30-Sep-2020

ବଲାଙ୍ଗିର,୩୦ା୯-ବଲାଙ୍ଗିର ସହରର ଭାଗିରଥୀ ଛକ ସ୍ଥିତ ଆଇ ଲଭ ବଲାଙ୍ଗିର ସେଲଫି ଜୋନରେ  ହୋଇଥିବା ଦୁର୍ନୀତିର ବିଭାଗୀୟ ପ୍ରଶାସନିକ ତଦନ୍ତ ଦାବିରେ ଏକ ତିନି ଜଣିଆ କମିଟି ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଏଥିରେ ବଲାଙ୍ଗିର ୟୁଥ୍ ଏକ୍ସନ କମିଟିର ସଭାପତି ବିନୋଦ କୁମାର କାଲସାଏ, ସୂଚନା ଅଧିକାର କର୍ମୀ ଶମ୍ଭୁ ପ୍ରସାଦ ଶତପଥୀ, କରଙ୍ଗା କଟା ବଞ୍ଚାଅ ଅଭିଯାନର ଆବାହକ ପ୍ରଶାନ୍ତ ମହାକୁର ଜିଲାପାଳ ଚଞ୍ଚଳ ରାଣାଙ୍କୁ ଭେଟି ତିନି ଦଫା ଦାବି ପତ୍ର ପ୍ରଦାନ କରିଥିଲେ । 
  ଜିଲାପାଳ ନିଜେ ପୌରପାଳିକାର ପ୍ରଶାସକ ଥିବା ବେଳେ  ପୌର ଅଇନ ଉଲଂଘନ ଜନିତ ଅଭିଯୋଗର ତଦନ୍ତ ପାଇଁ ତାଙ୍କୁ ନିବେଦନ କରିଥିଲା କମିଟି । ପ୍ରମୁଖ ଦାବି ମଧ୍ୟରେ ଏହାର ପ୍ରଶାସନିକ ତଦନ୍ତ କରାଯିବା ସହ ଦୋଷୀକୁ ଦଣ୍ଡ ଦିଆଯାଉ । ବିନା ଟେଣ୍ଡରରେ ଏହି କାର୍ଯ୍ୟ କିଭଳି କରାଗଲା ଜନସାଧାରଣରେ ପ୍ରକାଶ କରାଯାଉ । ସେଲଫି ଜୋନ ଆରମ୍ଭ ହେବାର ମାତ୍ର ଦୁଇ ମାସ ପରେ ଦୁଇ ମାସ ପରେ ଏଲଇଡି ଡିସପ୍ଲେ ବୋର୍ଡ ଅକାମୀ ହୋଇଗଲା । ଏତେ ଟଙ୍କା ଖର୍ଚ୍ଚ କରାଯାଇଥିଲେ ହେଁ କେଉଁ ପରିସ୍ଥିତିରେ ଓ କିଏ ଏଭଳି ନିମ୍ନମାନର ବୋର୍ଡ ଲଗାଇ ଆତ୍ମସାତ କଲା ତାର ଉପଯୁକ୍ତ ତଦନ୍ତ ସହ କାର୍ଯ୍ୟାନୁଷ୍ଠାନ । ନିର୍ବାଚିତ ପୌର ପରିଷଦ ଭାଙ୍ଗିବା ପରେ ଅନ୍ୟ ବହୁତ କାର୍ଯ୍ୟକୁ ବିନା ଟେଣ୍ଡରରେ କରାଯାଇଛି ସେଲଫି ଜୋନ କାର୍ଯ୍ୟାଦେଶରୁ ଜଣାପଡୁଛି । ଏହାର ତଦନ୍ତ ଦାବି କରିଛି କମିଟି । ଏହି ଭଳି ବେଆଇନ କାର୍ଯ୍ୟ ଆହୁରି ଅନେକ ଥିବା ବେଳେ ତାକୁ ବନ୍ଦ କରିବାକୁ ପୌର ପ୍ରଶାସକଙ୍କ ଠାରେ ଦାବି କରିଛି କମିଟି । 
  ତେବେ ଏଠି ସୂଚନା ଥାଉକି ଗତ ଦୁଇ ସପ୍ତାହ ପୂର୍ବେ ପୌର ଅଇନ ୧୯୫୩ ର ପାରା ନମ୍ବର ୩୩୭ ଓ ୩୩୮ ର ଉଲଂଘନ ଓ ସେଲଫି ଜୋନରେ ହୋଇଥିବା ଦୁର୍ନୀତିକୁ ନେଇ ସ୍ଥାନୀୟ ଗାନ୍ଧୀ ଭବନ ସମ୍ମୁଖରେ ଥିବା ଗାନ୍ଧୀ ମୂର୍ତ୍ତୀି ତଳେ ଶ୍ରୀ ମହାକୁର ଓ ଶ୍ରୀ ଶତପଥୀ ଧାରଣା ଦେଇଥିଲେ । କେବଳ ବନ୍ୟା, ବାତ୍ୟା, ଘରପୋଡି ଇତ୍ୟାଦି ସ୍ଥଳରେ ଜରୁରୀକାଳୀନ ଭାବେ ବିନା ଟେଣ୍ଡରରେ କାର୍ଯ୍ୟାଦେଶ ଦିଅଯାଇ ପାରିବ ବୋଲି ବ୍ୟବସ୍ଥା ରହିଛି । ଅନେକ କାର୍ଯ୍ୟରେ ଆଇନକୁ ଠକିଦେବା ପାଇଁ ବିଭିନ୍ନ ଠିକା କାର୍ଯ୍ୟକୁ ଭାଗ ଭାଗ କରାଯାଇ ପର୍ଯ୍ୟାୟ କ୍ରମେ ସମ୍ପନ୍ନ କରାଯାଇଛି । ଏହାର ତଦନ୍ତ କରି ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଦାବି ହେଉଛି ।