01-Sep-2021

ଜଗତସିଂହପୁର(ନୃସିଂହ ବାରିକ) :-ଭାରତୀୟ ତୈଳ ନିଗମର ପାରାଦ୍ବୀପ ତୈଳ ବିଶୋଧନାଗାର ପ୍ରକଳ୍ପ ଟ୍ରକ ପରିବହନ ବନ୍ଦ କରିଥିବାରୁ ଟ୍ରକ ମାଲିକମାନେ ଆର୍ଥିକ ଅନାଟନ ମଧ୍ୟରେ ଦିନ କାଟୁଛନ୍ତି । ପୁନଶ୍ଚ ଟ୍ରକ ପରିବହନ ଚାଲୁ ରଖିବା ପାଇଁ କମ୍ପାନୀକୁ ଲିଖିତ ଅନୁରୋଧ କରିଥିଲେ । ମାତ୍ର କମ୍ପାନୀ ଏହାକୁ ଗୁରୁତ୍ୱ ନଦେବାରୁ ପାରାଦ୍ବୀପ ଟ୍ରକ ମାଲିକ ସଂଘ, ଜଗନ୍ନାଥ ଟ୍ରକ ମାଲିକ ସଂଘ ଏବଂ ଜଗତସିଂପୁର ଟ୍ରକ ମାଲିକ ସଂଘ ମିଳିତ ଭାବେ ପ୍ରତିବାଦ  ସ୍ବରୂପ ମଙ୍ଗଳବାରଠାରୁ ଧାରଣାରେ ବସି ରହିଛନ୍ତି । ସୂଚନା ଯୋଗ୍ୟ ଆଇଓସିଏଲ କମ୍ପାନୀ ଯେବେଠୁ ପେଟ୍ରୋ କୋକ୍ ଉତ୍ପାଦନ ଆରମ୍ଭ କଲା ଦୈନିକ ୩୦୦ ରୁ ୪୦୦ ଟ୍ରକ ରୋଡ ପରିବହନ ପାଇଁ

ଆବଶ୍ୟକ କରୁଥିଲା। ଏଥିପାଇଁ ନୂତନ ଟ୍ରକ ନେସନାଲ୍ ପରମିଟ ଥାଇ ଯୋଗାଇ ଦେବାକୁ କହିଲା। କାରଖାନା ପାଇଁ ଜମି ହରାଇ ଥିବା ଚାଷୀ ପରିବାରର ଯୁବକମାନେ ବ୍ୟାଙ୍କ ଲୋନ୍ ରେ ନୂଆ ଟ୍ରକ କିଣି କମ୍ପାନୀ ପରିବହନରେ ଲଗାଇଲେ । ସବୁକିଛି ସ୍ବଭାବିକ ଥିଲା। ପରବର୍ତ୍ତୀ ସମୟରେ ରେଲ ସଂଯୋଗ କମ୍ପାନୀର ହେବାରୁ ରେଲ ପରିବହନ ଉପରେ ଅଧିକ ଗୁରୁତ୍ୱ ଦେଲା ଆଇଓସିଏଲ । ତଥାପି ପ୍ରତି ମାସରେ ୭୦/୮୦ ହଜାର ମେଟ୍ରିକ ଟନ୍ ରୋଡ ପରିବହନ ଅକସନ କମ୍ପାନୀ କରୁଥିଲା । କରୋନା ମହାମାରୀରେ ୨୦୨୦ ମସିହା ମାର୍ଚ୍ଚ ମାସରୁ ଟ୍ରକ ପରିବହନ ବନ୍ଦ ରଖିଛି । କମ୍ପାନୀ କର୍ତ୍ତୃପକ୍ଷ ପୂର୍ବାପେକ୍ଷା ରୋଡ ଅକସନ କରି ମାସିକ ୭୦/୮୦ ହଜାର  ମେଟ୍ରିକ ଟନ୍ ପେଟ୍ରୋ କୋକ୍ ପରିବହନ ସୁଯୋଗ ଦିଅନ୍ତୁ ବୋଲି ଟ୍ରକ ମାଲିକ ସଂଘ ଦାବୀ କରୁଛି । କମ୍ପାନୀ ଏହି ଦାବୀ ମାନି ନନେଲେ ପାରାଦ୍ବୀପର ୩ ଟି ଟ୍ରକ ମାଲିକ ସଂଘ ଧାରଣାରୁ ଓହରିବ ନାହିଁ ବୋଲି ପିଟିଏ ର ସଭାପତି ଶୈଳ ଜେନା ସୂଚନା ଦେଇଛନ୍ତି ।