10-Dec-2021

ନୟାଗଡ଼, (ପ୍ରଦୀପ କୁମାର ପଣ୍ଡା)ନୟାଗଡ଼ ସହରକୁ ସ୍ୱଚ୍ଛତା ରଖିବାକୁ ଭିନ୍ନ ଏକ ପଦକ୍ଷେପ ଆପଣେଇଛନ୍ତି ନୟାଗଡ଼ ବିଧାୟକ ତଥା ରାଜ୍ୟ କୃଷି, ମତ୍ସ୍ଯ ଓ ପଶୁପାଳନ,  ଉଚ୍ଚଶିକ୍ଷା ମନ୍ତ୍ରୀ ଡ଼ ଅରୁଣ କୁମାର ସାହୁ । ଆସନ୍ତାକାଲି ସଂଗୀତ ମାଧ୍ୟମରେ ସହରବାସୀଙ୍କୁ ଶପଥ ପାଠ କରାଇବେ ମନ୍ତ୍ରୀ ଡ଼ ସାହୁ । ନୟାଗଡ଼ ପୌର ପରିଷଦ ପକ୍ଷରୁ ସ୍ୱଚ୍ଛ ସଂଗୀତ ଉନ୍ମୋଚନ ଓ ଶପଥ ଗ୍ରହଣ ଉତ୍ସବ ଆସନ୍ତାକାଲି ସକାଳ ୮ଘଟିକା ସମୟରେ ନୟାଗଡ଼ ପୁରୁଣା ବସଷ୍ଟାଣ୍ଡ ଠାରେ ଅନୁଷ୍ଠିତ ହେବ । ଏଥି ସହିତ ପୌରାଞ୍ଚଳ ମଧ୍ୟରେ ପୁରୁଣା ବସଷ୍ଟାଣ୍ଡ ଛକ ଠାରେ ଉନ୍ନତମାନର ପରିସ୍ରାଗାର ଉଦଘାଟନ ହେବାର କାର୍ଯ୍ୟକ୍ରମ ରହିଛି । ରାସ୍ତା, ଡ୍ରେନ୍, ସାହି, କଲୋନୀ, ପୁଷ୍କରିଣୀ, ପାର୍କ, ବଜାର, ଜନ ଗହଳି ପୂର୍ଣ୍ଣ ସର୍ବସାଧାରଣ ସ୍ଥାନ ଓ ନିଜ ଘରର ପରିବେଶକୁ ପରିଷ୍କାର ପରିଛନ୍ନ ରଖିବା । ଗୃହପାଳିତ ପଶୁମାନଙ୍କୁ ରାସ୍ତା ଉପରକୁ ଛାଡିବା ନାହିଁ । ବାଲି, ଗୋଡ଼ି, ପଥର ଓ ଅନ୍ୟାନ୍ୟ ଅଦରକାରୀ ଜିନିଷକୁ ରାସ୍ତା ଉପରେ ରଖି ଅବରୋଧ କରିବା ନାହିଁ । ବରିଷ୍ଠ ନାଗରିକ ଓ ଗୁରୁଜନ ମାନଙ୍କୁ ସମ୍ମାନ ଦେଇ ଉତ୍ତମ ବ୍ୟବହାର ପ୍ରଦର୍ଶନ କରିବା । ପ୍ରତ୍ୟେକ ଦିନ ଘରୁ ବାହାରୁଥିବା ବର୍ଯ୍ୟବସ୍ତୁକୁ ପୃଥକ ଭାବେ ପକାଇବା ପାଇଁ ଶପଥ ପାଠ କରାଯିବ । ଉକ୍ତ କାର୍ଯ୍ୟକ୍ରମରେ ସମ୍ମାନୀତ ଅତିଥି ଭାବେ ନୟାଗଡ଼ ଜିଲ୍ଲାପାଳ ଡ଼ ପୋମା ଟୁଡୁ ଉପସ୍ଥିତ ରହିବେ । ପୌର ପରିଷଦ ପକ୍ଷରୁ ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ଉପସ୍ଥିତ ରହିବେ | ଉକ୍ତ କାର୍ଯ୍ୟକ୍ରମ ରେ ସହର ବାସୀ ଉପସ୍ଥିତ ରହିବାକୁ ମନ୍ତ୍ରୀ ଆହ୍ୱାନ ଦେଇଛନ୍ତି |