25-Feb-2022

ବଲାଙ୍ଗୀର( ମଳୟ ମିଶ୍ରଙ୍କ ରିପୋର୍ଟ ) :ଗତ ୧୨ ତାରିଖରେ ବୌଦ୍ଧ ଜିଲ୍ଲା କଣ୍ଟାମାଳ ଥାନା ଘଣ୍ଟାପଡା ଫାଣ୍ଡି ଅନ୍ତର୍ଗତ ଉଡେର ଗ୍ରାମର ପ୍ରାଥମିକ ସ୍କୁଲ୍ ଶିକ୍ଷକ ବାସୁଦେବ ଭୋଇ ତୁଷୁରା ଥାନା ଅଞ୍ଚଳର ସନ୍ଧିସରା ଗ୍ରାମର ତାଙ୍କର ଜଣେ ସମ୍ପର୍କୀୟ ଭାଇଙ୍କ ଘରକୁ ଆସି ପରଦିନ ୧୩ ତାରିଖରେ ନିକଟସ୍ଥ କର୍ଲାଖମନ ଗ୍ରାମକୁ ଜରୁରୀ କାମ ଥିବା କହି ଯିବାପରେ ନିଖୋଜ୍ ହୋଇଯାଇଥିଲେ । କର୍ଲାଖମନ ଗ୍ରାମରେ ତାଙ୍କ ପ୍ରେମିକାର ଘର । 

ତେବେ ସେ ଘରକୁ ନ ଫେରିବାରୁ ଓ ତାଙ୍କର କୌଣସି ଖୋଜ୍ ଖବର ନ ମିଳିବାରୁ ତାଙ୍କର ବିଧବାମାଆଙ୍କ ପକ୍ଷରୁ କଣ୍ଟାମାଳଥାନାରେ ଏକ ନିଖୋଜ୍ ଏତଲା ଦିଆଯାଇଥିଲା । ତେବେ ତାଙ୍କର ଅନ୍ୟତ୍ର ନିର୍ବନ୍ଧ ସରି ଆଗାମୀ ମାର୍ଚ୍ଚ ୯ ତାରିଖରେ ବିବାହ ହେବାର ଥିଲା ।  ତାଙ୍କର ପତ୍ତା ନ ମିଳିବାରୁ ସେ ପ୍ରେମିକାକୁ ଭେଟିବାକୁ ଯାଇ ତାଙ୍କ ଘରଲୋକଙ୍କ ଦ୍ବାରା ଯୋଜନାବଦ୍ଧ ହତ୍ୟାର ଶିକାର ହୋଇଥିବା ଅଞ୍ଚଳରେ ଚର୍ଚ୍ଚା ହୋଇଆସୁଥିଲା ।

ଗତ ୨୪ ତାରିଖରେ ତୁଷୁରା ଥାନା ଅନ୍ତର୍ଗତ ବୀରାମୁଣ୍ଡା ପଞ୍ଚାୟତ କର୍ଲାଖମନ ଗାଁ ପାଖ ରାହୁଲନଦୀ କୂଳ ବିରିଘାଟ ଜଙ୍ଗଲରେ ଏକ ଦରପୋଡା ଶବ ପଡିଥିବା ଖବରପାଇ ପୁଲିସ୍ ତଦନ୍ତ କରିବାରୁ ତାହା ଉକ୍ତ ଶିକ୍ଷକଙ୍କର ମୃତଦେହ ବୋଲି ତାଙ୍କ ଘରଲୋକେ ଆସି ଚିହ୍ନଟ କରିଥିଲେ । ବଲାଙ୍ଗୀର ସଦର ଏସ ଡିପିଓ ତୋଫାନ୍ ବାଗଙ୍କ ନେତୃତ୍ୱରେ ତୁଷୁରା ପୁଲିସ୍ ସଦଳବଳେ ବଲାଙ୍ଗୀରରୁ ସାଇଣ୍ଟିଫିକ୍ ଟିମ୍ ଓ ସନ୍ଧାନୀକୁକୁରର ସହାୟତାରେ ଅନୁସନ୍ଧାନ ଚଳାଇଥିଲେ । ପୁଲିସ୍ କୁକୁର କର୍ଲାଖମନ ଗ୍ରାମର ଉକ୍ତ ପ୍ରେମିକାର ଘରକୁ ଯିବାରୁ ପୁଲିସ୍ ଯୁବତୀଜଣକୁ ଥାନାରେ ଅଟକ ରଖି ପଚରାଉଚୁରା କରିଥିଲେ । ଶେଷରେ ଅଭିଯୁକ୍ତା ଯୁବତୀ ପ୍ରମଦା ବଗର୍ତ୍ତୀକୁ ପୁଲିସ୍ ଗିରଫ କରିଛି ।

