09-May-2022

ବଲାଙ୍ଗୀର/ ସୋନପୁର(ପ୍ରେରଣା ଖବର ବ୍ୟୁରୋ)- ସୁବର୍ଣ୍ଣପୁର ଜିଲ୍ଲାରେ ପରବର୍ତ୍ତିତ ପାଣିପାଗକୁ ଶୃଙ୍ଖଳିତ କରିବା ପାଇଁ ତଥା ଉତ୍ତପ୍ତ ସହରକୁ ଶୀତଳତା ପ୍ରଦାନ କରିବା  ପାଇଁ ଖଇରମାଳ ବ୍ୟାରେଜ ନିର୍ମାଣ ଦାବୀ ହୋଇଛି । ଏହାକୁ ମିନି ଚିଲିକା ପ୍ରକଳ୍ପ ନାମରେ ଚର୍ଚ୍ଚା  ଜୋର ଧରିଥିଲା। ଏହାର ଆବଶ୍ୟକତା ନେଇ ବୁଦ୍ଧିଜୀବୀ ପକ୍ଷରୁ  ଆନ୍ଦୋଳନ ଓ ସଚେତନତା କାର୍ଯ୍ୟକ୍ରମ କରିବାକୁ ଯାଇ ମୂଖ୍ୟମନ୍ତ୍ରୀ ଓ ଜଳ ସଂପଦ ମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରାଯାଇଅଛି। ଏହି ବ୍ୟାରେଜ ନିର୍ମାଣ ହେଲେ ଶିଳ୍ପ ବିହୀନ ସୁବର୍ଣ୍ଣପୁର ଜିଲ୍ଲା ଓ ବୌଦ୍ଧ ଜିଲ୍ଲାର ଜଳ ସେଚିତ,ମତ୍ସ୍ୟଚାଷ ସହ ଜଳ ପର୍ଯ୍ୟଟନର ସମ୍ଭାବନା ସୃଷ୍ଟି ହୋଇଥାନ୍ତା। ଏହି ପ୍ରକଳ୍ପର ଜଳ ସଂପଦ ଓ ପ୍ରକୃତିଦାନ ପ୍ରଚୁର ଜମି ନେଇ ଶିଳ୍ପନୁଷ୍ଠାନ ପ୍ରତିଷ୍ଠା ପାଇଁ ଶିଳ୍ପପତିମାନେ ଆକୃଷ୍ଟ ହେବେ। ରାଜ୍ୟର ଉତ୍ତପ୍ତ ଅଞ୍ଚଳ ଭାବରେ ପରିଗଣିତ ସୋନପୁର ସହର ଓ ଅନ୍ୟ ପାର ପାଶ୍ୱିକ ଅଞ୍ଚଳ ଆଶ୍ଵସ୍ତ ଅନୁଭବ କରିପାରନ୍ତେ। ଉକ୍ତ ପ୍ରକଳ୍ପରେ ଭୂତଳ ପାଣି ରିଚାର୍ଜ ହେବ। ଅନ୍ୟପକ୍ଷରେ ମହାନଦୀ ପାଣି ସମୁଦ୍ର ଚାଲିଯାଉଛି। ମହାନଦୀ ଜଳ ଉପଯୋଗ ହେଉନାହିଁ। ପଡୋଶୀ ରାଜ୍ୟ ଛତିଶଗଡ ମହାନଦୀ ଜଳକୁ ସଂରକ୍ଷଣ କରିଛି। ତେଣୁ ଓଡ଼ିଶା ସରକାର ମହାନଦୀରେ ଜଳ ଉପଯୋଗ ଯୋଜନା ନେଇ ମାଷ୍ଟର ପ୍ଲାନ ପ୍ରସ୍ତୁତ କରିଥିଲେ। ରାଜ୍ୟ ସରକାର ଖଇର ମାଳ, ଗୋଧନେଶ୍ଵର, କପା ସିରା ଓ ଦେଓଗାଁ ସମେତ ହୀରାକୁଦ ତଳ ମୁଣ୍ଡରେ ୫ଟି ନୂତନ ବ୍ୟାରେଜ ନିର୍ମାଣ କରିବାରୁ ସରକାରୀ ଭାବେ ଘୋଷଣା କରିଥିଲେ। ୫ବର୍ଷ ପୂର୍ବରୁ ରାଜ୍ୟ ଜଳସଂପଦ ବିଭାଗ ମହାନଦୀ-ତେଲ ନଦୀ ସଂଗମ ସ୍ଥଳୀ ରାମେଶ୍ଵରଠାରେ ସାଢେ ୩କିଲେ।