09-Jun-2022

ପାଟଣାଗଡ଼/ ସରକାର ଗ୍ରୀଷ୍ମ ଋତୁରେ ଲୋକଙ୍କ ତୃଷ୍ଣା ମେଣ୍ଟାଇବା ନିମନ୍ତେ ବିଭିନ୍ନ ଯୋଜନା କାର୍ଯ୍ୟକାରୀ କରି ବିଶୁଦ୍ଧ ପାନୀୟ ଜଳ ଯୋଗାଇ ଦେଉଛନ୍ତି। କିନ୍ତୁ ପ୍ରଶାସନିକ ଅଧିକାରୀ ଓ ରାଜନେତା ମାନଙ୍କ ଅଣଦେଖା ଯୋଗୁଁ ବିଭିନ୍ନ ସ୍ଥାନରେ ପାଣି ସଙ୍କଟ ଦେଖିବାକୁ ମିଳୁଛି। ଶେଷରେ ଲୋକେ ବାଧ୍ୟ ହୋଇ ରାଜରାସ୍ତାକୁ ଓହ୍ଲାଉଛନ୍ତି। ସୂଚନା ଅନୁସାରେ ପାଟଣାଗଡ଼ ଉପଖଣ୍ଡ ବେଲପଡା ବ୍ଳକ ବେଲପଡା ଗାଁ ରେ ଚଳିତ ବର୍ଷ ଗ୍ରୀଷ୍ମ ଋତୁରେ ପଞ୍ଚାୟତ ପକ୍ଷରୁ ଟ୍ୟାଙ୍କର ଦ୍ବାରା ଘରକୁ ଘର ପାଣି ଯୋଗାଇ ଦିଆଯାଉଥିଲା। କିନ୍ତୁ ଦୁଇ ଦିନ ହେଲା ଜଳଯୋଗାଣ ବନ୍ଦ କରି ଦେବାରୁ ଆଜି ବେଲପଡା ଗ୍ରାମବାସୀ ବ୍ଳକ କାର୍ଯ୍ୟାଳୟ କୁ ଯାଇ ଧାରଣା ଦେଇଥିଲେ। ଦୀର୍ଘ ଦୁଇ ଘଣ୍ଟା ଧରି ଶତାଧିକ ମହିଳା ଓ ପୁରୁଷ ମାନେ ବିଡ଼ିଓ ଙ୍କୁ ଘେରିଥିଲେ।ପରେ ବିଡ଼ିଓ ଭିକ୍ଟୋରିଆ ସୋରେନ୍ ବେଲପଡା ପଞ୍ଚାୟତ ସରପଞ୍ଚ ହରିଶ ବୁଡେକ ଙ୍କୁ ଡ଼ାକି ସର୍ବସାଧାରଣ ରେ ଆଲୋଚନା କରିଥିଲେ।ସରପଞ୍ଚ ପ୍ରତିକ୍ରିୟା ଦେଇଥିଲେ ଯେ ବେଲପଡା ପଞ୍ଚାୟତର ଜନସଂଖ୍ୟା ଅଧିକ ହେଲେ ୩ ମାସ ପାଣି ଯୋଗାଇବା ପାଇଁ ସରକାର ମାତ୍ର ୧,୫୦୦୦୦ ଟଙ୍କା ଅନୁକମ୍ପା ରାଶି ପ୍ରଦାନ କରିଛନ୍ତି। ଯାହାକି ପ୍ରତିଦିନ ଟ୍ରାକ୍ଟର ଓ ଟାଙ୍କି ଭଡ଼ା ପୁରୁନାହିଁ । ସେଥିପାଇଁ ପାଣି ଯୋଗାଇବା ବନ୍ଦ କରିଦେଇଛନ୍ତି।ପରେ ବିଡ଼ିଓ ପ୍ରତିକ୍ରିୟା ଦେଇଥିଲେ ଯେ ଯେକୌଣସି ଫଣ୍ଡରୁ ଆଣି ତା'ର ବ୍ୟବସ୍ଥା କରାଯିବ ଆଉ ପାଣି ଯୋଗାଇବା ଚାଲୁରଖନ୍ତୁ । ଏଭଳି ନିଷ୍ପତ୍ତି ଶୁଣିବା ପରେ ଗ୍ରାମବାସୀ ଆନ୍ଦୋଳନ ରୁ ଓହରି ଯାଇଥିଲେ। ହେଲେ ଏଠି ପ୍ରଶ୍ନ ଉଠୁଛି ଯେ ବେଲପଡା ଭଲି ସହର ରେ

ପାନୀୟ ଜଳ ଯୋଗାଣ ବିଭାଗ ପକ୍ଷରୁ ନିର୍ମାଣ ହୋଇଥିବା ବସୁଧା ପ୍ରକଳ୍ପ ଯୋଜନା ର ଓଭର ଟ୍ୟାଙ୍କ ଦୀର୍ଘ ବର୍ଷ ଧରି ଅଚଳାବସ୍ଥା ରେ ପଡ଼ିରହିଛି କିନ୍ତୁ  କୌଣସି ପ୍ରଶାସନିକ ଅଧିକାରୀ କିମ୍ବା ରାଜନେତା ମାନଙ୍କ ଦୃଷ୍ଟି ପଡୁନାହିଁ କାହିଁକି ? ଏହା ଗୋଟିଏ ନୁହେଁ ବେଲପଡା ଅଞ୍ଚଳ ରେ ଜଳଯୋଗାଣ ବିଭାଗ ରେ କାର୍ଯ୍ୟରତ ଥିବା କନିଷ୍ଠ ଯନ୍ତ୍ରୀ ମାନଙ୍କ ଅବହେଳା ଯୋଗୁଁ ବିଭିନ୍ନ ସ୍ଥାନରେ ବସୁଧା ପ୍ରକଳ୍ପ ଯୋଜନା ର ଓଭର ଟ୍ୟାଙ୍କ ଗୁଡିକ ଅଚଳାବସ୍ଥା ରେ ପଡ଼ିରହିଛି।ଆଉ ପାଣି ର ଉତ୍କଣ୍ଟ ସମସ୍ୟା ଦେଖିବାକୁ ମିଳୁଛି। ଦୀର୍ଘ ୧୨ ବର୍ଷ ଧରି ଏଠାରେ ରହିଥିବା କନିଷ୍ଠ ଯନ୍ତ୍ରୀ ଇନ୍ଦ୍ର ଚନ୍ଦ୍ର ମାନୁନଥିବା ଜନସାଧାରଣ ରେ ଅଭିଯୋଗ ହେଉଛି। ଏହାକୁ ବଲାଙ୍ଗିର ଜିଲ୍ଲାପାଳ ସ୍ବତନ୍ତ୍ର ଦୃଷ୍ଟି ଦେଇ ବିହିତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।

(ପୂର୍ଣ୍ଣ ଶଶୀ ଶେଖର ରାଓ)