ଆଜି ବଲାଙ୍ଗୀରଠାରେ ଅନୁଷ୍ଠିତ ଏକ ଆୟୋଜିତସାମ୍ବାଦିକ ସମ୍ମିଳନୀରେ ପୁଲିସ୍ ସୂଚନା ଦେଇଛି ଯେ , ଏହି ଯୁବତୀ ହିଁ ହତ୍ୟାକାରିଣୀ ଓ  ସେ ତାଙ୍କଘରଲୋକଙ୍କ ସହ ମିଶି  ଏକ ଧାରୁଆ ଅସ୍ତ୍ରରେ ବେକକୁ ହାଣିଦେବା ପରେ ପ୍ରମାଣ ନଷ୍ଟ କରିବାକୁ ଜଙ୍ଗଲକୁ ନେଇ ପୋଡିଦେବାର ଅପଚେଷ୍ଟା କରିଥିଲେ । ଏହି ହତ୍ୟାକାଣ୍ଡରେ ଯୁବତୀର କୁଲକୁସୁମ ଗ୍ରାମର ନିଜ ଭିଣେଇ ସମ୍ପୃକ୍ତ ରହିଥିବା ଓ ଫେରାର୍ ଥିବା ଏହି ସୂତ୍ରରୁ ଜଣାଯାଇଛି । ଥାନାରେ ଜେରାବେଳେ ଅଭିଯୁକ୍ତା ଯୁବତୀଜଣକ ଏହି ହତ୍ୟା କରିଥିବା ସ୍ବୀକାର କରିଥିବା ପୁଲିସ୍ ସୂତ୍ରରୁ ପ୍ରକାଶ । ଘଟଣାସ୍ଥଳରୁ କିଛି ଚୁଡି , ସିନ୍ଦୁର ଓ କୁକୁଡକଟା ଚାପଡ ଜବତ ହୋଇଥିବା ପ୍ରକାଶ ।  ତେଣୁ ପ୍ରେମରେ ପ୍ରତାରଣା କରି ଶେଷରେ ଅନ୍ୟଜଣକୁ ବିବାହ କରିବାକୁ ନିର୍ବନ୍ଧ ସାରି ପ୍ରସ୍ତୁତ ହେଉଥିବାରୁ କୌଶଳକ୍ରମେ ଡକାଇଆଣି ଚୁଡିସିନ୍ଦୁର ପିନ୍ଧାଇ ତତ୍କାଳ ବିବାହ କରିବାକୁ ବାଧ୍ୟ କରି ବିଫଳ ଓ ବଚସା ପରେ ଘରଲୋକ ବା ଆତ୍ମୀୟସ୍ବଜନଙ୍କ ସହାୟତାରେ  ସେହି ଗ୍ରାମରେ ନିର୍ମମ ଭାବରେ ତାଙ୍କୁ ହତ୍ୟା କରି ପ୍ରତିଶୋଧ ନେଇଥିବା କୁହାଯାଉଛି । ଘଟଣାଟି ବଲାଙ୍ଗୀର ଓ ବୌଦ୍ଧଜିଲ୍ଲାରେ ଚର୍ଚ୍ଚାର ବିଷୟ ହୋଇପଡିଛି ।