08-May-2022

ବିନିକା(ହିମାଂଶୁ ଶେଖର ପୁଟେଲ)ଗ୍ରାମାଞ୍ଚଳରେ ଛୋଟ ପିଲା ମାନଙ୍କ ଖେଳକୁଦ ପାଇଁ ସରକାର ପ୍ରତ୍ୟେକ ପଞ୍ଚାୟତ ସ୍ତରରେ ମନରେଗା ଯୋଜନାରୁ ଗ୍ରାମୀଣ ଉଦ୍ୟାନ ନିର୍ମାଣ ପାଇଁ ଅନୁଦାନ ଯୋଗାଇ ଦେଇଛନ୍ତି । କିନ୍ତୁ ପଞ୍ଚାୟତ କର୍ତୃପକ୍ଷଙ୍କ ଅବହେଳା ଯୋଗୁଁ ଉକ୍ତ ଉଦ୍ୟାନ ଗୁଡ଼ିକ ରକ୍ଷଣାବେକ୍ଷଣ ଅଭାବରୁ ଅବହେଳିତ ଅବସ୍ଥାରେ ପଡ଼ିରହିଛି । ଯାର ଜଳନ୍ତ ନମୁନା ଦେଖିବାକୁ ମିଳିଛି ବିନିକା ବ୍ଳକ ଅନ୍ତର୍ଗତ ବାବୁପାଳି ପଞ୍ଚାୟତ ବାଗଡ଼ିଆ ସ୍କୁଲ ନିକଟରେ ନିର୍ମାଣ ହୋଇଥିବା ଉଦ୍ୟାନ ।ସୂଚନା ଯୋଗ୍ୟ ଯେ ଗତ ୨୦୨୦-୨୧ ଆର୍ଥିକ ବର୍ଷରେ ମନରେଗା ଯୋଜନାରୁ ପ୍ରାୟ ୬ଲକ୍ଷ ଟଙ୍କା ବ୍ୟୟ ଅଟକଳରେ ଗ୍ରାମୀଣ ଉଦ୍ୟାନ ନିର୍ମାଣ ହୋଇଥିଲା ।କିନ୍ତୁ ନିର୍ମାଣ ଆରମ୍ଭ ହେବାର ଇତି ମଧ୍ୟରେ ଦୁଇ ବର୍ଷ ଅତିକ୍ରାନ୍ତ କରିଥିଲେ ମଧ୍ୟ ଏହାର ସଫଳ ରୂପାୟନ ହୋଇପାରିନାହିଁ ।ଉଦ୍ୟାନ ଭିତରେ ଯାବତୀୟ ଘାସ ଲତା ଯୋଗୁଁ ଫୁଲ ଗଛ ଗୁଡ଼ିକ ନଷ୍ଟ ହେବାକୁ ଯାଉଥିବା ବେଳେ ବିଭିନ୍ନ ପ୍ରକାରର ସରୀସୃପ ଓ ଜୀବଜନ୍ତୁଙ୍କ ବାସସ୍ଥାନ ପାଲଟିଛି ।ଯାହା ଫଳରେ ଛୋଟ ଛୋଟ ପିଲା ମାନଙ୍କ ପାଇଁଏମାନଙ୍କର ପ୍ରାଦୁର୍ଭାବ ବିପଦ ପୂର୍ଣ୍ଣ ବୋଲି ଗ୍ରାମବାସୀଙ୍କ ତରଫରୁ ଅଭିଯୋଗ ହେଉଛି । ଛୋଟ ଛୋଟ ପିଲା ମାନଙ୍କ ପାଇଁ ଯେଉଁ ଉଦ୍ଦେଶ୍ୟରେ ଏହା ନିର୍ମାଣ ହୋଇଛି ତାଙ୍କର ଉତ୍ସାହ ପାଇଁ ଏହାର ରକ୍ଷଣାବେକ୍ଷଣ ଦିଗରେ ପଦକ୍ଷେପ ନେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି ।