03-Jun-2022

ବରଗଡ:-ଜୀବନ ଏକ ରଙ୍ଗମଞ୍ଚ ଏଠି ସମସ୍ତେ ଗୋଟିଏ ଗୋଟିଏ କଳାକାର। ସେହିପରି ଜଣେ ନେତାରୁ ଅଭିନତା ହେବାକୁ ଯାଉଛନ୍ତି ରାଜନୀତି ମୈଦାନର ପୋଖତ ଖେଳାଳୀ ବରଗଡ ସାଂସଦ ପ୍ରସନ୍ନ ଆାଚାର୍ଯ୍ୟ ବୋଲି ବିଶ୍ୱସ୍ତ ସୂତ୍ରରୁ ଜଣାପଡିଛି। ଶ୍ରୀମାନ ଆଚାର୍ଯ୍ୟ ରାଜ୍ୟସଭାରୁ ଅବ୍ୟାହତି ନେଇ ବରଗଡ ପ୍ୟାଭେଲିୟନକୁ ଫେରି ଆସିଥିଲେ ମଧ୍ୟ ତାଙ୍କ ଖେଳୁଆଡ ମନୋବୃତ୍ତିରେ ଊଣା ହୋଇନାହିଁ କି ଖେଳାଳୀ ଓ କଳାକାର ମାନଙ୍କୁ ପ୍ରୋତ୍ସାହନ ଦେବାରେ କାର୍ପଣ୍ୟତା ନାହିଁ। ବରଗଡର କିଛି ଖେଳାଳୀ ନ୍ୟାସନାଲ କରାଟେ ଚମ୍ପିଆନସିପ ରେ ସଫଳତା ଲାଭ କରିଥିବାର ଖବର ପାଇ ପ୍ରସନ୍ନ ଆଚାର୍ଯ୍ୟ ତାଙ୍କ ବରଗଡ ସ୍ଥିତ ବାସଭବନକୁ ନିମନ୍ତ୍ରଣ କରିବା ସହ ଚାରିଜଣ ଖେଳାଳୀଙ୍କୁ ସମ୍ବର୍ଦ୍ଧିତ କରିଥିଲେ। ରାଜନୀତିରୁ ସାମୟିକ ବିରତି ପରେ ସେ ଚଳଚ୍ଚିତ୍ର ନିର୍ଦ୍ଦେଶକ ଲିଟୁ ମହାନ୍ତିଙ୍କ ଦ୍ବାରା ସ୍ବାଧିନତା ସଂଗ୍ରାମୀ ସ୍ବର୍ଗତାଃ ପାର୍ବତୀ ଗିରିଙ୍କ ଜୀବନୀକୁ ନେଇ ପ୍ରସ୍ତୁତ ଚଳଚ୍ଚିତ୍ର “ବଡମା” ରେ ଅଭିନୟ କରିବେ ବୋଲି ଜଣାପଡିଛି। ଏଥିରେ ତତ୍କାଳୀନ ଓଡିଶାର ମୁଖ୍ୟମନ୍ତ୍ରୀ ସ୍ବର୍ଗତଃ ବିଜୟାନନ୍ଦ ପଟ୍ଟନାୟକ, ସ୍ବାଧିନତା ସଂଗ୍ରାମୀ ସ୍ବର୍ଗତା ପାର୍ବତୀ ଗିରି ଓ କ୍ୟାବିନେଟ ମନ୍ତ୍ରୀ ଥିବା ପ୍ରସନ୍ନ ଆଚାର୍ଯ୍ୟ ମଧ୍ୟରେ ହୋଇଥିବା କଥୋପକଥନର ଏକ ଦୃଶ୍ୟରେ ପ୍ରସନ୍ନ ଆଚାର୍ଯ୍ୟ ନିଜେ ତାଙ୍କ ଭୁମିକାରେ ଅଭିନୟ କରୁଥିବା ଜଣାପଡିଛି। ଜୁନ ଦ୍ବିତୀୟ ସପ୍ତାହରେ ବରଗଡରେ ଏହି ଚଳଚ୍ଚିତ୍ରର ଅନ୍ତିମ ପର୍ଯ୍ୟାୟ ସୁଟିଂ ଶେଷ ହେବ। ଏହି ଦୃଶ୍ୟଟି ପ୍ରସନ୍ନ ଆଚାର୍ଯ୍ୟଙ୍କ ଯୁବ ବୟସ ର ହୋଇଥିବା ପ୍ରସନ୍ନ ଆଚାର୍ଯ୍ୟଙ୍କ ପାଇଁ ସ୍ବତନ୍ତ୍ର ଚୁଟି ର ବ୍ୟବସ୍ଥା କରା ଯାଇଥିବା ଜଣାପଡିଛି। ଜୀବନ ଓ ରାଜନୀତିକୁ ଖେଳ ସ୍ବରୂପ ବିଚାର କରୁଥିବା ପ୍ରସନ୍ନ ଆଚାର୍ଯ୍ୟଙ୍କ ଭିନ୍ନ ଏକ ରୂପ ଖୁବ ଶିଘ୍ର ସିଲଭର ସ୍କ୍ରୀନରେ ଦେଖିବାକୁ ମିଳିବ। ଏଠାରେ ପ୍ରକାଶଯୋଗ୍ୟ ଯେ, କଳାହାଣ୍ଡିର ଶିଶୁବିକ୍ରୀ ଓ ପାର୍ବତୀ ଗିରି ପ୍ରସଙ୍ଗରେ ଅଞ୍ଚଳର ଅନ୍ୟତମ ବରିଷ୍ଠ ସାମ୍ବାଦିକ ବାମାପଦ ତ୍ରିପାଠୀ ମଧ୍ୟ ଏହି ଚଳଚ୍ଚିତ୍ରରେ ଅଭିନୟ କରୁଥିବା ଜଣାପଡିଛି। ଏହି କାରଣରୁ ମୁକ୍ତିଲାଭ ପୂର୍ବରୁ ଲିଟୁ ମହାନ୍ତିଙ୍କ “ବଡମା” ଚଳଚ୍ଚିତ୍ର ଏବେ ଚର୍ଚ୍ଚାର ପ୍ରସଙ୍ଗ ପାଳଟିଛି। ଭାରତୀୟ ସ୍ବାଧିନତା ପ୍ରାପ୍ତିର ୭୫ ବର୍ଷ ଉପଲକ୍ଷେ ‘ଆଜାଦିକା ଅମୃତ ମହୋତ୍ସବ’ ଅବସରରେ  ଚଳଚ୍ଚିତ୍ର ମୁକ୍ତିଲାଭ କରିବ ଏବଂ ଏହି ଚଳଚ୍ଚିତ୍ର ମାଧ୍ୟମରେ ପଶ୍ଚିମ ଓଡିଶାର ବହୁ ଅନାଲୋଚିତ ସ୍ବାଧିନତା ସଂଗ୍ରାମୀଙ୍କ ସମ୍ପର୍କରେ ଜନସାଧାରଣ ଅବଗତ ହୋଇ ପାରିବେ ବୋଲି ଚଳଚ୍ଚିତ୍ର ନିର୍ଦ୍ଦେଶକ ଲିଟୁ ମହାନ୍ତି ସୂଚନା ଦେଇଛନ୍ତି