17-Feb-2022

ପଦ୍ମପୁର(ନିରଞ୍ଜନ ତ୍ରିପାଠୀ) ବରଗଡ଼ ଜିଲ୍ଲା ବିଜେପୁର ବ୍ଲକ ଯୋଖିପାଲି ଗ୍ରାମର ଜଣେ ଶିକ୍ଷକ ଦିବସ କୁମାର ସାହୁଙ୍କୁ ଦୁର୍ଘଟଣାରେ ଆହତ ହୋଇଥିବା ଦୁଇଜଣ ବାଇକ ଆରୋହୀଙ୍କୁ ଉଦ୍ଧାର କରିଥିବା ଯୋଗୁଁ ତାଙ୍କୁ ବିଦ୍ୟାଳୟ ଏବଂ ଗଣଶିକ୍ଷା ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ଉଚ୍ଚ ପ୍ରଶଂସା କରିଛନ୍ତି । ଏନେଇ ସୂଚନା ଏବଂ ଲୋକସମ୍ପର୍କ ବିଭାଗ ତରଫରୁ ଅଫିସିଆଲ ଫେସବୁକ ଏବଂ ଟ୍ୱିଟର ଆକାଉଣ୍ଟରୁ ପୋଷ୍ଟ କରିଛନ୍ତି ।
 ଏଠାରେ ସୂଚନାଯୋଗ୍ୟ ଯେ ଝାରବନ୍ଧ ବ୍ଲକ ତୁମୁରିପାଣି ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକତା କରୁଥିବା ଦିବସ କୁମାର ସାହୁ  ଡ୍ୟୁଟି ସାରି ପାଇକମାଲ ରୁ ନିଜ  ଘର ବିଜେପୁର ବ୍ଲକ ଯୋଖିପାଲି ଗ୍ରାମକୁ ଆସୁଥିବା ବେଳେ ରାସ୍ତା କଡ଼ରେ ଦୁର୍ଘଟଣାରେ ଆହତ ହୋଇ ମୂମୂର୍ଷୁ ଅବସ୍ଥାରେ ପଡିଥିବା ଦୁଇବ୍ୟକ୍ତିଙ୍କୁ ଉଦ୍ଧାର କରି ଡାକ୍ତରଖାନା ପହଞ୍ଚାଇଛନ୍ତି ।ଘଟଣାଟି ପାଇକମାଲ ବ୍ଲକ ଅନ୍ତର୍ଗତ ଗୋଇବାହାଲି ଛକ ପାଖାପାଖି ଏକ ଦୁର୍ଘଟଣା ଘଟିଥିଲା ଯେଉଁଥିରେ ଜଣେ ମହିଳାଙ୍କ ସମେତ ଦୁଇଜଣ ବ୍ୟକ୍ତି ଗୁରୁତର ଭାବେ ଆହତ ହୋଇଥିଲେ । ଦୁର୍ଘଟଣାଟି ବାଇକ ଆରୋହୀଙ୍କ ଆଖି ଲାଗିଯିବାରୁ ହୋଇଥିଲା,ଗାଡ଼ି ଚଳାଉଥିବା ବ୍ୟକ୍ତି ଜଣକ ପୂର୍ବଦିନ ରାତିରେ ଅନିଦ୍ରା ଥିବାରୁ ଗାଡ଼ି ଚଳେଇବା ବେଳେ ହଠାତ ଆଖି ଯାଇଥିବା କହିଛନ୍ତି । ଉକ୍ତ ବାଇକ ଆରୋହୀଙ୍କ ପଛପଟେ ଯାଉଥିବା ଶିକ୍ଷକ ଦିବସ କୁମାର ସାହୁ ହଠାତ ସାମ୍ନାରେ ଯାଉଥିବା ଗାଡ଼ି କୁଆଡ଼େ ଗଲା ବୋଲି ଅଟକି ଦେଖିବା ପରେ ଜାଣିବାକୁ ପାଇଥିଲେ ଯେ ଗାଡ଼ିଟି ଦୁର୍ଘଟଣା ଗ୍ରସ୍ତ ହୋଇଛି ଏବଂ ରାସ୍ତାର ବାମ ପାର୍ଶ୍ଵକୁ ପ୍ରାୟ ୨୦ ମିଟର ଦୂରରେ ଗାଡ଼ି ଅଲଗା ଏବଂ ଦୁଇଜଣ ଆରୋହୀ ଅଲଗା ଅଲଗା ପଡ଼ିଥିବା ଦେଖିଲେ । ସେ ତୁରନ୍ତ ଆହତ ମାନଙ୍କ ପାଖକୁ ଯାଇ ତାଙ୍କ ଅବସ୍ଥା ବୁଝିବା ସହ ୧୦୮ ଆମ୍ବୁଲାନ୍ସ କୁ ଯୋଗାଯୋଗ କରିଥିଲେ । ଏହାପରେ ରାସ୍ତାରେ ଯାଉଥିବା ୨ ଜଣ ଯୁବକଙ୍କୁ ଡାକି ଆମ୍ବୁଲାନ୍ସ ସହାୟତାରେ  ପଦ୍ମପୁର ଡାକ୍ତରଖାନାକୁ ନେଇଥିଲେ ।ଇତିମଧ୍ୟରେ ତାଙ୍କ ଘର ଘର ଲୋକଙ୍କୁ ଫୋନ ମାଧ୍ୟମରେ ଯୋଗାଯୋଗ କରି  ପଦ୍ମପୁର ଡାକ୍ତରଖାନାକୁ ଆସିବାକୁ କହିଥିଲେ ।ଡାକ୍ତରଖାନାରେ ଉଭୟ ଆହତଙ୍କୁ ସେବା ଶୁଶ୍ରୁଷା କରିବା ସହ ଆବଶ୍ୟକ ଇଞ୍ଜେକ୍ସନ ମଧ୍ୟ ନିଜେ କିଣି ଦେଇଥିଲେ ।ସୂଚନା ଅନୁଯାୟୀ ଦୁଇ ଆହତଙ୍କ ନାମ ସାବିତ୍ରୀ ମୁନା(୬୦) ଏବଂ ସୁଶାନ୍ତ ମୁନା (୩୮),ତାଙ୍କ ଘର ଝାରବନ୍ଧର ।ଉଭୟ ଆହତଙ୍କ ହାତ ଭାଙ୍ଗିଥିବା ଆଶଙ୍କା କରାଯାଉଛି ଦୁର୍ଘଟଣାରେ ଆହତ ବ୍ୟକ୍ତିଙ୍କ ପାଇଁ ଦୁର୍ଘଟଣା ପରବର୍ତ୍ତୀ କିଛି ଘଣ୍ଟାକୁ "ସୁନେଲି ସମୟ" କୁହାଯାଏ ଆଉ ଏହି ସମୟ ମଧ୍ୟରେ ଡାକ୍ତରଖାନାରେ ପହଞ୍ଚାଇବା ଦ୍ୱାରା ଜୀବନ ସୁରକ୍ଷିତ ହୋଇଥାଏ ।
 ଶିକ୍ଷକ ଦିବସଙ୍କ ଏହି ପ୍ରୟାସକୁ ବିଭିନ୍ନ ମହଲରେ ଉଚ୍ଚ ପ୍ରଶଂସା କରାଯାଇଛି ।