11-Nov-2020

ବଲାଙ୍ଗୀର,(ପ୍ରେରଣା ଖବର) - ରାଜ୍ୟରେ ଚର୍ଚ୍ଚା ର ବିଷୟ ପାଲଟିଥିବା ସୁକତେଲ ପୋଲ ଭୁଶୁଡିବା ଘଟଣା ରେ ଏବେ ଭିଜିଲାନ୍ସ ଖୋଲିବ ପ୍ରକୃତ ରହସ୍ୟ । ନିମ୍ନ ମାନର କାର୍ଯ୍ୟ ସାଙ୍ଗକୁ ଯାନ୍ତ୍ରୀକ ତୃଟି ଯୋଗୁଁ ପୋଲର  ସ୍ପାନ ଭୁଷୁଡି ପଡିଲା । ଏହି ସ୍ପାନ ତଳେ ଚାପିହୋଇ ୨ ଜଣ ଶ୍ରମିକଙ୍କ ଜୀବନ ଚାଲିଯାଇଥିଲା । ଏହି ଶ୍ରମିକଙ୍କ ପରିବାର ଏବେ ଦୁଃଖ, କଷ୍ଟରେ ଜୀବନ ଅତିବାହିତ କରୁଅଛନ୍ତି।
ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଲକ ଅନ୍ତର୍ଗତ ସୁକତେଲ ପୋଲ ଭାଙ୍ଗିବା ଘଟଣାରେ ଲୋକାୟୁକ୍ତ ଭିଜିଲାନ୍ସ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ମଙ୍ଗଳବାର ବଲାଙ୍ଗୀର ଭିଜିଲାନ୍ସ ଡିଏସପି କାଦମ୍ବିନୀ ସାମଲ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।ତମିଆଁ ଓ ମୁଦଲସର ମଧ୍ୟରେ ଥିବା ସୁକ୍ତେଲ ପୋଲ ଗତ ଏପ୍ରିଲ ମାସ ୨୯ ତାରିଖରେ ମରାମତି କାର୍ଯ୍ୟ ଚାଲୁଥିବା ବେଳେ ଗୋଟିଏ ସ୍ପାନ ଭୁଷୁଡ଼ି ପଡିଥିଲା। ଫଳରେ ମରାମତି କାର୍ଯ୍ୟ ନିୟୋଜିତ ଥିବା ଶ୍ରମିକମାନଙ୍କ ମଧ୍ୟରୁ ୨ ଜଣ ଶ୍ରମିକଙ୍କର ମୃତ୍ୟୁ ଘଟିଥିଲା।
ଏହି ଘଟଣା ଘଟିବାର କିଛି ସମୟ ମଧ୍ୟରେ କାମ କରୁଥିବା କମ୍ପାନି ରାମ କୁମାର ଅଗ୍ରଓ୍ୱାଲ ପ୍ରାଇଭେଟ୍ ଲିମିଟେଡର ଜଣେ କର୍ମଚାରୀକୁ ଲରମ୍ଭା ଥାନାରେ ଅଟକ ରଖା ଯାଇଥିଲା। ୮ ଦିନ ଧରି ଅଟକ ରଖାଯାଇ କୋର୍ଟ ଚାଲାଣ କରିଥିବା ବେଳେ ଉକ୍ତ କର୍ମଚାରୀ ଜଣକୁ ଜାମିନ ମିଳିଥିଲା। ଏହା ପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଭୁବନେଶ୍ବରର ଦୁଇ ଜଣ ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରି ଫେରି ଯାଇଥିଲେ। ପୋଲ ଭାଙ୍ଗିବା ଘଟଣାକୁ ନେଇ ବାରମ୍ବାର ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା।

