30-Jun-2021

ବଲାଙ୍ଗିର,(ପ୍ରେରଣା ଖବର): ଆଜି ତରଭା ବ୍ଲକ ଅନ୍ତର୍ଗତ ଦେଉଳପଦର ପ୍ରାଥମିକ ସ୍କୁଲର ସହକାରୀ ଶିକ୍ଷକ ସଂକର୍ଷଣ ପଣ୍ଡା ଅବସର ନେଇଛନ୍ତି । ସେଥିପାଇଁ ସ୍କୁଲରେ ଶିକ୍ଷକ ଓ ପରିଚାଲକନା କମିଟି ତରଫରୁ ତାଙ୍କୁ ଭବ୍ୟ ସଂବର୍ଦ୍ଧନା ଦିଆଯାଇଛି । ସ୍କୁଲର ପ୍ରଧାନଶିକ୍ଷକ ନବୀନକୁମାର ପଣ୍ଡାଙ୍କ ପୌରୋହିତ୍ୟରେ ଅନୁଷ୍ଠିତ ସଂବର୍ଦ୍ଧନା ସଭାରେ ମୁଖ୍ୟଅତିଥି ଭାବରେ ପୂର୍ବତନ ପ୍ରଧାନଶିକ୍ଷକ ଚୈତନ୍ୟ ବାରିକ ଯୋଗଦେଇ ଶ୍ରୀ ପଣ୍ଡାଙ୍କୁ ମାନପତ୍ର ଓ ଉପଢୋକନ ଦେଇ ସଂବର୍ଦ୍ଧିତ କରିଥିଲେ । ଶ୍ରୀ ପଣ୍ଡା ରାଜପାଲି ଗ୍ରାମର ମୂଳନିବାସୀ ହୋଇଥିବା ବେଳେ  ଜଣେ ମେଧାବୀ ଭାବରେ ଛାତ୍ରବୃତ୍ତି ପାଇ ସୋନପୁର ମହାରାଜା ହାଇସ୍କୁଲ ଓ ପରେ ସୋନପୁର କଲେଜ ଓ ସିଟିସ୍କୁଲରେ ଶିକ୍ଷାଲାଭ କରି ଚାକିରୀ ଜୀବନ ଆରମ୍ଭ କରିଥିଲେ । ତରଭା ଚାରଭଟା ନିକଟସ୍ଥ ବିଲେଇବେର୍ଣ୍ଣା ପ୍ରାଥମିକ ସ୍କୁଲରୁ ଚାକିରିଜୀବନ ଆରମ୍ଭ କରି ଶେଷରେ ଦେଉଳପଦର ସ୍କୁଲରୁ ଅବସର ନେଇଛନ୍ତି । ଜଣେ ଛାତ୍ରବତ୍ସଳ ଶିକ୍ଷକ ଭାବରେ ସେ ସମସ୍ତଙ୍କ ହୃଦୟରେ ସ୍ଥାନ ପାଇଛନ୍ତି ବୋଲି ଉପସ୍ଥିତ ଶିକ୍ଷକମାନେ ମତ ଦେଇଥିଲେ ।