍କ ପରାମର୍ଶଦାତା ରହିଛନ୍ତି । ସେହି ଦୃଷ୍ଟିରୁ ଉଭୟଙ୍କ ଉଦ୍ୟମରେ ପ୍ରକଲ୍ପଟିର ଅର୍ଥ ମଞ୍ଜୁର ହେବ ବୋଲି ଚାଷି ଆଶା ବାନ୍ଧି ବସିଛନ୍ତି । 
            

  ଚାଷିମାନେ ଜଣାଇଛନ୍ତି ଯେ,ଦେଓଗାଁ ବ୍ଲକ ଓ ସଦର ବ୍ଲକ ଦେଇ ସୋନଗଡ ନଦୀ ବହିଯାଇଛି କିନ୍ତୁ ଏହାର ଜଳକୁ ସଠିକ ଉପଯୋଗ କରାଯାଇ ପାରୁନାହିଁଁ । ଜିଲ୍ଲାର ନଦୀଗୁଡିକରେ ବର୍ଷାଦିନେ ପାଣିବହିଯାଉଛି ତାହାର ଉପ ଯୋଗ ହୋଇପାରୁନାହିଁ । ନଦୀରେ ଜଳସ୍ରୋତ ମଧ୍ୟ କମିଯାଉଛି । ତେଣୁ ଭୂତଳ ଜଳ କମୁଥିବା ଯୋଗୁଁ ଗଭୀର ନଳକୂପ ଯୋଜନା,ଉଠା ଜଳସେଚନ ଯୋଜନା ମଧ୍ୟ ଫେଲ ମାରୁଛି । ଏଏପଟେ ଏହି ସବୁ ଅଞ୍ଚଳରେ ପ୍ରାୟ ମରୁଡି ହୋଇ ଚାଷିଙ୍କ ଅର୍ôଥକସ୍ଥିତି ଖରାପ ହେଉଛି । ଗାଁମାନଙ୍କରେ ପାନୀୟଜଳ ସମସ୍ୟା ମଧ୍ୟ ଦେଖାଦେଉଛି । ତେଣୁ ସୋନଗଡ ନଦୀରେ ଅନ୍ତର୍ଲା ଓ ଭୁତିଆରବାହାଲ ମଝିରେ ଏକ ବ୍ୟାରେଜ ନିର୍ମାଣ କରି ଚାଷିଙ୍କ ଜମିକୁ ଜଳସେଚିତ କରିବାକୁ ସର୍ଭେ ହୋଇସାରିଛି । କ୍ଷୁଦ୍ରଜଳସେଚନ ବିଭାଗ ଏହାର ଏକ ଡିଟେଲ୍ଡ ପ୍ରୋଜେକ୍ଟ ରିପୋର୍ଟ ମଧ୍ୟ ପ୍ରସ୍ତୁତ କରି ସରକାରଙ୍କୁ ଦେଇସାରିଛନ୍ତି । ବୈଷୟିକ କମିଟି କ୍ଷେତ୍ର ପରିଦର୍ଶନ କରି ଗତ ୨୭.୮.୨୦୧୯ରେ ଅନୁଷ୍ଠିତ ୯୯ତମ ବୈଷୟିକ ପରାମର୍ଶଦାତା କମିଟି ବୈଠକ(ଟିଏସିି)ରେ ଅନୁମୋଦନ କରିଛି । ବଲାଙ୍ଗୀର କ୍ଷୁଦ୍ରଜଳସେଚନ ଡିଭିଜନ ପକ୍ଷରୁ ତାଙ୍କ ପତ୍ରସଂଖ୍ୟା-୭୩୫ ତା.୨୮.୨.୨୦୨୦ରେ କେବିକେ ସର୍କଲ ଭବାନୀପାଟଣାର ଅଧିକ୍ଷଣ ଯନ୍ତ୍ରୀ ଙ୍କୁ ଡିପିଆର ପ୍ରଦାନ କରାଯାଇଛି । ସେହିପରି ଅଧିକ୍ଷଣ ଯନ୍ତ୍ରୀ ତାଙ୍କ ପତ୍ରସଂଖ୍ୟା ୪୩୫ତା.୪.୩.୨୦୨୦ରେ କ୍ଷୁଦ୍ରଜଳସେଚନ ବିଭାଗର ମୁଖ୍ୟଯନ୍ତ୍ରୀଙ୍କୁ ପଠାଇଛନ୍ତି । ସେଠାରୁ ମଧ୍ୟ ଇନଜିନିୟରିଂ ଇନଚିଫଙ୍କ ପାଖକୁ ଯାଇଥିବା ଏକ ବିଶେଷ ସୂତ୍ରରୁ ଜଣାପଡିଛି । ଏହି ପ୍ରସ୍ତାବରେ ଉଲ୍ଲେଖ ରହିଛି ଯେ,ସୋନଗଡର ଏହି ପ୍ରକଲ୍ପ ହେଲେ ସଦର ବ୍ଲକର ଭୁତିଆରବାହାଲ,ନାରାୟଣପୁର,ନୁନିଆଁଢିପା,କଠୁୁର୍ଲା ଓ ଦେଓଗାଁ ବ୍ଲକର ଅପାମରା,ସାରସମାଲ,ସିଲେଟକାନୀ,ବଡବନ୍ଧ,ସିକୁଆଁ,କୁତୁର୍ଲା,ପିପିଲପଦର,ଚୋରମରା,କନକପୁର, ଅର୍ଡା,ଗାଇବାହାଲ,ଜୁର୍ଲାକାନୀ,କଛାରପାଲି,ଦେଓଗାଁ,ହାତିସରା ଇତ୍ୟାଦି ଗ୍ରାମର ଚାଷଜମିକୁ ସିଧାସଳଖ ଜଳସେଚନ କରାଯାଇ ପାରିବ । ଏହା ସହିତ ପ୍ରକଲ୍ପର ଉପରମୁଣ୍ଡର ଅନ୍ତର୍ଲା,ଛତାପିପଲ,ସନ୍ଧିଜୋର,ଡଙ୍ଗରପଡା,ବନ୍ଧପଡା,ଟେପରେନ ଇତ୍ୟାଦି ଗ୍ରାମର ଚାଷିମାନେ ଉଠାଜଳସେଚନ ପଏଣ୍ଟ ମାଧ୍ୟମରେ ତାଙ୍କର ଜମିକୁ ମଧ୍ୟ ଜଳସେଚିତ କରିପାରିବେ । ଗତ ୨୧.୧୦.୨୦୨୦ରେ ଏନେଇ ଦେଓଗାଁ ସମିତି ବୈଠକରେ ସର୍ବସମ୍ମତିରେ ଏହି ପ୍ରକଲ୍ପ ପାଇଁ ପ୍ରସ୍ତାବ ମଧ୍ୟ ପାରିତ ହୋଇଛି । ତେଣୁ ମୋଟରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ଏହି ଅଞ୍ଚଳର ପ୍ରାୟ ୪୦୦୦ ହେକ୍ଟର ଜମିକୁ ଜଳସେଚିତ କରିବାକୁ ଥିବା ପ୍ରକଲ୍ପକୁ ପ୍ରଧାନ୍ୟତା ଦେଇ ସୋନଗଡ ନଦୀରେ ବ୍ୟାରେଜ ନିର୍ମାଣ କରାଇବାକୁ ଦାବି ହେଉଛି ।