22-May-2022

ବଲାଙ୍ଗୀର : (ପ୍ରେରଣା ଖବର)  ଗତକାଲି ସନ୍ଧ୍ୟାରେ ସ୍ଥାନୀୟ ପି ପି ଏକାଡେମି ସଭାକକ୍ଷରେ  ଗାଳ୍ପିକ ଗୋଲକ ଚନ୍ଦ୍ର ଦଳାଇଙ୍କ ଗଳ୍ପ ପୁସ୍ତକ ' ଅରଣ୍ୟ ଆଖିର ଲୁହ ' ମହା ସମାରୋହରେ ଉନ୍ମୋଚିତ ହୋଇଯାଇଛି ।  ଏକାଡେମିର ପ୍ରଧାନଶିକ୍ଷକ ସିନୁ ସୁନ୍ଦର ପାଢୀଙ୍କ ସଭାପତିତ୍ବରେ ଅନୁଷ୍ଠିତ ଏହି ପୁସ୍ତକ ଉନ୍ମୋଚନ ଉତ୍ସବରେ ମୁଖ୍ୟଅତିଥି ଭାବେ  ଇଂ ବିଷ୍ଣୁ ସାହୁ ମୁଖ୍ୟଅତିଥି  , କଥାଶିଳ୍ପୀ ମଳୟ ମିଶ୍ର ମୁଖ୍ୟବକ୍ତା , ଗାଳ୍ପିକା ଗାୟତ୍ରୀ ସରାଫ ସମ୍ମାନିତା ଅତିଥି , କବି ଭାଗିରଥୀ ମିଶ୍ର ଓ କବି ଡ. ପ୍ରହ୍ଲାଦ ଶତପଥୀ ପ୍ରମୁଖ ମଞ୍ଚାସୀନ ହୋଇ ଅଭିଭାଷଣ ଦେଇଥିଲେ । ସୁଶ୍ରୀ ପାୟଲ ପ୍ରଧାନ ଓ ସାଥୀ ପ୍ରାରମ୍ଭିକ ସଙ୍ଗୀତ ଗାଇଥିବା ସହିତ  ପ୍ରାରମ୍ଭିକ ଅଭିଭାଷଣ ଦେଇଥିଲେ । ବଲାଙ୍ଗୀର ଆକାଶବାଣୀର ଉଦ୍ ଘୋଷକ ତଥା କବି ରତ୍ନମୟ ତ୍ରିପାଠୀ ସଂଯୋଜନା କରିଥିଲେ । ଗାଳ୍ପିକ ଶ୍ରୀ ଦଳାଇ ନିଜସ୍ୱ ଲେଖକୀୟ ଅଭିଭାଷଣ ଦେଇଥିଲେ । ଅଧ୍ୟାପକ କୌତୁକ ପନ୍ଦର ଓ ଅଧ୍ୟାପକ ଡ.ଜଗନ୍ନାଥ ସାହୁ ଗଳ୍ପ ଗୁଡିକର ସମୀକ୍ଷା କରିଥିଲେ । ମୁଖ୍ୟଅତିଥି ଶ୍ରୀ ସାହୁ , ସଂଯୋଜକ ଶ୍ରୀ ତ୍ରିପାଠୀ ଓ ସମୀକ୍ଷକ ଝଅଧ୍ୟାପକ ପନ୍ଦର ଓ ଡ.ସାହୁଙ୍କୁ ଗାଳ୍ପିକ ସମ୍ବର୍ଦ୍ଧିତ କରିଥିଲେ । 

ସାଂପ୍ରତିକ କାଳରେ ଲେଖକସଂଘ ଅପେକ୍ଷା ପାଠକ ସଂଘର ବେଶି ଆବଶ୍ୟକତା ରହିଛି ବୋଲି ମୁଖ୍ୟଅତିଥି ମତବ୍ୟକ୍ତ କରିଥିବାବେଳେ , ମୁଖ୍ୟବକ୍ତା ଶ୍ରୀ ମିଶ୍ର ବଲାଙ୍ଗୀରର ବ୍ରଜବିହାରୀଙ୍କଠାରୁ ଆରମ୍ଭ କରି ମନୋଜ କୁମାର ପଂଡାଙ୍କ ପର୍ଯ୍ୟନ୍ତ ଗଳ୍ପପ୍ରତିଭାଙ୍କର ସ୍ମୃତିଚାରଣ କରିବା ସହିତ ଗଳ୍ପରଚନାର କଳା ଓ ଆଭିମୁଖ୍ଯ ସହିତ  ଗାଳ୍ପିକ ଶ୍ରୀ ଦଳାଇଙ୍କର ଉକ୍ତ ଗଳ୍ପସଂକଳନସ୍ଥ ଗଳ୍ପରଚନାର ଶୈଳୀ ଓ ସ୍ବର ସମ୍ପର୍କରେ ଆଲୋଚନା କରିଥିଲେ । ଶ୍ରୀମତୀ ସରାଫ୍ , ଶ୍ରୀ ମିଶ୍ର ଓ ଡ. ଶତପଥୀ ମଧ୍ୟ  ନିଜ ନିଜର ଅଭିଭାଷଣରେ ସାହିତ୍ୟ , ଗଳ୍ପ ଓ ଗାଳ୍ପିକଙ୍କ ଗଳ୍ପ ସମ୍ପର୍କରେ ସାରଗର୍ଭକ

ବକ୍ତୃତା ଦେଇ ଉଚ୍ଚ ପ୍ରଶଂସା କରିଥିଲେ । ଶେଷରେ ' ପ୍ରେରଣା ' ର ସମ୍ପାଦକ ରଘୁନନ୍ଦନ ସିଂ ଧନ୍ୟବାଦ ଦେଇଥିଲେ । ଏହି ସମାବେଶରେ ସହରର ବହୁ କବି , ଲେଖକ , ସାମ୍ବାଦିକ ଓ ସାରସ୍ବତପ୍ରେମୀ ଯୋଗ ଦେଇଥିଲେ । ଉଲ୍ଲେଖନୀୟ ଯେ ଜିଲ୍ଲା ଯୋଜନାଧିକାରୀ ତଥା ଜିଲ୍ଲା ପରିସଂଖ୍ୟାନ ଅଧିକାରୀ ଓ  ପଶ୍ଚିମଓଡିଶା ବିକାଶ ପରିଷଦର ଜିଲ୍ଲା  ଅଧିକାରୀଭାବେ ଅବସ୍ଥାପିତ ଗାଳ୍ପିକ ଶ୍ରୀ ଦଳାଇ ଦୀର୍ଘଦିନରୁ କଲମ ଚାଳନା କରିଆସୁଥିବାବେଳେ  ଏହା ତାଙ୍କର ନବମ ପୁସ୍ତକ ତଥା ପ୍ରଥମ ଗଳ୍ପ ସଂକଳନ ଅଟେ ।