25-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ଆଜି ଏକ ନିର୍ଭରଯୋଗ୍ୟ ଗଣମାଧ୍ୟମରେ ପ୍ରକାଶିତ ତଥ୍ୟ ଅନୁସାରେ , ଟିଟିଲାଗଡ ଡିଭିଜନର ତୁଷୁରା ରେଞ୍ଜ୍ ର ମୋଟ ୬୧ ଟି ଫଡିରେ କେବଳ ରଚେଇ ବାବଦକୁ ୬ ଲକ୍ଷରୁ ଅଧିକ ଦୁର୍ନୀତି ହୋଇଥିବା ପ୍ରକାଶ ପାଇଛି । ପତ୍ରକୁ ଶୁଖାଇବାବେଳେ  ଓଲଟପାଲଟ ପରେ ଫଡିକୂ ନେବାର ରଚେଇରେ ଶହେ ଚଟାକୂ ୯୭୦ ଟଙ୍କାର ଶ୍ରମିକ ମଜୁରୀରୁ ଟଙ୍କା କାଟି ୪ଶହରୁ ସାଢେ ୪ ଶହ ଟଙ୍କା ଦିଆଯାଉଛି । ସମ୍ପୃକ୍ତ ତୁଷରା ରେଞ୍ଜ୍ ର ଅର୍ଜୁନପୁର ଫରେଷ୍ଟର ମଧ୍ୟ ଏହାକୁ ସାଢେ ୪ ଶହରୁ ୫ ଶହ ଟଙ୍କା ଦିଆଯାଇ ମୋଟ ଟଙ୍କାର ୪୦ ଭାଗ ସାମଗ୍ରୀ କିଣାରେ ଖର୍ଚ୍ଚ ହେଉଥିବା ସ୍ବୀକାର କରିଥିବା ପ୍ରକାଶ । ଏହି ହିସାବରେ ଉକ୍ତ ରେଞ୍ଜ୍ ର ୬୧ ଟି ଫଡିରେ ଏହି ଦୁର୍ନୀତି ୬ ଲକ୍ଷରୁ ଅଧିକ ହେବାର ଆଶଙ୍କା ପ୍ରକାଶ ପାଇଛି । ତେବେ ଏହା ହୌଇଥାଏ , ତେବେ ବଲାଙ୍ଗୀର ସର୍କଲର ବଲାଙ୍ଗୀର , ପାଟଣାଗଡ , ଟିଟିଲାଗଡ , ପଦ୍ମପୁର , ଜୟପୁର , ନବରଙ୍ଗପୁର , ଭବାନୀପାଟଣା ଓ ଖଡିଆଳ ଆଦି ୮ ଟି ଡିଭିଜନରେ ଏହି ପରିମାଣ କେତେ ହେବ , ଅନୁମେୟ !

ଏହି ରଚେଇ ମଜୁରୀ ଆକାଉଣ୍ଟ୍ ରେ ଦିଆ ନଯାଇ ନଗଦ ବଣ୍ଟନ କରାଯାଉଛି ବୋଲି କୁହାଯାଉଛି । ଏଯାବତ୍ ଏହି ପ୍ରକାଶିତ ଅଭିଯୋଗ ସମ୍ବଳିତ ତଥ୍ୟର ବିଭାଗୀୟ ସ୍ପଷ୍ଟୀକରଣ ଦିଆଯାଇନାହିଁ  । ଏଣୁ ଏହାର ସତ୍ୟାସତ୍ୟ ସରକାରଙ୍କ ପକ୍ଷରୁ ତଦନ୍ତ କରାଯିବା ଜରୁରୀ ବୋଲି ଜନମତ ପ୍ରକାଶ ପାଉଛି ।

ଏତଦ୍ ବ୍ୟତୀତ ଏହି କେନ୍ଦୁପତ୍ର ଅମଳର ଗୋଛାକଟେଇଠାରୁ ଫଡି ତିଆରି , ମରାମତି , ସାମଗ୍ରୀକିଣା , ଖର୍ଚ୍ଚବାର୍ଚ୍ଚ , ପରିବହନ , ଅଧିକାରୀଙ୍କ ଗସ୍ତ , ବେତନାଦି ବ୍ୟୟରୁ କେତେ ଓ କିପରି ଅନିୟମିତତା ହେଉଛି , ପୂର୍ବଥରଗୁଡିକ ପରି ଚଳିତବର୍ଷର ଏକ ପୁଙ୍ଖାନୁପୁଙ୍ଖ ତଦନ୍ତର ଆବଶ୍ୟକତା ରହିଛି ।