09-Mar-2022

ବଲାଙ୍ଗୀର: (ମଳୟ ମିଶ୍ରଙ୍କ ରିପୋର୍ଟ ): ଏବେ ଚାଲିଛି ନିର୍ବାଚନଋତୁ । ଗ୍ରାମାଞ୍ଚଳରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଫଳାଫଳ ଘୋଷଣା ନ ହେଉଣୁ ଆରମ୍ଭ ହୋଇଯାଇଛି ସହରାଞ୍ଚଳରେ ପୌରନିର୍ବାଚନର ପ୍ରକ୍ରିୟା । ଉଭୟ ନିର୍ବାଚନକୁ ବେଶ୍ କିଛିକାଳ ଅହେତୁକ ଭାବେ ବିଳମ୍ବିତ କରି ହଠାତ୍ ଏପରି ଘନଘନ ମତଦାତାଙ୍କୁ ହରବର କରିବା ପଛରେ ଶାସକଦଳ ବା ସରକାରଙ୍କର କୌଣସି ଅଭିସନ୍ଧି ଅଛି କି ନା , ପରବର୍ତ୍ତୀ ସମୟରେ ସମୀକ୍ଷାସାପେକ୍ଷ । ତେବେ କୋଭିଡ୍ କଟକଣା ପରେ ପରେ ଏଭଳି ନିର୍ବାଚନୀପ୍ରକ୍ରିୟାରେ ଯେ ପ୍ରକୃତ ଗାଣତାନ୍ତ୍ରିକ ବ୍ୟବସ୍ଥାର ପୁନର୍ଗଠନ ହୋଇପାରିବ , ଏ ନେଇ ଲୋକଙ୍କ ମଧ୍ୟରେ ଏକ କୂଟନୈତିକ ଶଙ୍କା ଉପୁଜିବା ସ୍ବାଭାବିକ ।  ନିର୍ବାଚନବିଧିର ଉଲଙ୍ଘନ ଓ ଶାସନକଳର ପ୍ରତ୍ୟେକ୍ଷ ଅବୈଧ ହସ୍ତକ୍ଷେପର ଗୁରୁତର ଅଭିଯୋଗକୁ ଅଣଦେଖା କରି ଏ ପଞ୍ଚାୟତ ଓ ପୌର ନିର୍ବାଚନରେ ଯେ  ଉପଯୁକ୍ତ ଲୋକପ୍ରତିନିଧିମାନେ ନିର୍ବାଚିତ ହେବେ , ଏହା ନିଶ୍ଚିତ ଭାବେ କୁହାଯାଇପାରୁନାହିଁ । ଯାହା ଦେଖାଯାଇଛି , ଅର୍ଥବଳ ଓ ବାହୁବଳର ପ୍ରୟୋଗରେ କ୍ଷମତାଲାଳସୀଙ୍କର ଏ ଆସୁରିକ ପ୍ରତିଯୋଗିତା ଗଣତନ୍ତ୍ର ପାଇଁ ଆଦୌ ଶୁଭଙ୍କର ନୁହେଁ ।  ଏଭଳି ବିଶ୍ଳେଷଣ କରନ୍ତି ସମାଜବିତ୍ ଓ ବୁଦ୍ଧିଜୀବୀମାନେ ।

ଗତକାଲି ରାଜ୍ୟ ବନାମ ଜିଲ୍ଲାର ପୌର ନିର୍ବାଚନର ପ୍ରାର୍ଥୀଙ୍କର ନାମାଙ୍କନପତ୍ର ଦାଖଲ ସରିଯାଇଛି । କେତେକ ପ୍ରମୁଖ ପୌରସଂସ୍ଥାରେ ହୋଇଥିବା ମହିଳା ସଂରକ୍ଷଣ ଓ ଚଳିତଥର ପ୍ରତ୍ୟେକ୍ଷ ଭୋଟ୍ ଦାନ ବ୍ୟବସ୍ଥାରେ ଏଥର ବହୁ ସ୍ବଚ୍ଛଳ ସମ୍ପନ୍ନଘରର ମହିଳାମାନଙ୍କୁ ମୁଖ୍ୟତଃ ତିନୋଟି ପ୍ରମୁଖ ରାଜନୈତିକଦଳର ମୁନିଆମାନେ ଟିକେଟ୍ ଦେଇଛନ୍ତି । ଉକ୍ତ ଦଳମାନଙ୍କରେ ଅସନ୍ତୋଷ ବି ସୃଷ୍ଟି ହୋଇଛି । ତେବେ ତର୍ଜମା ପରେ ପ୍ରାର୍ଥୀ ବା ପ୍ରାର୍ଥିନୀଙ୍କର ଦଳୀୟ ଚୟନ କରାଯାଇଥିବା ସଫେଇ ଦିଆଯାଇଥିଲେ ହେଁ ,  ଟିକେଟ୍ ଦିଆଯିବାରେ ଅର୍ଥ ହିଁ ମାପକାଠି ବୋଲି ଚର୍ଚ୍ଚା ହେଉଛି । ତେବେ ଏହି ପ୍ରାର୍ଥୀଙ୍କ ଏଜେଣ୍ଡାରେ ପ୍ରଚୁର ଟଙ୍କା ଖଟାଇ ଜନହିତକର ଯୋଜନାରୁ ବିପୁଳ ବାଟମାରଣା ହିଁ ଅସଲ ଲକ୍ଷ୍ୟ ରହିଥିବା ସ୍ପଷ୍ଟ ଜଣାପଡୁଥିଲାବେଳେ , ସେମାନେ ଲୋକଙ୍କର ସେବାପାଇଁ ବାହାରିଥିବା ସଫେଦ୍ ଝୁଟ୍ କୁ ଲୋକେ ଯେ ବୁଝିପାରୁନାହାଁନ୍ତି , ଏହା ଭାବିବା ସେମାନଙ୍କର।ମସ୍ତବଡ ଭୁଲ୍ । 

ସେ ଯାହା ହେଉନା କାହିଁକି , ଏଥରର ପୌର ନିର୍ବାଚନରେ ସହରର  ନାଳନର୍ଦ୍ଦମାର ସଫେଇ , ରାସ୍ତାଘାଟର ଉନ୍ନତି , ସ୍ବଚ୍ଛତା , ପାନୀୟଜଳ , ଆଲୋକ , ସ୍ବାସ୍ଥ୍ୟ ଓ  ଲୋକଙ୍କର ମୌଳିକସମସ୍ୟାର ସମାଧାନ ନା ସୌନ୍ଦର୍ଯ୍ୟକରଣ ନାଁ'ରେ ଚାଲିଥିବା ନଗରଉନ୍ନୟନ ବିଭାଗର ଫମ୍ପା ସାଜସଜ୍ଜା ଓ  ଘରୋଇକରଣ ଆଳରେ ଲୋକଙ୍କଠାରୁ ଆହୁରି ଟ୍ୟାକ୍ସ ବା ଜିଜିୟାକର ଆଦାୟ ଏବେ ଥିବା ବର୍ଷାଧିକକାଳର ପ୍ରାଶାସନିକ କବ୍ଜା ପରି ଆଗାମୀ ନିର୍ବାଚିତ ପୌର ପ୍ରତିନିଧିମାନଙ୍କର ମୁଖ୍ୟ ଉଦ୍ଦେଶ୍ୟ ହେବ , ଦେଖିବାକୁ ବାକି ରହିଲା ବୋଲି ଲୋକେ ଆଲୋଚନା କରୁଛନ୍ତି ।