17-May-2022

ଟିଟିଲାଗଡ଼ /ସିନ୍ଧେକେଲା(ଅନୀଲ କୁମାର ତ୍ରିପାଠୀ) : କିଛି ଦିନ ର ଆଶ୍ବସ୍ତି ପରେ ପୁଣି ତତଲା ତାୱାରେ ସିଝୁଛି ତତଲାଗଡ଼ ଭାବରେ ପରିଚିତ ଟିଟିଲାଗଡ଼ ସହର l ସେହିପରି ଭାବେ ପ୍ରକୃତିର ପ୍ରାକୃତିକ କୋଲରେ ଜନ୍ମ ନେଇଥିବା ସିନ୍ଧେକେଲା ଅଞ୍ଚଳର ଲୋକେ ଏବେ ତାତିରେ ବେହାଲ। ସରକାରୀ ଭାବରେ ଏବେ ତାତି ୪୨ ଡିଗ୍ରୀ ରୁ ୪୩ ଡିଗ୍ରୀ ମଧ୍ୟରେ ରହୁଥିବା କୁହାଯାଉଛି l ହେଲେ ଏବେ ତାତି ଅସମ୍ଭାଳ ହୋଇପଡିଛି l ଘରୁ ବାହାରକୁ ବାହାରିବା ମାତ୍ରକୁ ମୁଣ୍ଡ ବିନ୍ଧା ସହ ଦେହ ହାତ ଗୋଡ଼ ପୋଡି ଗଲା ଭଳି ଲାଗୁଛି l ଅସହ୍ୟ ତାତି ଯୋଗୁଁ ଲୋକେ ନାହିଁ ନ ଥିବା ସମସ୍ୟା ର ସମ୍ମୁଖୀନ ହେଉଛନ୍ତି l ଅଂଶୁଘାତ ଜନିତ ସମସ୍ୟା ରୁ ରକ୍ଷା ପାଇବାପାଇଁ ଲୋକେ ମୁଣ୍ଡରେ ଗାମୁଛା ଦେଇ ଯାତାୟାତ କରୁଥିବା ବେଳେ ହାତରେ ପାଣି ବୋତଲ,

ଛତା, ଚଷମା ଆଦି ବ୍ୟବହାର କଲେ ମଧ୍ୟ ସ୍ଥିତି ବେହାଲ ହୋଇ ପଡୁଛି l ଲୋକେ ତାତି ରୁ ନିଜକୁ ରକ୍ଷା କରିବା ପାଇଁ ଥଣ୍ଡା ସରବତ, ଲେମ୍ବୁ ପାଣି, ଦହିବରା, ଲସି, ଆଖୁ ରସ, ତରଭୁଜ ଉପରେ ନିର୍ଭର କରୁଛନ୍ତି l ସକାଳ ୧୨ ଟାରୁ ଅପରାହ୍ନ ୫ ଟା ପର୍ଯ୍ୟନ୍ତ ଟିଟିଲାଗଡ଼ ସହର ର ରାସ୍ତାଘାଟ ଜନଶୁନ୍ୟ ଅବସ୍ଥାରେ ରହୁଛି l ଅଘୋଷିତ କରଫ୍ୟୁ ପରି ମୁଖ୍ୟ ରାସ୍ତା ଘାଟ ଠାରୁ ଗଳି କନ୍ଦିର ଅବସ୍ଥା ରହୁଛି l ପୁରା ଜନଶୂନ୍ୟ ହୋଇ ପଡୁଛି ସହର l କିଛି ଦିନ କାଳ ବୈଶାଖୀ ତଥା ବାତ୍ୟା ଆସାନି କୁ ନେଇ ପାଣିପାଗ ପରିବର୍ତ୍ତନ ହେବା ସହ ତାତି ରୁ ଲୋକଙ୍କୁ କିଛି ଟା ଆଶ୍ବସ୍ତି ମିଳିଥିଲା l ଟିଟିଲାଗଡ଼ ତାପମାତ୍ରା ୪୦ ଡିଗ୍ରୀ ରୁ ତଳକୁ ଖସି ୩୭ ରୁ ୩୮ ଡିଗ୍ରୀ ରେ ପହଂଚିଥିଲା l ହେଲେ ଏବେ ପାଗ ଶୁଖିଲା ରହିବା ଯୋଗୁଁ ପୁଣି ସହରରେ ପ୍ରଚଣ୍ଡ ତାତି ଅନୁଭୂତ ହେଉଛି l ୪୦ ଡିଗ୍ରୀ ରୁ ହଠାତ ୩.୨ ଡିଗ୍ରୀ ବୃଦ୍ଧି ପାଇ ୪୩.୨ ଡିଗ୍ରୀ ରେ ପହଞ୍ଚିବା କାରଣ ରୁ ସହରରେ ସ୍ଥିତି ଆହୁରି ଅସମ୍ଭାଳ ହୋଇ ପଡିଛି l ଟିଟିଲାଗଡ଼ ସହର ଉପରେ ନିର୍ଭର କରି ଆସୁଥିବା ଆଖପାଖ ଗ୍ରାମାଞ୍ଚଳର ଲୋକଙ୍କ ଅବସ୍ଥା ଆହୁରି ଦୟନୀୟ ହୋଇ ପଡିଛି l ଯଦି ଓ ପ୍ରଚଣ୍ଡ ତାତି କୁ ନେଇ ସହରର କେତେକ ସ୍ଥାନରେ ଜଳଛତ୍ର ଖୋଲା ଯାଇଛି, ହେଲେ ଅସ୍ଥାୟୀ ବିଶ୍ରାମ ଗୃହ ଆଜି ପର୍ଯ୍ୟନ୍ତ ଆରମ୍ଭ ହୋଇ ନଥିବାରୁ ଟିଟିଲାଗଡ଼ ସହର ଉପରେ ନିର୍ଭର କରି ଆସୁଥିବା ଲୋକେ କିଏ ଚା ଦୋକାନ ତ କିଏ ପାନ ଦୋକାନ, ହୋଟେଲ ମାନଙ୍କର ଛାଇ ରେ ରହିବାକୁ ବାଧ୍ୟ ହେଉଛନ୍ତି l ଗୋଟିଏ ପଟରେ ଟିଟିଲାଗଡ଼ ରେ ତାତି ରାଜୁତି କରୁଥିବା ବେଳେ ବାରମ୍ବାର ବିଦ୍ୟୁତ କାଟ ମଧ୍ୟ ସାଧାରଣ ଜନତା ଙ୍କ ଜୀବନ ଯନ୍ତ୍ରଣା କୁ ଆହୁରି ଜଟିଳ କରିଛି l ବାରମ୍ବାର ବିଦ୍ୟୁତ କାଟ ହେବା ଯୋଗୁଁ ଘର ଭିତରେ ମଧ୍ୟ ରହିବା ମୁସ୍କିଲ ହୋଇ ପଡୁଛି l ପୂର୍ବରୁ ସାତ ଦିନରେ ଆଠ ଦିନରେ ଥରେ ପାନୀୟ ଜଳ ଯୋଗାଇ ଦିଆଯାଉଥିବା ବେଳେ ଏବେ ପ୍ରତି ଚାରି ଦିନରେ ଥରେ ପାଇପ ଯୋଗେ ପାନୀୟଜଳ ଯୋଗାଇ ଦେଉଛି ଜନସ୍ୱାସ୍ଥ୍ୟ ବିଭାଗl ଯାହାକୁ ନେଇ ସମୁଦ୍ର କୁ ଶଙ୍ଖେ ସଦୃଶ୍ୟ ପାନୀୟଜଳ ଯୋଗାଇ ଦେଉଛି ଜନସ୍ୱାସ୍ଥ୍ୟ

