03-Jul-2022

ମୌସୁମୀ ଅଧିବେଶନ ଆରମ୍ଭରେ ଷ୍ଟାର ପ୍ରଶ୍ନ ଭାବରେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଳୁଜା ଏଥର ବଲାଙ୍ଗୀର ଜିଲ୍ଲାର ସର୍ବ ପୁରାତନ ଐତିହ୍ଯ ସମ୍ପନ୍ନ ରାଣୀପୁର ଝରିଆଲ ଯୋଗିନୀ ପୀଠ କୁ ନେଇ ପ୍ରଶ୍ନ କରିବାସହ ପୀଠର ବିକାଶ ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏଥିପାଇଁ ରାଣୀପୁର ଝରିଆଲ ଯୋଗିନୀ ପ୍ରେମୀଙ୍କ ମନରେ ପୁଣୀ ଥରେ ପିଠର ଉନ୍ନତୀ କୁ ନେଇ ଆଶା ସଞ୍ଚାର ହୋଇଛି । ବଲାଙ୍ଗୀର ଜିଲ୍ଲା ଟିଟିଲାଗଡ ଉପଖଣ୍ଡ ଅନ୍ତର୍ଗତ ବଙ୍ଗୋମୁଣ୍ଡା ବ୍ଲକ ରେ ରହିଛି ଷଷ୍ଠ ରୁ ନବମ ଶତାବ୍ଦୀ ମଧ୍ୟରେ ନିର୍ମିତ ହୋଇଥିବା ଐତିହ୍ଯ ସମ୍ପନ୍ନ ରାଣୀପୁର ଝରିଆଲ ଯୋଗିନୀପିଠ। ଏକ ବିସ୍ତିର୍ଣ୍ଣ ପାହାଡ ଉପରେ ଦଣ୍ଡାୟମାନ ଏହି ଐତିହାସିକ ପିଠ ରେ ରହିଛି ଶିବ,ଶାକ୍ତ, ବୈଷ୍ଣବ, ଗାଣପତ୍ୟ, ତନ୍ତ୍ର, ମନ୍ତ୍ର, ବୌଦ୍ଧ, ଜୈନ ଧର୍ମର ଅପୁର୍ବ ସମନ୍ବୟ ଦେଖିବାକୁ ମିଳିଥାଏ। ତେବେ ଶହଶହ ବର୍ଷ ଧରି ବିସ୍ତିର୍ଣ୍ଣ ପାହାଡ ଉପରେ ଦଣ୍ଡାୟମାନ ବିଭିନ୍ନ ଦିଗକୁ ମୁହଁ କରି ଛିଡା ହୋଇଥିବା ୧୦୮ ମନ୍ଦିର ମଧ୍ଯରୁ ୫୮ ଟି ଛୋଟ ବଡ ମନ୍ଦିର ବ୍ୟତିତ, ଲାଲ ପୋଡା ଇଟାରେ ତିଆରି ଇନ୍ଦ୍ରଲାଟ ମନ୍ଦିର, ରାଣୀ ମହଳ, ସୋମେଶ୍ବର ମହାଦେବ ମନ୍ଦିର, ଭାଗ୍ୟପଥର, କାଳି, ଲକ୍ଷ୍ମୀପାଦ, ନବଗ୍ରହ, ଚାମୁଣ୍ଡା, ପିଳପରୁଆ ମାଗୁରମାଛ ସହ ସମଗ୍ର ପୃଥିବୀରେ ଥିବା ଚାରୋଟି ଯୋଗିନୀପିଠ ମଧ୍ଯରୁ ରାଣୀପୁର ଝରିଆଲ ଯୋଗିନୀପିଠ ଅନ୍ୟତମ। ହେଲେ ଏତେବଡ ବଲାଙ୍ଗୀର ଜିଲ୍ଲାର ଐତିହ୍ଯ ସହ ରାଜନୈତିକ ଓ ପ୍ରଶାସନିକ କଳର କେବଳ ଆଶ୍ବାସନା ଛଡା କିଛି ଦେଖିବାକୁ ମିଳୁ ନ ଥିବାରୁ ବଲାଙ୍ଗୀର ଜିଲ୍ଲାର ବିଭିନ୍ନ ସଂଗଠନ ଆନ୍ଦୋଳନ ପାଇଁ ରାଣୀପୁର ଝରିଆଲ ମନ୍ଦିର କମିଟିର ଆବାହକ ଅନିଲ କୁମାର ତ୍ରିପାଠୀଙ୍କ ସହ ଯୋଗାଯୋଗ ରେ ଥାଇ ଆଗାମୀ ଦିନରେ ରାଜ ରାସ୍ତାକୁ ଓହ୍ଲାଇବାକୁ ନିର୍ଭର ପ୍ରତିଶୃତି ଦେଇଛନ୍ତି ।   ବେଳେ କମିଟି ନିଜ ତରଫରୁ ବିଭିନ୍ନ ସ୍ତରରେ ଥିବା ପ୍ରଶାସନିକ ଅଧିକାରୀ , ରାଜ୍ଯ ତଥା କେନ୍ଦ୍ରର ପାବାର କରିଡର ରେ ଥିବା ରାଜନୈତିକ ବ୍ୟକ୍ତିବିଶେଷ ଙ୍କୁ ଭେଟି ଏହି ପିଠର ବିକାଶ ପାଇଁ ବହୁ କାକୁତି ମିନତି କରି ଆସିଛନ୍ତି। ଏଥିରେ ବିଶେଷ କରି ବିଭିନ୍ନ ଗଣମାଧ୍ୟମ ବି ସବୁବେଳେ ଚେଷ୍ଟା ଜାରି ରଖିଛନ୍ତି। ତଥାପି ୨୦୧୯ ଜାନୁଆରୀ ୧୫ ତାରିଖ ଭାରତର ପ୍ରଧାନମନ୍ତ୍ରୀ ନିଜେ ନିଜର ବଲାଙ୍ଗୀର ଗସ୍ତ ସମୟରେ ରାଣୀପୁର ଝରିଆଲ ଯୋଗିନୀ ପିଠର ବିକାଶ ପାଇଁ ଅନୁଦାନ ଘୋଷଣା କରିଥିଲେ ହେଲେ ଆଜି ପର୍ଯ୍ୟନ୍ତ ଚାରୋଟି ପଥର ନିର୍ମିତ ଚେୟାର ଓ ଗୋଟିଏ କିଛି ଲେଖା ହୋଇନଥିବା ଏକ ନାମ ଫଳକ ଛଡା ବିକାଶ ପହଞ୍ଚି ପାରିନାହିଁ। ତେଣୁ ଏ ଟଙ୍କା ଆସିଛି ନା ନାହିଁ ତାହା କାହିଁକି ଷ୍ଟାର ପ୍ରଶ୍ନ ର ଉତ୍ତର ରେ ଲେଖା ଯାଇନାହିଁ  ବୋଳି ବାଚସ୍ପତିଙ୍କ ତରଫରୁ ବିଭାଗୀୟ ମନ୍ତ୍ରୀଙ୍କୁ ପଚାରିଥିଲେ ତଥା ୨୨ ସେପ୍ଟେମ୍ବର ୨୦୨୧ ରେ ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲାଙ୍ଗୀର ଗସ୍ତ ସମୟରେ ରାଣୀପୁର ଝରିଆଲ ପୀଠର ଉନ୍ନତିକରଣ ପାଇଁ ଶ୍ରୀ ସାଳୁଜା ନିଜ ଅଭିଭାଷଣ ରେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଥିଲେ। ତେବେ ପରେ ୨୦୨୦/୨୧ ରେ ମାତ୍ର ୨୦ ଲକ୍ଷ ଟଙ୍କା ଅନୁଦାନ ରାଣୀପୁର ଝରିଆଲକୁ ଯୋଗାଇ ଦେଇଥିବା ଏବଂ ଓଡିଶାରେ ନବୀନ ସରକାରଙ୍କ ଶାସନ କୁ ୨୨ ବର୍ଷ ପୁରି ସାରିଥିଲେ ହେଁ ଏହି ୨୨ ବର୍ଷରେ ସର୍ବମୋଟ ମାତ୍ର ୫୦ ଲକ୍ଷ ଟଙ୍କାର ଅନୁଦାନ ଯୋଗାଇ ଦିଆ ଯାଇଥିବା ରାଣୀପୁର ଝରିଆଲ ଐତିହ୍ଯ କିର୍ତ୍ତିରାଜିକୁ  ସରକାର କାହିଁକି ଅବହେଲା କରୁଛନ୍ତି ବୋଳି ପଚାରିବା ସହ ଆଗକୁ ବିଭିନ୍ନ ପର୍ଯ୍ୟଟନ ସ୍ଥଳୀ ଭଲି ରାଣୀପୁର ଝରିଆଲକୁ ବି ଅନୁଦାନ ଯୋଗାଇ ଦେବେ କି ବୋଳି ପଚାରିଥିଲେ। ତେବେ ବାଚସ୍ପତିଙ୍କ ଜରିଆରେ ବିଭାଗୀୟ ମନ୍ତ୍ରୀ ସରକାରଙ୍କ ଯୋଗାଇ ଦିଆ ଯାଇଥିବା ଅର୍ଥ ସ୍ବଳ୍ପ ମାତ୍ର ବୋଳି ମାନିଥିଲେ ଏବଂ ସରକାରଙ୍କ ଯାହା ନୀତିନିୟମ ଅଛି ତାହା ଆସନ୍ତା ବଜେଟରେ ଯୋଗାଇ ଦିଆଯିବ ବୋଳି କହିଥିଲେ। ବିଧାନସଭାର ଏହି ଖବର ପ୍ରଚାରିତ ହେବାପରେ ଯୋଗିନୀ ପ୍ରେମୀଙ୍କ ମନରେ ଉତ୍ସାହ ଦେଖାଦେବା ସହ ସୋସିଆଲ ମିଡିଆ ରେ ତର୍କ ବିତର୍କର ଝଡ ସୃଷ୍ଟି କରିଛି । ତେବେ ଦେଖିବାକୁ ବାକି ରହିଲା ଆଗକୁ ଶହଶହ ବର୍ଷ ଧରି ଏ ମାଟିର ଗର୍ବ ଗୌରବର ଇତିହାସକୁ ବଞ୍ଚାଇ ରଖି ଖରା ,ବର୍ଷା ,ଶୀତରେ ନିଜର ମୁର୍ତ୍ତିବନ୍ତ ରୁପକୁ ଚାରି ବେଢା ମଧ୍ଯରେ ଆବଦ୍ଧ କରି ଆଜିର ପିଢି ପର୍ଯ୍ୟନ୍ତ ପହଞ୍ଚାଇ ପୀଠକୁ ଦେଖି ଯାଉଥିବା ଦେଖଣାହାରିଙ୍କୁ ନିଜର ସୁରକ୍ଷା, ରକ୍ଷଣାବେକ୍ଷଣ ଓ ବିକାଶ ର ଗୁହାରି କରୁଥିବା ୬୪ ଯୋଗିନୀ ଗଣଙ୍କ ଦୁଃଖ ଦୁର ହେଉଛି ନା ରାଜ୍ଯ ସରକାର ପୁଣି ଯୋଗିନୀଙ୍କୁ ଛଳନା କରୁଛନ୍ତି।

(ଅନୀଲ କୁମାର ତ୍ରିପାଠୀ ଙ୍କ ରିପୋର୍ଟ)