05-Dec-2021

ରେଢାଖୋଲ, ( ଅନିଲ କୁମାର ପୃଷ୍ଟି ) ସମ୍ବଲପୁର ଜିଲ୍ଲା ରେଢାଖୋଲ ଥାନା ଅଞ୍ଚଳରେ ଦିନକୁ ଦିନ ଚୋରି ଘଟଣା ବଢ଼ିବାରେ ଲାଗିଛି।  ଏପରିକି ଦୀର୍ଘ ଦିନ ହେଲା ଲୁଟେରାଙ୍କ ଦୌରାତ୍ମ ଚରମ ସୀମାରେ ପହଞ୍ଚିଛି।   ଏପରିକି  ରେଢାଖୋଲ ଉପଖଣ୍ଡ ଓ   ରେଢାଖୋଲ ସହର ଅଞ୍ଚଳରେ ସ୍ପଷ୍ଟ ଦିବଲୋକରେ ଚୋରି ଓ ଲୁଟ ଆଦି ଘଟଣା ବଢି ବଢି ଚାଲିଛି। ଫଳରେ ସାଧାରଣ ଲୋକେ ଭୟଭୀତ ହେବା ସହିତ ଅସୁରକ୍ଷିତ ମନେ କରୁଛନ୍ତି । ହେଲେ ଗତ ମଙ୍ଗଳବାର ଦିନ ରେଢାଖୋଲ ସହର କଳିନ୍ଦର ବୁର୍ଡ। ରାସ୍ତାର ଅଵସର ପ୍ରାପ୍ତ ଶିକ୍ଷକ ରମେଶ ପ୍ରଧାନଙ୍କ ଘରୁ ସ୍ପଷ୍ଟ ଦିବା ଲୋକରେ ତଥା  ପୂର୍ବାହ୍ନ ପ୍ରାୟ ୧୦ ଟା ବେଳେ  ଘରର ଟାଇଲସ ଓ ଗୋଡ଼ ମୁଦି ସଫା କରିବା ଆଳ ଦେଖାଇ ୨ ଜଣ  ଦୁର୍ବୃତ୍ତ ଜଣେ ମହିଳାଙ୍କ ଠାରୁ ୨ ଲକ୍ଷ ଟଙ୍କାର ସୁନା ଗହଣା ଲୁଟ କରି ଚମ୍ପଟ ମାରିଥିବା ବେଳେ ଉକ୍ତ ମଙ୍ଗଳବାର ରାତିରେ ରେଢାଖୋଲ ଥାନା କେନ୍ଦୁକଟା ଗ୍ରାମର ବୃଷବ ପ୍ରଧାନଙ୍କ କିରାନା  ଦୋକାନରୁ ୪ ହଜାର ଟଙ୍କା ଓ ଅନାନ୍ୟ ଜିନିଷ ପତ୍ର ସବୁ ଚୋରି ହୋଇ ଯାଇ ଥିବା ନେଇ ରେଢାଖୋଲ ଥାନାରେ ଲିଖିତ ଅଭିଯୋଗ ହୋଇ ଥିଲା। ହେଲେ ଏହି ଚୋରି ଘଟଣାର ଠିକ ୪ ଦିନ ପରେ ପୁଣି ରେଢାଖୋଲ ସହର ଦେହୁରୀ ସାହି କାଠ ଡିପୋ ପାଖରେ  ଜଣେ ଭଡାରେ ରହୁଥିବା ବ୍ୟକ୍ତିଙ୍କ ଘରୁ କବାଟ ତାଲା ଭାଙ୍ଗି ନଗଦ ଟଙ୍କା ଓ ସୁନା ଗହଣା ଚୋରି ହୋଇ ଥିବା ନେଇ ରେଢାଖୋଲ ଥାନାରେ ଲିଖିତ ଅଭିଯୋଗ ହୋଇଛି। ଜଣା ଯାଇଛି ଯେ ଅନୁଗୋଳ ଜିଲ୍ଲା ରାଜକିଶୋରନଗର ବ୍ଲକ ଉସକାପାଲି ଗ୍ରାମର ମୂଳ ବାସିନ୍ଦା ବିନୟ କୁମାର ସାହୁ (୩୦) ଦୀର୍ଘ ବର୍ଷ ହେଲା ରେଢାଖୋଲ ସହରରେ ରହି ଆସିବା ସହିତ  ଗତ ୩ ମାସ ହେଲା ରେଢାଖୋଲ ସହରର ଦେହୁରୀସାହି କାଠ ଡିପୋ ପାଖରେ ଭଡାରେ ରହୁ ଅଛନ୍ତି।