ବିଭାଗ l ପୁଣି ୧୫ ଗୋଟି ୱାର୍ଡ କୁ ୧୨ ଗୋଟି ପାଣି ଟ୍ୟାଙ୍କର ସାହାଯ୍ୟ ରେ ପାଣି ଯୋଗାଇ ଦେଉଥିଲେ ସୁଦ୍ଧା ଅତ୍ୟଧିକ ଗରମ ରେ ଲୋକେ ପାଣି ବୋହିବା ଯୋଗୁଁ ନାହିଁ ନ ଥିବା ଅସୁବିଧା ର ସମ୍ମୁଖୀନ ହେଉଛନ୍ତି l ସିନ୍ଧେକେଲା ରେ ମଧ୍ଯ ଉନ୍ଦେର ନଦୀରୁ ଇଣ୍ଟେକୱେଳ ଦ୍ବାରା ପାଇପ ଯୋଗେ ପାନୀୟଜଳ ଯୋଗାଇବା ସହ ପାନୀୟଜଳ ଯୋଗାଣ ରେ ଓଭରହେଡ ଟ୍ୟାଙ୍କ ବି ସହାୟକ ହେଉଛି । ତା ସହ ଟେଙ୍କର ଯୋଗେ ମଧ୍ଯ ପାନୀୟଜଳ ପହଞ୍ଚାଇବା ଚେଷ୍ଟା ଚାଳିଛି। ହେଲେ କିଛି ପଡାକୁ ପାଣି ପହଞ୍ଚି ପାରୁନଥିବାରୁ ଲୋକେ ବେଶ ହଇରାଣ ହରକତ ହେଉଥିବା ଦେଖା ଦେଉଛି । ବର୍ତ୍ତମାନ ନଅ ତପା ଚାଳିଥିବାରୁ ଶୀତଳଷଷ୍ଠୀ ଆସିବା ପର୍ଯ୍ୟନ୍ତ ଲୋକେ ଧର୍ଯ୍ୟ ରଖିବାକୁ ଚର୍ଚ୍ଚା କରୁଛନ୍ତି। ଏମିତି ସ୍ଥଳରେ କେବେ ତାତି ରୁ ରକ୍ଷା ମିଳିବ ତାହାକୁ ନେଇ ଏବେଠାରୁ ଲୋକେ ପ୍ରମାଦ ଗଣୁଛନ୍ତି