23-Dec-2021

ପାଟଣାଗଡ଼// ସରକାର ଗରିବ ନିରିହ ଲୋକଙ୍କ ରକ୍ଷଣାବେକ୍ଷଣ ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରିଛନ୍ତି। ହେଲେ ପ୍ରଶାସନିକ ଅଧିକାରୀ ମାନଙ୍କ ଅଣଦେଖା ଯୋଗୁଁ ଆଜି ଦିନରେ ମଧ୍ୟ ଲୋକମାନେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି।କାହା ପାଖରେ ରହିବାକୁ ଜାଗା ନାହିଁ ତ କିଏ ଗଣ୍ଡାଏ ଖାଦ୍ୟ ପାଇଁ ଆଉଟୁ ପାଉଟୁ ହେଉଥିବା ଦେଖିବାକୁ ମିଳେ। ବେଳେ ବେଳେ ଲୋକେ ଖାଇବାକୁ ନ ପାଇ ଅନାହାର ରେ ମୃତ୍ୟୁ ବରଣ କରୁଛନ୍ତି। ଏପଟେ ସରକାର ବାହାଦୁର କେହି ଭୋକିଲା ରହିବେ ନାହିଁ କି କାହାର ବାସଗୃହ ପାଇଁ ଚିନ୍ତା କରୁନ୍ତୁ ନାହିଁ ବୋଲି ନାରାବାଜି ଦେଉଛନ୍ତି। ସୂଚନା ଅନୁସାରେ ପାଟଣାଗଡ଼ ଉପଖଣ୍ଡ ଖପ୍ରାଖୋଲ ବ୍ଳକ ନାନ୍ଦୁପଲା ଗାଁ ରେ  ରୁହନ୍ତି ବିଲାସିନୀ ବେହେରା। ତିନି ଗୋଟି କୁନି କୁନି ଝିଅ କୁ ଧରି ସେ ଅତି ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି। ଗତ ବର୍ଷ ବାଇକ୍ ଦୁର୍ଘଟଣା ରେ ତାଙ୍କ ସ୍ବାମୀ ଆଶାଲାଲ ବେହେରା ମୃତ୍ୟୁ ବରଣ କରିଥିଲେ।ସେ ସିନା ଆରପାରିକୁ ଚାଲିଗଲେ ହେଲେ ବିଲାସିନୀ ଦେଇଗଲେ ଦୁଃଖ।୮ବର୍ଷ,୬ବର୍ଷ, ଓ ୨ ବର୍ଷ ର ତିନି ଝିଅଙ୍କୁ ନେଇ ବେଳେ ଖାଇ ବେଳେ ରହି ଦିନ କାଟୁଛନ୍ତି। ନାଁ ତାଙ୍କ ପାଖରେ ରହିବାକୁ ଘର ଖଣ୍ଡିଏ ଅଛି ନାଁ ବିଧବା ଭତ୍ତା ମିଳୁଛି।ସେ ଛୁଆ ମାନଙ୍କୁ ଧରି ଗାଁ ଦାଣ୍ଡରେ ଝାଡ଼ୁମାରି ଲୋକ ଙ୍କ ଠାରୁ କିଛି

ସହାୟତା ପାଇଥାନ୍ତି। ଘର ଖଣ୍ଡିଏ ନଥିବା ହେତୁ ନାନ୍ଦୁପଲା ସରପଞ୍ଚ ସୁରେଶ ପୂଜାରୀ ଙ୍କ ଆଶ୍ରୟ ନେଇ ବଞ୍ଚିଛନ୍ତି ।ସରପଞ୍ଚ ମଧ୍ୟ ଅନେକ ଥର ବିଧବା ଭତ୍ତା ପାଇଁ ବ୍ଳକ ପ୍ରଶାସନ ର ଅବଗତ କରାଇଥିଲେ ସୁଦ୍ଧା କୌଣସି ସୁଫଳ ମିଳିନାହିଁ।ସରପଞ୍ଚ ଆବାସ ଗୃହ ଟିଏ ଦେବାକୁ ଇଚ୍ଛୁକ କିନ୍ତୁ ଗୃହ ନିର୍ମାଣ କରିବା ପାଇଁ ତାଙ୍କ ପାଖରେ ଜାଗା ନାହିଁ। ଏଭଳି ପରିସ୍ଥିତି ରେ କେହି ସମ୍ପର୍କୀୟ ମାନେ ମଧ୍ୟ ସହଯୋଗ କରୁନାହିଁ ବୋଲି ସେ କୋହଭରା କଣ୍ଠରେ କହିଛନ୍ତି। ଏଭଳି ବେସାହାରା ବିଧବା ମହିଳା ଙ୍କୁ ଜିଲ୍ଲାପାଳ ମହୋଦୟ ଦୃଷ୍ଟି ଆକର୍ଷଣ କରି ସୁବ୍ୟବସ୍ଥା କରନ୍ତୁ ବୋଲି ଅଞ୍ଚଳବାସୀ ଦାବି କରିଛନ୍ତି।