18-Jan-2022

ନୟାଗଡ, (ପ୍ରଦୀପ କୁମାର ପଣ୍ଡା): ଦୁଇବର୍ଷ ଧରି ବନ୍ଦ ରହିଥିବା ଶ୍ରୀରଘୁନାଥ ଜିଉଙ୍କ ହୁଣ୍ତି ଆଜି ମନ୍ଦିର ପ୍ରଶାସନ ତରଫରୁ ଖୋଲା ଯାଇଛି। ହୁଣ୍ତିରୁ ମୋଟ ୬ଲକ୍ଷ ୮ହଜାର ୯୪୫ଟଙ୍କା ଆଦାୟ ହୋଇଥିବା ମନ୍ଦିର ପକ୍ଷରୁ ସୂଚନା ମିଳିଛି।ଆଜି ମନ୍ଦିର ହୁଣ୍ତି ଖୋଲିବାକୁ ନିଷ୍ପତି ନେଇ ଦିନ ୧୨ଟା ସମୟରେ ହୁଣ୍ତି ତାଲା ଖୋଲା ଯାଇଥିଲା। ଦିନ ୧୨ଟା୩୦ ମିନିଟରୁ ଗଣତି କାର୍ଯ୍ୟ ଆରମ୍ଭ ହୋଇ ଦୀର୍ଘ ୯ ଘଣ୍ଟା କାଳ ଟଙ୍କା ଗଣତି ହୋଇଥିଲା। ହୁଣ୍ତିରୁ ନୋଟ ଆକାରରେ ମୋଟ ୫ଲକ୍ଷ ୮ହଜାର ୯୪୫ଟଙ୍କା ବାହାରିଥିବାବେଳେ ୧ଲକ୍ଷ ଟଙ୍କା କଏନ୍ ବାହାରିଥିବା ଦେବୋତ୍ତର ସୁପରଭାଇଜର ଜିତେନ୍ଦ୍ର

କୁମାର ମିଶ୍ର ସୂଚନା ଦେଇଛନ୍ତି। ଏହା ସହିତ ହୁଣ୍ତିରେ ଥିବା ଟଙ୍କାରୁ ପାଖାପାଖି ୯ହଜାର ଟଙ୍କା ନଷ୍ଟ ହୋଇଥିବା ଜଣାପଡିଛି। ରାତି ପର୍ଯ୍ୟନ୍ତ ଟଙ୍କା ଗଣତି ଚାଲିଥିବା ଦେଖିବାକୁ ମିଳିଛି। ଏହି ଗଣତି ସମୟରେ ଦେବୋତ୍ତର ମ୍ୟାନେଜର ତାପସ ପଟ୍ଟନାୟକ, ପୂଜକ ପରିଷଦ ସଭାପତି ପ୍ରଫୁଲ କୁମାର

ମହାପାତ୍ର, ପୂଜକ ପରିଷଦ ସଂପାଦକ ବିଜୟ କୁମାର ଦାଶ, ମନ୍ଦିର ପରିଛା ହରିବନ୍ଧୁ ଷଡ଼ଙ୍ଗୀ, ସୁଆର ପରିଷଦ ସଂପାଦକ କାର୍ତ୍ତିକ ଚନ୍ଦ୍ର ପଣ୍ତା, ମନ୍ଦିର ସୁପରଭାଇଜର ଜିତେନ୍ଦ୍ର କୁମାର ମିଶ୍ର, ତହସିଲ ଓ ପୁଲିସ କର୍ମଚାରୀମାନେ ଉପସ୍ଥିତ ଥିଲେ। ଏହି ଟଙ୍କା ଶ୍ରଦ୍ଧାଳୁମାନେ ଶ୍ରୀ ରଘୁନାଥ ଜିଉଙ୍କୁ ଦାନ ଆକାରରେ ପ୍ରଦାନ କରିଥିଲେ। କରୋନା ମହାମାରୀ ଯୋଗୁଁ ଗତ ଦୁଇବର୍ଷ ଧରି ଶ୍ରୀରଘୁନାଥ ଜିଉଙ୍କ ମନ୍ଦିର ହୁଣ୍ତି ଖୋଲା ଯାଇନଥିଲା।