ବିନୟ ଡ୍ରାଇଭର ଭାବରେ ଏକ ବେସରକାରୀ ଠିକା ସଂସ୍ଥା ଯୁଜୁମୁରାରେ  କାମ କରୁ ଅଛନ୍ତି। ସେ ଯୁଜୁମୁରା ଠାରେ ରହିବା ସହିତ ମଝିରେ ମଝିରେ ରାତି ଘରକୁ ଆସନ୍ତି। ଚୋରି ଘଟଣା ରାତିରେ ସେ ରେଢାଖୋଲ ଆସି ନ ଥିଲେ। ସେହିପରି ଡ୍ରାଇଭର ବିନୟଙ୍କ ପତ୍ନୀ  ଝୁନି ସାହୁ ନିଜ ବାପ ଘର ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ ଘୋଷରାମାଳ ପଞ୍ଚାୟତ ବ୍ରାହ୍ମଣୀ ଗ୍ରାମକୁ କୌଣସି ଜରୁରୀ କାମରେ ଶୁକ୍ରବାର ଦିନ ବେଳେ ଯାଇ ରାତି ଆଉ ରେଢାଖୋଲ ଭଡା ଘରକୁ ଫେରି ନ ଥିଲେ। ହେଲେ ଘରେ କେହି ନ ଥିବା ସୁଯୋଗ ନେଇ କେହି ଦୁର୍ବୃତ୍ତ ଘର କବାଟର ତାଲା ଭାଙ୍ଗି ଘରେ ଭାନୀଟି ବ୍ୟାଗରେ ଥିବା ୫୬ ହଜାର ଟଙ୍କା , ମଙ୍ଗଳସୁତ୍ର ଓ କାନ ଫୁଲ ଆଦି ସୁନା ଗହଣା ଆଦି ଚୋରି କରି ନେଇ ଥିବା ନେଇ ରେଢାଖୋଲ ଥାନାରେ ଲିଖିତ ଅଭିଯୋଗ କରାଯାଇଛି। ଚୋରି ମଙ୍ଗଳସୁତ୍ର ୩୫ ହଜାର ଟଙ୍କା ଓ କାନ ଫୁଲର ମୂଲ୍ୟ ୨୦ହଜାର ଟଙ୍କା  ବୋଲି ପରିବାର ଲୋକେ ପ୍ରକାଶ କରିଛନ୍ତି। ଚୋରି ଟଙ୍କା ଓ ଗହଣା ର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ଜଣା ଯାଇଛି।ରେଢାଖୋଲ ଥାନା ଅଞ୍ଚଳ ରେ ଦିନକୁ ଦିନ ଚୋରି, ଲୁଟ ଘଟଣା ଆଦି ବଢି ଚାଲି ଥିବା ବେଳେ ପୋଲିସ ପକ୍ଷରୁ ବିଶେଷ ପଦକ୍ଷେପ ନିଆ ଯାଉ ନ ଥିବା ଲୋକେ ଅଭିଯୋଗ କରୁଅଛନ୍ତି। ୫ ଦିନ ମଧ୍ୟରେ ରେଢାଖୋଲ ସହର ଅଞ୍ଚଳରେ ସ୍ପଷ୍ଟ ଦିବା ଲୋକ ଓ ରାତିରେ ଚୋରି ଘଟଣା ବଢୁ ଥିବାରୁ ଲୋକେ ଆତଙ୍କିତ ହୋଇ ପଡୁଛନ୍ତି। ଏପରିକି ପୋଲିସ ବିଭିନ୍ନ  ଚୋରି ଘଟଣା ଉପରେ ଆବଶ୍ୟକ ପଦକ୍ଷେପ ନେଉ ନ ଥିବାରୁ ପୋଲିସ ଉପରୁ  ଲୋକଙ୍କ ଭରସା ତୁଟିବାରେ ଲାଗିଛି। ଏ ସଂକ୍ରାନ୍ତରେ ରେଢାଖୋଲ ଥାନା ଅଧିକାରୀ ସୁରୁବାବୁ ଛତ୍ରିଆଙ୍କୁ ଯୋଗାଯୋଗ କରା ଯିବାରେ ଆଜିର ଦେହୁରୀ ସାହିରେ ହୋଇ ଥିବା ଚୋରି ଘଟଣା ଉପରେ ତଦନ୍ତ କରା ଯାଇଛି। ଚୋରି ଘଟଣା ଉପରେ ପଦକ୍ଷେପ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି।