04-Dec-2021

ପୁରୀ(ସମୀର ରଞ୍ଜନ ନାୟକ )ବଙ୍ଗୋପ ସାଗର ଅଞ୍ଚଳରେ ସୃଷ୍ଟ ବାତ୍ୟା ଜୱାଦ ମୁକାବିଲାକୁ ନେଇ ଜିଲ୍ଲା ପ୍ରଶାସନ  ପ୍ରସ୍ତୁତ ହୋଇ ରହିଛି । ଜୱାଦର ପ୍ରକୋପ ହ୍ରାସ ହେବା ଆଶା କରାଯିବା ପରେ ସ୍ଥାନାନ୍ତରିତ ପ୍ରକ୍ରିୟା ସାମୟିକ ଭାବେ ସ୍ଥଗିତ ରହିଛି । ମାତ୍ର ବର୍ଷା ହେବାର ଆଶଙ୍କା ଥିବାରୁ ସମସ୍ତ ୧୭୦ଟି ବାତ୍ୟା ଓ ବନ୍ୟା   ଆଶ୍ରୟସ୍ଥଳୀ ଏବଂ ୪୦୦ଟି ଅସ୍ଥାୟୀ ଆଶ୍ରୟସ୍ଥଳୀକୁ ଜରୁରୀ ନିମନ୍ତେ ପ୍ରସ୍ତୁତ ରଖାଯାଇଛି ।  ଉପକୂଳବର୍ତ୍ତି ୨୦ଟି ପଞ୍ଚାୟତର ୫୨ଟି  ଗ୍ରାମର ଲୋକଙ୍କୁ ଆଶ୍ରୟସ୍ଥଳୀରେ ରଖାଯାଇଛି । ୧୦ଟି ସ୍ଥାନରେ ମାଗଣା ରନ୍ଧା ଖାଦ୍ୟ ଯୋଗାଇ ଦିଆଯାଇଛି । ଜିଲ୍ଲାପାଳ ଶ୍ରୀ ସମର୍ଥ ବର୍ମାଙ୍କ ପରାମର୍ଶ କ୍ରମେ ବରିଷ୍ଠ ଅଧିକାରୀ ମାନେ ଆଜି ସକାଳେ ବିଭିନ୍ନ ବ୍ଲକ ଗସ୍ତ କରି ସ୍ଥାନାନ୍ତରଣ ପ୍ରକ୍ରିୟା ଓ ପରିସ୍ଥିତିର ଅନୁଧ୍ୟାନ କରିଥିଲେ । ଅତିରିକ୍ତ ଜିଲ୍ଲାପାଳ ଶ୍ରୀ ବିନୟ କୁମାର ଦାଶ ଗୋପ ଓ କୋଣାର୍କ, ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଶ୍ରୀ ଜ୍ୟୋତି ଶଙ୍କର ମହାପାତ୍ର କାକଟପୁର ଓ ଅସ୍ତରଙ୍ଗ, ସ୍ବତନ୍ତ୍ର ଭୂଅର୍ଜନ ଅଧିକାରୀ ଶ୍ରୀ କୈଳାଶ ଚନ୍ଦ୍ର ନାୟକ ବ୍ରହ୍ମଗିରି ଓ କୃଷ୍ଣପ୍ରସାଦର ୭ଟି ପଞ୍ଚାୟତ, ଅତିରିକ୍ତ ଜିଲ୍ଲାପାଳ ଶ୍ରୀ ସୁଭାଷ ଚନ୍ଦ୍ର ନାଥଶର୍ମା ପିପିଲି ଓ ଡେଲାଙ୍ଗ, ଉପ ଜିଲ୍ଲାପାଳ ଶ୍ରୀ ଭବତାରଣ ସାହୁ ନିମାପଡା ଓ ସତ୍ୟବାଦୀ, ପିକେଡିଏ ସଚିବ ଶ୍ରୀ ଲଲାଟେନ୍ଦୁ ସାହୁ କଣାସ ଏବଂ ଭୂଅର୍ଜନ ଅଧିକାରୀ ଶ୍ରୀ ପ୍ରଶାନ୍ତ କୁମାର ଜେନା ଚିଲିକା ମଧ୍ୟସ୍ଥ କୃଷ୍ଣପ୍ରସାଦର ୧୪ଟି ପଞ୍ଚାୟତ, ଅତିରିକ୍ତ ଜିଲ୍ଲାପାଳ ଶ୍ରୀ ପ୍ରଦୀପ କୁମାର ସାହୁ ଓ ଜିଲ୍ଲା ଆପଦକାଳୀନ ଅଧିକାରୀ ଶ୍ରୀ ଜିତେନ୍ଦ୍ର କୁମାର ପାତ୍ର ଜିଲ୍ଲା ମୁଖ୍ୟାଳୟ ଠାରେ ରହି ପରିସ୍ଥିତିର ଅନୁଧ୍ୟାନ କରିଥିଲେ । ସମସ୍ତ ବ୍ଲକରେ ପର୍ଯ୍ୟାପ୍ତ ପରିମାଣର ଚୁଡା, ଗୁଡ, ବିସ୍କୁଟ ଆଦି ଶୁଖିଲା ଖାଦ୍ୟ, ପାନୀୟ ଜଳ, ଔଷଧ, ପଶୁ ଖାଦ୍ୟ ପର୍ଯ୍ୟାପ୍ତ ପରିମାଣରେ ମହଜୁଦ ହୋଇ ରହିଛି । ଏନଡିଆରଏଫ୍, ଓଡ୍ରାଫ, ଅଗ୍ନିଶମ, ବିଦ୍ୟୁତ, ଗ୍ରାମ୍ୟ ଉନ୍ନୟନ, ପୂର୍ତ୍ତ ବିଭାଗ ଓ  ଡାକ୍ତରୀ ଦଳ ସଜାଗ ହୋଇ ରହିଛନ୍ତି । ଜିଲ୍ଲାର ବିଭିନ୍ନ ବ୍ଲକର ୨୭୫ ଜଣ ଆସନ୍ନା ପ୍ରସବା ମାନଙ୍କ ମଧ୍ୟରୁ ୧୫୪ ଜଣ ବିଭିନ୍ନ ଡାକ୍ତରଖାନାରେ ପ୍ରସବ ଦେଇଥିବା ବେଳେ ୪୧ ଜଣଙ୍କୁ ବିଭିନ୍ନ ଡାକ୍ତରଖାନରେ ଏବଂ ଅନ୍ୟମାନଙ୍କୁ ସୁରକ୍ଷିତ ସ୍ଥାନରେ ରଖାଯାଇଛି ।   ଜିଲ୍ଲାରେ ୩୦ ହଜାର ହେକ୍ଟର ଜମିରେ ଅମଳ ଶସ୍ୟକୁ କ୍ଷେତରୁ ନେଇ ସୁରକ୍ଷିତ ସ୍ଥାନରେ ରଖାଯାଇଛି । ଆଜି ଜିଲ୍ଲାରେ ହାରାହାରି ବୃଷ୍ଟିପାତ ୪୦ ମିଲି ମିଟର ରହିଥିବାରୁ ବିଶେଷ କ୍ଷତି ହୋଇନଥିବା ଜିଲ୍ଲା ମୁଖ୍ୟ କୃଷି ଅଧିକାରୀ ଶ୍ରୀ ଅନିଲ ଚନ୍ଦ୍ର ଦାସ କହିଛନ୍ତି । ଏଥିନିମନ୍ତେ ବ୍ୟାପକ ବନ୍ଦୋବସ୍ତ କରାଯାଇଥିବା ସେ ଜଣେଇଛନ୍ତି ।