04-Dec-2021

କଟକ : ମାହାଙ୍ଗା ଡବଲ ମର୍ଡର ଘଟଣା ଦିନକୁଦିନ ରୋଚକ ମୋଡ଼ ନେଉଛି। ଏହି ମାମଲାରେ ପୁଲିସ ବାରମ୍ବାର ସମୟ ମାଗୁଥିବାବେଳେ ଶୁକ୍ରବାର ଦିନ କୋର୍ଟଙ୍କ ନିର୍ଦ୍ଦେଶ ଅନୁସାରେ ତଦନ୍ତକାରୀ ଅଧିକାରୀ ତଥା ମାହାଙ୍ଗା ଥାନା ଅଧିକାରୀ ଅଦାଲତରେ ହାଜର ‌ହୋଇନାହାନ୍ତି। ଗତକାଲି ଏହି ମାମଲାରେ ସାଲେପୁର ଜେଏମ୍‌ଏଫ୍‌ସି ଅଦାଲତ ମାହାଙ୍ଗା ଥାନା ଆଇଆଇସି ତଥା ଘଟଣାର ତଦନ୍ତକାରୀ ଅଧିକାରୀଙ୍କୁ ଶୁକ୍ରବାର ବ୍ୟକ୍ତିଗତ ଭାବେ ହାଜର ହେବାକୁ ନିର୍ଦ୍ଦେଶ ଦେଇଥିଲେ। ତେବେ, ଶୁକ୍ରବାର ଦିନ ଥାନା ଆଇଆଇସି ତଥା ତଦନ୍ତକାରୀ ଅଧିକାରୀ ନିହାର ରଞ୍ଜନ ମହାନ୍ତି କୋର୍ଟରେ ହାଜର ନହୋଇ ନିଜେ ଏକ ଆବେଦନ ମାଧ୍ୟମରେ ଅଦାଲତଙ୍କୁ ଅବଗତ କରାଇଛନ୍ତି ଯେ, ଏହି ଘଟଣା ରାଜ୍ୟସ୍ତରକୁ ଯାଇଛି, ରାଜ୍ୟସ୍ତରରେ ଆଲୋଚନା ହେବା ପରେ କେସ୍ ଡାଏରି ଦାଖଲ କରାଯିବ। ଆବେଦନରେ ଉଲ୍ଲେଖ ରହିଥିଲା, ଏଥିପାଇଁ ତାଙ୍କୁ ଅଧିକ ମହଲତ ପ୍ରଦାନ କରାଯାଉ। ତଥା ତା’ ପୂର୍ବରୁ ବ୍ୟକ୍ତିଗତ ହାଜିରାରୁ ତାଙ୍କୁ ଛାଡ଼ କରାଯାଉ। ସରକାରଙ୍କ ତରଫରୁ ମାମଲା ପରିଚାଳନା କରୁଥିବା ଅତିରିକ୍ତ ପବ୍ଲିକ୍ ପ୍ରସିକ୍ୟୁଟରଙ୍କ ମାଧ୍ୟମରେ ମାମଲାରେ ପକ୍ଷ ରଖିବାକୁ ତାଙ୍କୁ ଅନୁମତି ଦିଆଯାଉ ବୋଲି ଆବେଦନରେ ଦର୍ଶାଯାଇଥିଲା। ଏ ନେଇ ଏତଲାକାରୀ ରମାକାନ୍ତ ବରାଳଙ୍କ ପକ୍ଷରୁ ମାମଲା ପରିଚାଳନା କରୁଥିବା ଆଇନଜୀବୀ ପ୍ରବୀଣ କାନ୍‌ନ୍‌ଗୋ ସୂଚନା ଦେଇଛନ୍ତି। ଏହି ପିଟିସନ୍ ଉପରେ ଅଦାଲତ ଶୁଣାଣି କରିଥିବା ବେଳେ ରାୟ ପ୍ରକାଶ ପାଇବ।

