21-Jul-2021

  ନୟାଗଡ଼(ପ୍ରଦୀପ କୁମାର ପଣ୍ଡା): ଉକୃଷ୍ଟମାନର ଆମ୍ବ ଚାଷ କରି ଆତ୍ମନିର୍ଭରଶୀଳ ହେବା ସହ ଜଣେ ସଫଳ ଆମ୍ବ ଚାଷୀ ଭାବେ ବଡ଼ଶିଲିଙ୍ଗା ପଞ୍ଚାୟତ ପୁରୁଣାପାଣି ଗ୍ରାମର ଦିବ୍ୟାଙ୍ଗ ଶଙ୍କର ଜାନୀ ଉକୃଷ୍ଟ ଅବଦାନ ପୁରସ୍କାର ପାଇଛନ୍ତି । ରାଷ୍ଟ୍ରୀୟ କୃଷି ଏବଂ ଗ୍ରାମ୍ୟ ବିକାଶ ବ୍ୟାଙ୍କ(ନାବାର୍ଡ଼)ର ୪୦ତମ ପ୍ରତିଷ୍ଠା ଦିବସରେ ମଙ୍ଗଳବାର ନୟାଗଡ଼ ଜିଲ୍ଲାପାଳଙ୍କ କାର୍ଯ୍ୟାଳୟ ସଭାଗୃହ ପରିସରରେ ଶଙ୍କରଙ୍କୁ ଏହି ପୁରସ୍କାର ପ୍ରଦାନ କରାଯାଇଛି । ଭିଡିଓ କନଫରେନସିଂ ମାଧ୍ୟମରେ ରାଜ୍ୟପାଳ ପ୍ରଫେସର ଡଃ.ଗଣେଶୀ ଲାଲ ଶଙ୍କରଙ୍କୁ ଏହି ପୁରସ୍କାର ପ୍ରଦାନ କରିବା ସହ ଶଙ୍କର ଦିବ୍ୟାଙ୍ଗ ହୋଇ ବି ଅନ୍ୟମାନଙ୍କ ପାଇଁ ଉଦାହରଣ ପାଲଟିôଥିବାରୁ ରାଜ୍ୟପାଳ ବେଶ୍ ପ୍ରଶଂସା କରିଥିଲେ । ଏହି କାର୍ଯ୍ୟକ୍ରମରେ ଉପଜିଲ୍ଲାପାଳ ଲଗ୍ନଜିତ ରାଉତ, ନାବାର୍ଡ଼ ଡିଜିଏମ୍ ଜୟନ୍ତ ସାହୁ ଓ ଜିୟୁସିର ସମ୍ପାଦକ ଆନନ୍ଦ ଚନ୍ଦ୍ର ବେହେରା ଉପସ୍ଥିତ ରହିଥିଲେ ।

ଘଞ୍ଚଜଙ୍ଗଲ ଘେରା ଆଦିବାସି ଅଧ୍ୟୁଷିତ ବଡ଼ଶିଲିଙ୍ଗା ପଞ୍ଚାୟତର ୩୩ ଟି ଗ୍ରାମର ୬ ଶହ ପରିବାରକୁ ଆର୍ଥିକ ସ୍ୱାବଲମ୍ବୀ କରିବା ପାଇଁ ନାବାର୍ଡ଼ ସହାୟତାରେ ଗଣିଆ ଉନ୍ନୟନ କମିଟି ତରଫରୁ ୱାଡ଼ି ଯୋଜନା ଆମ୍ବ, କାଜୁ ଓ ଶାଗୁଆନ ଗଛ ଲଗାଇବା ପାଇଁ ସହାୟତା ପ୍ରଦାନ କରାଯାଇଥିଲା । ତେବେ ଶଙ୍କର ନିଜର ୧ ଏକର ଜମିରେ ଉନ୍ନତ ମାନର ଆମ୍ବ୍ରପଲ୍ଲୀ ଆମ୍ବ ଓ କାଜୁ ଚାଷ କରି ତାର ରକ୍ଷଣାବେକ୍ଷଣ କରିବା ସହ ଗତ ୨୦୧୬ ମସିହା ପରଠାରୁ ଭଲ ଆମ୍ବ ଅମଳ କରିଛନ୍ତି । ଜଣେ ଦୃଷ୍ଟିହୀନ ଦିବ୍ୟାଙ୍ଗ ହେଲେ ମଧ୍ୟ ଶଙ୍କର ଉନ୍ନତମାନର ଚାଷ କାମ କରି ଜଣେ ସଫଳ ଚାଷୀ ଭାବେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ଅନ୍ୟପରି ସେ ଚାଷ କାର୍ଯ୍ୟ କରି ନିଜର ପୁଅକୁ ଯୁକ୍ତ ୩ କଳା ବିଭାଗରେ ପାଠ ପଢାଇବାରେ ସକ୍ଷମ ହୋଇପାରିଛନ୍ତି । ଶଙ୍କର ଜାନୀଙ୍କ ଏଭଳି ସଫଳତା ବଡ଼ଶିଲିଙ୍ଗା ପଞ୍ଚାୟତ ତଥା ଗଣିଆ ବ୍ଳକ ବାସୀଙ୍କ  ପାଇଁ ସ୍ୱତନ୍ତ୍ର ଉଦାହରଣ ପାଲଟିବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଚାଲିଛି l