10-Feb-2022

ଭୁବନେଶ୍ୱର(ପ୍ରେରଣା ଖବର ବ୍ୟୁରୋ) : ପଞ୍ଚାୟତ ନିର୍ବାଚନ ପାଇଁ ଦଳୀୟ ନେତା ତଥା କର୍ମୀ ମାନେ ସିଧା ସଳଖ ପ୍ରଚାର ମଇଦାନ କୁ ଓହ୍ଲାଇ ନିର୍ବାଚନ ପ୍ରଚାର ରେ ଲାଗି ପଡିଲେଣି । ପଞ୍ଚାୟତ ନିର୍ବାଚନ ପରେ ପରେ ପୌର ନିର୍ବାଚନ ଅଛି । ଏଣୁ ସବୁ ଦଳ ପୌର ନିର୍ବାଚନ ପାଇଁ ମଧ୍ୟ ସଜବାଜ ହେଲେଣି । 
   ଆଜି ରାଜ୍ୟ ନିର୍ବାଚନ ଆୟୋଗ ଙ୍କ ଅଧ୍ୟକ୍ଷତା ରେ ଅନୁଷ୍ଠିତ ଆଗାମୀ ପୌର ନିର୍ବାଚନ ପାଇଁ ଆୟୋଜିତ ସର୍ବଦଳୀୟ ବୈଠକ ଶେଷ ହୋଇଛି । ରାଜ୍ୟ ର ତିନି ପ୍ରମୁଖ ଦଳ , ବିଜେପି, ବିଜେଡ଼ି, କଂଗ୍ରେସ ତଥା ଅନ୍ୟାନ୍ୟ ଦଳର ପ୍ରତିନିଧି ମାନେ ଏହି ବୈଠକରେ ଯୋଗ ଦେଇଥିଲେ । ଏହି ବୈଠକ ରେ ପୌର ନିର୍ବାଚନ ପ୍ରସ୍ତୁତି ସହ ଭୋଟର ତାଲିକା ସଂଶୋଧନ ନେଇ ଆଲୋଚନା ହୋଇଥିଲା । ତିନି ପ୍ରମୁଖ ଦଳର ପ୍ରତିନିଧି ମାନଙ୍କ ମଧ୍ୟରେ ବିଜେଡି ପକ୍ଷରୁ ଦଳର ମୁଖପାତ୍ର ସୁଲତା ଦେଓ,ବିଜେପି ପକ୍ଷରୁ ମିଡ଼ିଆ ସଂଯୋଜକ ଦିଲୀପ ମଲ୍ଲିକ ଏବଂ କଂଗ୍ରେସ ଦଳରୁ ଶିବାନନ୍ଦ ରାୟ ଯୋଗ ଦେଇଥିଲେ ।ବୈଠକ ପରେ ନିର୍ବାଚନ କମିଶନ ଆଦିତ୍ୟ ପ୍ରସାଦ ପାଢ଼ୀ ଭୋଟର ତାଲିକା ସଂଶୋଧନ,ପୌର ନିର୍ବାଚନ ପ୍ରସ୍ତୁତି ତଥା ରାଜନୈତିକ ଦଳ ମାନଙ୍କୁ ଅଧ୍ୟକ୍ଷ ଏବଂ ମେୟର ସିଧା ସଳଖ ଭାବେ ନିର୍ବାଚନ ହେବ ବୋଲି କହିଥିଲେ । ପୌର ନିର୍ବାଚନ ରେ କର୍ପୋରେଟର ଏବଂ କାଉନସିଲର ମାନଙ୍କ ଭୋଟ ଇଭିଏମ୍ ମେସିନ ରେ ହେବ । ପ୍ରତି ବୁଥ କୁ ଦୁଇ ଗୋଟି ଇଭିଏମ ମେସିନ ଯୋଗାଇଦେବା ସହ ନିର୍ବାଚନ ଖର୍ଚ୍ଚ ପୂର୍ବ ନିର୍ଦ୍ଧାରିତ ପ୍ରସ୍ତାବ ଅନୁଯାୟୀ ହେବ ବୋଲି କହିଥିଲେ । ପ୍ରାର୍ଥୀ ମାନେ ଶପଥ ପାଠ ନ ଦେଲେ ପ୍ରାର୍ଥୀପତ୍ର ନାକଚ ହେବ । ଏହି ସର୍ବଦଳୀୟ ବୈଠକରେ ବିଜେପି ପକ୍ଷରୁ ତିନି ଗୋଟି ଦାବି ଉପସ୍ଥାପନ ହୋଇଛି । ପ୍ରଥମେ ଭୋଟର ତାଲିକା ତ୍ରୁଟି ନେଇ ଆପତ୍ତି ଅଭିଯୋଗ ର ସମୟ ସୀମା ୬ ଦିନ ଥିବା ବେଳେ ୧୦ ଦିନକୁ ବୃଦ୍ଧି କରାଯିବା,ଦ୍ଵିତୀୟ ଦାବି ହେଉଛି କରାଯାଇଥିବା ଆପତ୍ତି ଅଭିଯୋଗ ର ଶୁଣାଣି ଏକ ଦିନ ପରିବର୍ତ୍ତେ ତିନି ଦିନ ହେବା,ତୃତୀୟ ଦାବି,ଦଳୀୟ ନେତା ଓ ପ୍ରାର୍ଥୀ ମାନଙ୍କ ମଧ୍ୟରେ ଦ୍ୱନ୍ଦ ନ କରିବାକୁ ଅଧିକାରୀ ମାନଙ୍କୁ ନିର୍ଦ୍ଦେଶ ଦେବାକୁ ଦାବି କରିଛନ୍ତି । କଂଗ୍ରେସ ପକ୍ଷରୁ ମଧ୍ୟ ଦାବି ଉପସ୍ଥାପନ କରାଯାଇଥିଲା । ନିକଟରେ ପଞ୍ଚାୟତ ନିର୍ବାଚନ ଥିବାରୁ ସର୍ବଦଳୀୟ ବୈଠକ କୁ ଘୁଞ୍ଚାଇବା ସହ ଭୋଟର ତାଲିକା ସଂଶୋଧନ ପଞ୍ଚାୟତ ନିର୍ବାଚନ ପରେ କରିବାକୁ କଂଗ୍ରେସ ପକ୍ଷରୁ ଦାବି ଉପସ୍ଥାପନ ହୋଇଛି । ବିଜେଡି ଦଳ ନିର୍ବାଚନ ଆୟୋଗ ଙ୍କ ସମସ୍ତ ସର୍ତ୍ତ କୁ ମାନି ନେଇଥିବା ବେଳେ,ପୌର ନିର୍ବାଚନ ଖରା ଦିନରେ ହେଉଥିବାରୁ କୋଭିଡ ନିୟମ ପାଳନ ସହ ପାନୀୟ ଜଳ ବ୍ୟବସ୍ଥା କରିବାକୁ ଶାସକ ବିଜେଡି ଦଳ ପକ୍ଷରୁ ଅନୁରୋଧ କରାଯାଇଛି ।