07-Jul-2021

ବିନିକା (ହିମାଂଶୁ ଶେଖର ପୁଟେଲ) : ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ଓ ଭତ୍ତା ଟଙ୍କା ପ୍ରଦାନରେ ଅନିୟମିତତାକୁ ନେଇ ଆଜି ଯୁବ ଆଇନଜୀବୀ ତଥା ସୁବର୍ଣ୍ଣପୁର ଜିଲ୍ଲା ବିଜେପି ଯୁବମୋର୍ଚ୍ଚା ପୂର୍ବତନ ସଭାପତି ପ୍ରଶାନ୍ତ ଚନ୍ଦ୍ର ଦଣ୍ତସନାଙ୍କ ନେତୃତ୍ୱରେ ଏକ ପ୍ରତିନିଧି ଦଳ ବିନିକା ଏନଏସି ସମ୍ଭୁଖରେ ପ୍ରତିବାଦ କରି ସୁବର୍ଣ୍ଣପୁର ଜିଲ୍ଲାପାଳ ଅବୋଳି ସୁନିଲ ନରୱନେଙ୍କ ଉଦ୍ଦେଶ୍ୟରେ ଏକ ଦାବିପତ୍ର ସହକାରୀ ଯନ୍ତ୍ରୀ ରତ୍ନାକର ଗାଇଗରିଆଙ୍କ ଜରିଆରେ ପଠାଇଛନ୍ତି l ସୂଚନା ଯୋଗ୍ୟ ଯେ ବିନିକା ବିଜ୍ଞାପିତ ପରିଷଦ ତଥା ବ୍ଲକ ଅଞ୍ଚଳର ଗରିବ ଶ୍ରେଣୀର ଲୋକମାନଙ୍କ ପାଇଁ କେନ୍ଦ୍ର ସରକାର ଘର ଯୋଗାଇ ଦେଉଛନ୍ତି l ହେଲେ କେତେକ କର୍ମଚାରୀ ହିତାଧିକାରୀଙ୍କ ଠାରୁ ୫ରୁ୧୦ହଜାର ପର୍ଯ୍ୟନ୍ତ ଵୈଆଇନ ଭାବରେ ଲାଞ୍ଚ ନେଉଥିବାର  ବିଷୟ ସାମନାକୁ ଆସୁଥିବା ବେଳେ ଗରିବ ହିତାଧିକାରୀ କର୍ମଚାରୀଙ୍କ ଧମକରେ ଉଚ୍ଚପଦସ୍ଥ ଅଧିକାରୀଙ୍କ ଠାରେ ଅଭିଯୋଗ କରିବାର ସାହାସ କରିପାରୁ ନାହାନ୍ତି l ଯତ ଫଳରେ ସେମାନେ ଘର ଝଣ୍ଡେ ପାଇଁ ଶୋଷଣର ଶିକାର ହେଉଛନ୍ତି ଏବଂ ଯିଏ ଲାଞ୍ଚ ଦେଇ ନ ପାରିଲା ତାର ଘର ପାଇବାରେ ବିଳମ୍ବ ହେବାସହ ଘର ବିଲ କରିବାରେ ମଧ୍ୟ ଜାଣିଶୁଣି ହଇରାଣ କରାଯାଉଛି l

ଅନ୍ୟପକ୍ଷରେ ସରକାରଙ୍କ ତରଫରୁ ବୃଦ୍ଧବୃଦ୍ଧା ଙ୍କ ଭତ୍ତା ଟଙ୍କା ଠିକ ଭାବରେ ଆସୁଥିଲେ ମଧ୍ୟ ଏହି ପରିଷଦରେ ବୁଢ଼ାବୁଢ଼ୀ ଙ୍କୁ ଭତ୍ତା ଟଙ୍କା ବଣ୍ଟନରେ ଅନିୟମିତତା କରାଯାଉଥିବାରୁ ସେମାନଙ୍କ ଗୁଜୁରାଣ ମେଣ୍ଟାଇବା ଓ ଚଲିବା କଷ୍ଟସାଧ୍ୟ ହୋଇପଡିଛି ବୋଲି ଦାବିପତ୍ରରେ ସେମାନେ ଦର୍ଶାଇଛନ୍ତି l ତେଣୁ ଉପରୋକ୍ତ ସମସ୍ତ ବିଷୟକୁ ତଦନ୍ତ ପରିସରକୁ ନେଇ ଲାଞ୍ଚ ନେଉଥିବା ସରକାରୀ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି l ଏହି ଦାବିପତ୍ର ବେଳେ ବିନିକା ବିଜେପି ପୂର୍ବତନ ନଗର ସଭାପତି ସମ୍ବିତ ନେପାକ,କେଶରୀୟା  ହିନ୍ଦୁ ବାହିନୀର ଉପସଭାପତି ଶମ୍ଭୁପ୍ରସାଦ ହୋତା,ମକୁନ୍ଧ ମେହେର,ବିଜୟ ବେହେରା, ରଞ୍ଜିତ ପଣ୍ଡା,ସତ୍ୟନାରାୟଣ ବଢେଇ,ପ୍ରେମାନନ୍ଦ ପଣ୍ଡା,ସୁନିଲ ସେଠୀ,ସୁଶାନ୍ତ କୁମ୍ଭାର ପ୍ରମୁଖଙ୍କ ସମେତ ବହୁ ହିତାଧିକାରୀ ସାମିଲ ହୋଇଥିଲେ l