25-Jun-2022

 ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ଆଜି ସରକାରଙ୍କ ସମବାୟ ସମିତି ନିବନ୍ଧକ ବା ଆରସିଏସ୍ ରାଜ୍ୟର ୧୫୭ ଟି ପେକ୍ସକୁ ତୁରନ୍ତ ବନ୍ଦ କରିଦେବାକୁ ଡିଆରସିଏସ ବା ଜିଲ୍ଲାର ସମବାୟ ଅଧିକାରୀଙ୍କୁ ନିର୍ଦ୍ଦେଶ ଦେଥିବା ପ୍ରକାଶ ପାଇଛି । ଏଥିରେ ରାଜ୍ୟର ସର୍ବାଧିକ ବଲାଙ୍ଗୀର ଜିଲ୍ଲାର ୬୦ ଟି ଓ ସୋନପୁର ଜିଲ୍ଲାର ୧୨ ଟି ଅନ୍ତର୍ଭୁକ୍ତ । ଗତ ୨୦୧୪ରୁ ରାଜ୍ୟର ୧୬୨ଟି ପେକ୍ସକୁ ବନ୍ଦ କରିଦେବାକୁ ନିର୍ଦ୍ଦେଶ ଦିଆଯାଇଥିଲା । କିନ୍ତୁ ୮ ବର୍ଷ ଧରି ଏହି ସରକାରୀ ନିର୍ଦ୍ଦେଶ କାର୍ଯ୍ୟକାରୀ ହୋଇ ନଥିଲା । ଏବେ ଏହି ନିର୍ଦ୍ଦେଶ ଚର୍ଚ୍ଚାର ବିଷୟ ହୋଇଛି । କାରଣ ଏବେ ନୂତନ ସମବାୟ କର୍ମକର୍ତ୍ତାଙ୍କ ନିର୍ବାଚନ ଚାଲିଛି । କେତେକ ସ୍ଥାନରେ ସରିଲାଣି । 

ଅଧିକାଂଶ ପେକ୍ସରେ ଦୁର୍ନୀତି ସୀମାଲଙ୍ଘନ କରିଥିବା ଓ ଚାଷୀ ଶୋଷଣର ଗନ୍ତାଘର ପାଲଟିଥିବା ଏବଂ ଋଣ ଆଦାୟରେ ବିଫଳତା ଏହାର କାରଣ ବୋଲି ଦର୍ଶାଯାଇଛି । ତେବେ ଏହା କେତେଦୂର ସତ୍ୟ , ଲୋକେ ଭଲଭାବରେ ଜାଣନ୍ତି । ଚାଷୀଙ୍କ ଅପେକ୍ଷା ଏହି ଗୋଲାଗୁଡିକ ଅଧିକନ୍ତୁ ଜାଲ୍ ଚାଷୀ , ଦଲାଲ , ବେପାରୀ , ଅସାଧୁ କର୍ମଚାରୀ , ଦୁର୍ନୀତିଗ୍ରସ୍ତ ତଥାକଥିତ କର୍ମକର୍ତ୍ତା ବା କୁଜିନେତାଙ୍କ ଆଡ୍ ଡା ସ୍ଥଳୀ ପାଲଟିଥିଲା ।  ତେଣୁ ଏହାକୁ ଚାଷୀର ସ୍ବାର୍ଥବିରୋଧୀ କୁହାଯାଇ ଯେତେ ରାଜନୀତି କରାଗଲେ ବି ଜଳନ୍ତାନିଆଁ ପରି ସତ୍ୟକୁ ପାଉଁଶରେ ଢଙ୍କାଯାଇ ପାରିବ ନାହିଁ ।

ଧାନ କିଣାବିକା ବା ମଣ୍ଡି , ଋଣ , ବିହନ , ସାର ଆଦି କାରବାରରେ ଏହି ମହତ୍ ଉଦ୍ଦେଶ୍ୟରେ ଗଠିତ ସମବାୟ ସଂସ୍ଥାଗୁଡ଼ିକରେ ଯାବତୀୟ କେଳେଙ୍କାରୀ କରାଯାଇ ଆସୁଥିବା କିଏ ନଜାଣେ  !

ବିଗତବର୍ଷମାନଙ୍କରେ ଏହି ଦୁଇଜିଲ୍ଲାର ପେକ୍ସ ଓ ବ୍ୟାଙ୍କ୍ ମାନଙ୍କରେ ଗାଦିମାଡି ବସିଆସିଥିବା   କର୍ମକର୍ତ୍ତା ଓ ଅଧିକାରୀ ବନାମ କର୍ମଚାରୀଙ୍କ କାର୍ଯ୍ୟକଳାପ ଦାଣ୍ଡରେ ପଡି ହାଟରେ ଗଡଗଡେଇଛି । ତେଣୁ 'ମାର୍ ମାର୍ ଭଣ୍ଡାରିଆକୁ ମାର୍ ' ନୀତିରେ ସେଭଳି ଦୁର୍ନୀତିଗ୍ରସ୍ତଙ୍କର ଲୁଣ୍ଠନ ନିମନ୍ତେ ଜିଲ୍ଲାର ପ୍ରକୃତଚାଷୀଙ୍କର ପେଟକୁ ଲାତ ମାରିବା ପାଇଁ ଦାୟୀ କିଏ  ? ସର୍ବୋପରି ପେକ୍ସରେ ତାଲା ପଡିଗଲେ , ନବ ନିର୍ବାଚିତ କର୍ମକର୍ତ୍ତା ମାନେ କଣ କରିବେ , ଏହା ଏକ ପ୍ରଶ୍ନବାଚୀ ହେଇ ଠିଆ ହେବ  ।