ଡବଲ ମର୍ଡର ଘଟଣାକୁ ୨୦୨୨, ଜାନୁଆରି ୨ତାରିଖରେ ଏକ ବର୍ଷ ପୂରିବ। ଏଭଳି ଏକ ସମ୍ବେଦନଶୀଳ ମାମଲାରେ ନାଁ ତଦନ୍ତର ସାନି ସ୍ଥିତିକୁ ନେଇ ପୁଲିସ ଅଦାଲତଙ୍କୁ ଅବଗତ କରୁଛି ନା ଅଦାଲତଙ୍କ ପୂର୍ବ ନିର୍ଦ୍ଦେଶ ଅନୁସାରେ ସିଡିଆର୍‌ ଦାଖଲ କରୁଛି ନା କୋର୍ଟଙ୍କ ବ୍ୟକ୍ତିଗତ ହାଜର ହେବା ‌ନୋଟିସ୍‌କୁ ପୁଲିସ ମାନୁଛି। ବରଂ ବାରମ୍ବାର ସମୟ ମାଗୁଛି। ଯାଫଳରେ ଏଭଳି ଏକ ସମ୍ବେଦନଶୀଳ ଘଟଣାର ତଦନ୍ତ କେମିତି ଚାଲିଛି ତାକୁ ନେଇ ସବୁ ମହଲରେ ପ୍ରଶ୍ନବାଚୀ ସୃଷ୍ଟି ହେଲାଣି।ସୂଚନା ଅନୁଯାୟୀ, ପୁଲିସ ତଦନ୍ତ ପ୍ରକ୍ରିୟାକୁ ନେଇ ବିଭିନ୍ନ ସମୟରେ କୋର୍ଟ କ୍ଷୁବ୍‌ଧ ହୋଇଥିବା ବେଳେ ଏ ଦିଗରେ ତୁରନ୍ତ ପଦକ୍ଷେପ ନେଇ ନଭେମ୍ବର ୨୯ ତାରିଖ ସୁଦ୍ଧା କୋର୍ଟରେ କାର୍ଯ୍ୟାନୁଷ୍ଠାନ ରିପୋର୍ଟ, ସାନି କେସ୍ ଡାଏରି ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ପୁଲିସ ଉକ୍ତ ଦିନ ଏହି ମାମଲାରେ ଅଧିକ ଏକ ମାସ ସମୟ ଦରକାର ବୋଲି ଟାଇମ୍‌ ପିଟିସନ୍‌ ଦାଖଲ କରିଥିଲା। ସେହିଦିନ ବିଚାରପତି ଅନୁପସ୍ଥିତ ଥିବାରୁ ମାମଲାର ଶୁଣାଣି ହୋଇ ପାରି ନଥିଲା। ଫଳରେ ଗତକାଲି ମାମଲାର ଶୁଣାଣି ଥିବା ବେଳେ ଥାନା ଆଇଆଇସିଙ୍କୁ ବ୍ୟକ୍ତିଗତ ଭାବେ ହାଜର ରହିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। କିନ୍ତୁ ଥାନା ଆଇଆଇସି ବ୍ୟକ୍ତିଗତ ଭାବେ ହାଜର ନହୋଇ ଏହି ଘଟଣା ରାଜ୍ୟ କମିଟିକୁ ଆଲୋଚନା ପାଇଁ ଯାଇଥିବା କଥା ଦରଖାସ୍ତ ମାଧ୍ୟମରେ କୋର୍ଟଙ୍କୁ ଜଣାଇବା ସହ ସମୟ ମାଗିବା ଘଟଣାକୁ ନେଇ ସାଧାରଣରେ ଆଲୋଚନା ଆରମ୍ଭ ହୋଇଛି।
୨୦୨୧ ଜାନୁଆରି ୨ ତାରିଖରେ ବିଜେପି ନେତା କୁଳମଣି ବରାଳ ଓ ତାଙ୍କ ସହଯୋଗୀ ଦିବ୍ୟସିଂହ ବରାଳଙ୍କୁ ହତ୍ୟା ଘଟଣାରେ ବାପି ବିଶ୍ବାଳ, ମାହାଙ୍ଗା ପଞ୍ଚାୟତ ସମିତି ଅଧ୍ୟକ୍ଷ ଶରତ ନାୟକ ଏବଂ ପ୍ରାଣ ହରାଇଥିବା ଅନ୍ୟତମ ଅଭିଯୁକ୍ତ ପ୍ରଫୁଲ୍ଲ ବିଶ୍ବାଳଙ୍କ ସମେତ ଅନ୍ୟ ଅଭିଯୁକ୍ତଙ୍କ ମୋବାଇଲ୍ ଫୋନ୍ ତଥ୍ୟ (ସିଡିଆର୍) ସଂଗ୍ରହ କରି ରଖିବାକୁ କୋର୍ଟ ନିର୍ଦ୍ଦେଶ ଦେଇଥିଲେ। ଡିସେମ୍ବର ୨୦୨୦ରୁ ଫେବ୍ରୁଆରି ୨୦୨୧ ପର୍ଯ୍ୟନ୍ତ ଉକ୍ତ ୩ଜଣଙ୍କ ସମେତ ମାମଲାର ପ୍ରମୁଖ ସାକ୍ଷୀ ଓ ସମସ୍ତ ଅଭିଯୁକ୍ତଙ୍କ ସିଡିଆର ସଂଗ୍ରହ କରି ସଂରକ୍ଷିତ ରଖିବା ପାଇଁ କୋର୍ଟ ମାହାଙ୍ଗା ଥାନା ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ।

ପୁଲିସ ଚାର୍ଜସିଟ୍‌ରୁ ମନ୍ତ୍ରୀ ପ୍ରତାପ ଜେନାଙ୍କ ନାମ ବାଦ୍‌ ଦେବା ପରେ ଏହାକୁ ନେଇ ଅସନ୍ତୋଷ ପ୍ରକାଶ କରି ମୃତ କୁଳମଣି ବରାଳଙ୍କ ପୁଅ ରମାକାନ୍ତ ବରାଳ ଅଦାଲତଙ୍କ ଦ୍ବାରସ୍ଥ ହୋଇଥିଲେ। ମନ୍ତ୍ରୀ ପ୍ରତାପ ଜେନାଙ୍କର ଏହି ହତ୍ୟା ଷଡ଼ଯନ୍ତ୍ର ପଛରେ ହାତ ରହିଛି ଏବଂ ବାପି ବିଶ୍ବାଳ ଓ ମାହାଙ୍ଗା ବ୍ଲକ୍‌ ଅଧ୍ୟକ୍ଷ ଶରତ ନାୟକ ମନ୍ତ୍ରୀଙ୍କ ଘନିଷ୍ଠ ହୋଇଥିବା ବେଳେ ମୃତ ପ୍ରଫୁଲ୍ଲ ବିଶ୍ବାଳଙ୍କ ସିଡିଆର ଯାଞ୍ଚରୁ ତଥ୍ୟ ସାମନାକୁ ଆସିବ ବୋଲି ରମାକାନ୍ତ କୋର୍ଟରେ ଆବେଦନ କରିଥିଲେ।
ଅନ୍ୟପକ୍ଷରେ, ଆଇଆଇସି କାହା ବଳରେ ବଳୀୟାନ ବୋଲି ଏବେ ସାଧାରଣରେ ଚର୍ଚ୍ଚା ଆରମ୍ଭ ହୋଇଛି।