19-Feb-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ ) ଗତ ୧୮ ତାରିଖରେ ଟିଟିଲାଗଡ ପ୍ରଶାସନ ପକ୍ଷରୁ ଚଢାଉବେଳେ ସେଠାକାର ହାସପାତାଳ ପଛପଟ ସରକାରୀ କ୍ବାଟର୍ସ ଥିବା ପରିସରର ଜଣକଘରୁ ମଦ ଜବତ କଲାବେଳେ ମଦ ଇତ୍ୟାଦି ଅବକାରୀ ଦ୍ରବ୍ୟ ସହ ବିପୁଳ ପରିମାଣର ପିଡିଏସ୍ ଚାଉଳ ଜବତ କରାଯାଇଛି । ତେବେ ଉପଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜବତ ହୋଇଥିବା ଏହି ୧୫୦ ବସ୍ତା ଚାଉଳ ଓ କିଛିବସ୍ତା ଗହମ ଗରିବ ପରିବାରର ଏକ ଘରୁ ବାହାରିଥିବା ସହ ଏହା କାହାର , କେଉଁଠୁ ଚାଉଳ ଆଣି କିଏ ରଖିଥିଲା ; କିଛି ଜଣାପଡି ନଥିଲା ବୋଲି ଏକ ସମ୍ବାଦପତ୍ରରେ ପ୍ରକାଶ ପାଇଛି । ତେବେ ପ୍ରଶାସନ ପକ୍ଷରୁ ତଦନ୍ତ ଚାଲିଥିବା ମଧ୍ୟ ପ୍ରକାଶ । 

ଏହା 'ଧର୍ମକୁ ଆଖିଠାର ' ମାରିଲା ପରି ଏକ ଘଟଣା ଓ ଖବର !  ଉପଜିଲ୍ଲାପାଳଙ୍କ ସରକାରୀ କାର୍ଯ୍ୟାଳୟ , ଯୋଗାଣବିଭାଗ ଉପଖଣ୍ଡ କାର୍ଯ୍ୟାଳୟ , ଏସି ଏସ୍ ଓ ସରକାରୀ କ୍ବାଟର , ସୂଚନା ଭବନ ଓ ଅନ୍ୟାନ୍ୟ ବିଭାଗର କ୍ବାଟର୍ସ ରହିଥିବା ଏହି ଘରଟି କାହାର , ସେଠି ଆଗରୁ କଣ ଚାଲିଆସୁଛି ଓ ସମ୍ପୃକ୍ତ। ଯୁବକଜଣକ କାହାଲୋକ , ଏକଥା ଟିଟିଲାଗଡ ସହରବାସୀ , ପ୍ରଶାସନିକ ଅଧିକାରୀ ଓ ଗଣମାଧ୍ୟମର ପ୍ରତିନିଧିଙ୍କୁ  ଭଲଭାବରେ ଜଣା ।  ଦୀର୍ଘବର୍ଷ ଧରି ଯୋଗାଣବିଭାଗର ଜଣେ ସାମାନ୍ୟ ଅସ୍ଥାୟୀ ଭ୍ୟାନ୍ ଡ୍ରାଇଭରରୁ ଜିଲ୍ଲାର ଜଣେ ବରିଷ୍ଠ ବିଧାୟକଙ୍କ ବିଧାନସଭାରେ ଉପସ୍ଥାପିତ ଅଭିଯୋଗ ଅନୁଯାୟୀ ୫୦କୋଟିର ମାଲିକ ପାଲଟିଥିବା ଜଣେ ବହୁଚର୍ଚ୍ଚିତ ସରକାରୀ ଚାଉଳ ପରିବହନ ଏଜେଣ୍ଟ ଓ ମିଲ୍ ମାଲିକ ଏହି ସହରର ବାସିନ୍ଦା । ତାଙ୍କ ସହ ଉକ୍ତ ଗରିବ ଗୃହବାସୀଙ୍କର କୌଣସି ସମ୍ପୃକ୍ତି ଅଛି କି ନାଇଁ , ସମସ୍ତେ ଜାଣନ୍ତି । ଏହି ସହରରେ ସରକାରୀ ଚାଉଳ ଓ ଗହମର କାରବାର ରହିଥିବା ମହିଳା ଓ ଶିଶୁବିଭାଗ ମହିଳା ମନ୍ତ୍ରୀଙ୍କ ଘର । ତେବେ ଏହି ଚାଉଳ ବା ଗହମ କେଉଁ ବିଭାଗର ତଦନ୍ତ ପରେ ଜଣାପଡିବ । ଯେଉଁ ତଦନ୍ତ କେବେ ସରିବ , କେହି ଜାଣନ୍ତି ନାହିଁ ।  ସେହି ଚାଉଳରେ ଯୋଗାଣବିଭାଗ ବା ପିଡିଏସ୍  କିମ୍ବା କୌଣସି ଅଙ୍ଗନବାଡିର ଛତୁଆ ତିଆରି ହେଉଥିବା ଏସଏଚ ଜିର ଗହମ ର ଛାପ ମରାଯାଇନାହିଁ । ଏହା ଚିହ୍ନଟ ହେବା କାଠିକର ପାଠ ।