ମିଟର ଦୂର ଖଇରମାଳ ବ୍ୟାରେଜ ନିର୍ମାଣ ନେଇ ବିଧିବଦ୍ଧ ଜଣାଇଦିଆଯାଇଥିଲା ଖଇର ମାଳଠାରେ ୫.୫ ମିଟର ଉଚ୍ଚତା ବିଶିଷ୍ଟ ବ୍ୟାରେଜ ନିର୍ମାଣ ପାଇଁ ପ୍ରାଥମିକ ସ୍ତରରେ ଜଳସଂପଦ ବିଭାଗ ପକ୍ଷରୁ ସର୍ଭେ ହୋଇଥିଲା ଟେକନିକାଲ ଆଡ଼ଭାଇଜର କମିଟି (ଟିଏସି)ରେ ଅନୁମୋଦନ ମଧ୍ୟ ହୋଇଥିଲା। ପ୍ରଥମ ପର୍ଯ୍ୟାୟରେ ରାଜ୍ୟରେ ଅନ୍ୟ ବ୍ୟାରେଜ ନିର୍ମାଣ କାର୍ଯ୍ୟ ଜାରି ରହିଛି। କିନ୍ତୁ ଏହି ପ୍ରକଳ୍ପ କାର୍ଯ୍ୟକାରୀ ନ ହେବା, ଏଥିପାଇଁ ସରକାରୀ ଅନୁଦାନ ଯୋଗାଇ ନ ଥିବା ଜିଲ୍ଲାବାସୀଙ୍କୁ ବ୍ୟଥିତ କରିଛି। ଚଳିତ ଗ୍ରୀଷ୍ମଋତୁରେ ସୁବର୍ଣ୍ଣପୁର ତାପମାତ୍ରା ସର୍ବାଧିକ ରେକର୍ଡ଼ କରାଯାଇ ଥିବା ବେଳେ ସମଗ୍ର ଦେଶରେ ଉତ୍ତପ୍ତ ସହର ଭାବେ ଅପଖ୍ୟାତି ପାଇଛି। ଏହି ପରିପ୍ରେକ୍ଷୀରେ ରାଜ୍ୟ ସରକାର ପ୍ରସ୍ଥାବିତ ଖଇରମାଳ ପ୍ରକଳ୍ପକୁ ଅଗ୍ରଧିକାର ଭିତ୍ତିରେ ପ୍ରାଥମିକତା ଦେଇ ତୁରନ୍ତ କାର୍ଯ୍ୟ ଆରମ୍ଭ କରିବା ପାଇଁ ଜିଲ୍ଲାବାସୀ ଦୃଢ ଦାବୀ କରୁଛନ୍ତି। ତେବେ ଏହି ପ୍ରକଲ୍ପର ଅଗ୍ରଗତୀ ନେଇ ପଦ୍ମପୁର ଇନଭେଷ୍ଟିଗେସନ ଡିଭିଜନର ନିର୍ବାହୀଯନ୍ତ୍ରୀ ଇଂ.କୁଳମଣୀ ସେଠୀଙ୍କୁ ପଚାରିବାରୁ ଗତ ଜାନୁୟାରୀ ୭ତାରିଖରେ ଏକ ଉଚ୍ଚପ୍ରତିନିଧି ବୈଷୟୀକ କମିଟି ଆସି ତଦାରଖ କରି ଫେରିଛନ୍ତି । ଆର୍ଥିକ ପରାମର୍ଶଦାତା କମିଟି ଅନୁମୋଦନ ପରେ ଏହି ପ୍ରକଲ୍ପ ହୋଇପାରିବ ବୋଲି କହିଛନ୍ତି ।