ଦୀର୍ଘ ଦିନ ପରେ କମ୍ପାନିକୁ କଳା ତାଲିକା ଭୁକ୍ତ କରିଥିଲେ ସରକାର। ଏହା ସହିତ ପାଟଣାଗଡ଼ ଗ୍ରାମ୍ୟ ଭନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ଆନ୍ଥୋନୀ କିଶାନଙ୍କୁ ନିଲମ୍ବିତ କରୁଥିଲା ବିଭାଗ। ହେଲେ ପୋଲ ନିର୍ମାଣ ସମୟରେ କାର୍ଯ୍ୟରତ ଥିବା ଯନ୍ତ୍ରୀମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ଯାଇ ନ ଥିଲା।ଦୀର୍ଘ ଦିନ ପରେ ଲୋକାୟୁକ୍ତ ଏହି ଘଟଣାର ଭିଜିଲାନ୍ସ ତଦନ୍ତ ନେଇ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶ ପାଇ ବଲାଙ୍ଗୀର ଭିଜିଲାନ୍ସ ଗତ ସେପ୍ଟେମ୍ବର ମାସ ୮ ତାରିଖରେ ଏକ ମାମଲା ରୁଜୁ କରିଥିଲା। ଘଟଣାର ତଦନ୍ତ କରିବା ପାଇଁ ଘଟଣାସ୍ଥଳରେ ବଲାଙ୍ଗୀର ଭିଜିଲାନ୍ସ ଡିଏସପି କାଦମ୍ବିନୀ ସାମଲ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି।
ପ୍ରଥମ ପର୍ଯ୍ୟାୟରେ ପୋଲ କାମ କରିଥିବା କମ୍ପାନିର ସଂଜୟ ଅଗ୍ରଓ୍ୱାଲ, ଗ୍ରାମ୍ୟ ଉନ୍ନୟନ ବିଭାଗର ପୂର୍ବତନ ନିର୍ବାହୀ ଯନ୍ତ୍ରୀ ବିଭୁଦେନ୍ଦ୍ର ମେହେର, ପାଟଣାଗଡ଼ ଗ୍ରାମ୍ୟ ଉନ୍ନୟନ ବିଭାଗର ତତ୍କାଳୀନ ନିର୍ବାହୀ ଯନ୍ତ୍ରୀ ଶୁଭେନ୍ଦୁ ମହାପାତ୍ର, ପୂର୍ବତନ ନିର୍ବାହୀ ଯନ୍ତ୍ରୀ ଆନ୍ଥୋନୀ କିଶାନଙ୍କ ନାମ ରହିଥିବା ଜଣାପଡିଛି।ଭିଜିଲାନ୍ସ ଡିଏସପି କାଦମ୍ବିନୀ ସାମଲ ତଦନ୍ତ କରିଥିବା ବେଳେ ତାଙ୍କୁ ପଚରାଯିବାରୁ ସେ, ତଦନ୍ତ କରାଯାଉଛି, ଭୁବନେଶ୍ୱରର ଟେକ୍ନିକାଲ ଟିମକୁ ଏ ନେଇ କହିବେ, ଟେକ୍ନିକାଲ ଟିମ ଆସି ଅଧିକ ତଦନ୍ତ କରିବ ବୋଲି ସେ କହିଥିଲେ।
ଏଠାରେ ପ୍ରକାଶ ଥାଉ କି, ତମିଆଁ – ମୁଦଲସର ମଧ୍ୟରେ ଥିବା ସୁକତେଲ ପୋଲ ପାଞ୍ଚ ବର୍ଷ ପୂର୍ବରୁ ୬ କୋଟିରୁ ଅଧିକ ଟଙ୍କା ବ୍ୟୟରେ ଏହି ସେତୁଟିର ନିର୍ମାଣ କରା ଯାଇଥିଲା। ହେଲେ ଏହାର ନିର୍ମାଣ କରିବା ଦିନ ଠାରୁ ନିମ୍ନମାନର କାମ ହେଉଥିବା ନେଇ ଅଭିଯୋଗ ହୋଇ ଆସୁଥିଲା।ପରେ ଦବି ଥିବା ସ୍ପାନ ରେ ମରାମତି ପାଇଁ ବିଭାଗ ପକ୍ଷରୁ ଉକ୍ତ କମ୍ପାନିକୁ ନିର୍ଦ୍ଦେଶ ଦିଆ ଯାଇଥିଲା। ମରାମତି କାମ ଚାଲୁଥିବା ସମୟରେ ଉକ୍ତ ସ୍ପାନ ଭୁଷୁଡି କାର୍ଯ୍ୟରେ ନିୟୋଜିତ ହେଇଥିବା ଶ୍ରମିକମାନଙ୍କ ମଧ୍ୟରୁ ୨ ଜଣ ଅଣ ଓଡିଆ ଶ୍ରମିକଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା। ଏହି ଘଟଣାଟି ସମଗ୍ର ରାଜ୍ୟରେ ଚହଳ ସୃଷ୍ଟି କରିଥିଲା। ବର୍ତ୍ତମାନ ଏହାର ଭିଜିଲାନ୍ସ ତଦନ୍ତ ଆରମ୍ଭ ହୋଇଥିବା ବେଳେ ଆଗକୁ ଏହି ତଦନ୍ତ କେତେଦୂର ଯିବ ତାହା ସମ୍ପୃକ୍ତ ଅଞ୍ଚଳବାସୀ ଅପେକ୍ଷା କରିଛନ୍ତି।