ଆଗରୁ ଏପରି ଜିଲ୍ଲାରେ ଚାଉଳ , ଗହମର ଧରପଗଡ ତଦନ୍ତର ଫଳାଫଳ ଫୁସ୍ ହେଇଯାଇଛି । କିଛିବର୍ଷ ତଳର ତୁଷୁରା , ସଇଁତଳାରୁ ଚୋରାଚାଲାଣ ହେଲାବେଳେ ବାଟରେ ଧରାପଡିଥିବା ଟ୍ରକ୍ ଟ୍ରକ୍ ଏସେନସିଆଲ୍ କମୋଡିଟି ବିଧିବଦ୍ଧ ପ୍ରମାଣିତ ହୋଇପାରିଥିବା ଜଣାଯାଇନାହିଁ । ସେତେବେଳେ ମଧ୍ୟ ଏହି ଏଜେଣ୍ଟଙ୍କ ନାଁ' ଚର୍ଚ୍ଚାକୁ ଆସିଥିଲା ।

ଚଳିତବର୍ଷ ଜିଲ୍ଲାର ବେଲପଡା ନିକଟସ୍ଥ ଶ୍ୟାମଜୀ ରାଇସ୍ ମିଲ୍ ନିକଟରୁ ୫୦୦ବସ୍ତା ଲୋଡ୍ ଏକ ଦଶଚକିଆ ଟ୍ରକ୍ କୁ ବେଲପଡା ପୁଲିସ୍ ଧରି ଦ୍ଇତିନିଦିନ ଥାନାରେ ଅଟକ ରଖିଥିଲା । ଯାହାକୁ ସ୍ଥାନୀୟ ଉପଜିଲ୍ଲାପାଳ ବନାମ ଜିଲ୍ଲା ପ୍ରଶାସନ ଓ ଯୋଗାଣବିଭାଗର କ୍ଲିନ୍ ଚିଟ୍ ପରେ ତାହା କଣ୍ଟାବାଞ୍ଜିର ଶ୍ୟାମଜୀ ଟ୍ରେଡର୍ସର ଚାଉଳ ଏବଂ ବାଟଭୁଲି ଡ୍ରାଇଭର ଟ୍ରକ୍ ଟିକୁ ସେପଟ ରାସ୍ତାକୁ ନେଇଯାଇଥିବା ହାସ୍ୟାସ୍ପଦ କୈଫିୟତ୍ ଦିଆଯାଇ ଛାଡିଦିଆଯାଇଥିଲା ।  ଆହୁରି ଅନେକ ଏପରି ଉଦାହରଣ ମଧ୍ୟ ରହିଛି । ସବୁ ଜାଣି ସୁଦ୍ଧା ଜିଲ୍ଲାର ନିର୍ବାଚିତ ଲୋକପ୍ରତିନିଧିମାନେ ଓ ଅଧିକାରୀମାନଙ୍କ ସହ ଜନସାଧାରଣ ନୀରବଦ୍ରଷ୍ଟା ପାଲଟିଛନ୍ତି । ତେଣୁ ଏ ଘଟଣାରେ ଏପରି ଖବରରେ , ' ଯେଉଁଠି ହାତୀ ଗଳିଯାଉଛି , ଏ ଛୁଞ୍ଚିମୁନକୁ ପଚାରେ କିଏ  ? 'ବୋଲି ଲୋକେ କଟାକ୍ଷ କରିଛନ୍ତି ।