18-Jun-2021

ବଲାଙ୍ଗିର,(ପ୍ରେରଣା ଖବର)- ଆଜି ଅଖିଳ ଭାରତୀୟ ଅଣ ସଂଗଠିତ ଶ୍ରମିକ କଂଗ୍ରେସ ର ରାଜ୍ୟ ଅଧ୍ୟକ୍ଷ ବିଦ୍ୟାଧର ମହାନ୍ତି ତଥା ଜାତୀୟ ସଭାପତି ଅରବିନ୍ଦ ସିଂହଙ୍କ ନିର୍ଦ୍ଦେଶ କ୍ରମେ ବିଶ୍ୱ ମହାମାରୀ କରୋନା ଯୋଗୁଁ ସମଗ୍ର ଦେଶ ତଥା ରାଜ୍ୟରେ ବାରମ୍ବାର ବର୍ଷାଧିକ କାଳ ତାଲାବନ୍ଦ ପରିସ୍ଥିତି ହେତୁ ଅନେକ ଅମୁଲ୍ୟ ଧନଜୀବନ କ୍ଷୟକ୍ଷତି ସହିତ ସାଧାରଣ ଜୀବନ ଜୀବିକା ବିପର୍ଯ୍ୟସ୍ତ ହୋଇଯାଇଛି । ଫଳରେ ଅଣ ସଂଗଠିତ କ୍ଷେତ୍ରରେ କାର୍ଯ୍ୟରତ ଶ୍ରମିକ, ନିର୍ମାଣ ଶ୍ରମିକ, ପ୍ରବାସୀ ଶ୍ରମିକ, ଅଟୋ, ରିକ୍ସା, ଟେକ୍ସି ଚାଳକ, ବୁଲା ବିକାଳି, ଉଠା ଦୋକାନୀ ତଥା ଚାଷୀ ମୁଲିଆଙ୍କ ଜୀବନ ଜୀବିକା ସମ୍ପୁର୍ଣ୍ଣ ଠବ୍ ହୋଇଯାଇଛି । ତେଣୁ ଅର୍ଥନୈତିକ ଅନାଟନରେ ସମସ୍ତ ବର୍ଗ ସମ୍ମୁଖୀନ ହେଉଥିବା ବେଳେ ଆଜି ମାନ୍ୟବର ମୁଖ୍ୟମନ୍ତ୍ରୀ ଉଠା ଦୋକାନୀ, ମନରେଗା ଶ୍ରମିକ, ଚାଷୀ ତଥା  ନିର୍ମାଣ ଶ୍ରମିକଙ୍କ ପାଇଁ ଆର୍ଥିକ ସହାୟତା ଘୋଷଣା କରିଛନ୍ତି ।  କିନ୍ତୁ ଗତ ମହାମାରୀ  ପ୍ରଥମ ଲହରରେ ନିର୍ମାଣ ଶ୍ରମିକଙ୍କ ପାଇଁ ଘୋଷଣା ହୋଇଥିବା ୧୫୦୦ ଟଙ୍କା ସହାୟତା ଆଜି ପର୍ଯ୍ୟନ୍ତ ରାଜ୍ୟର ପଞ୍ଜିକୃତ ନିର୍ମାଣ ଶ୍ରମିକଙ୍କୁ ସଠିକ୍ ଭାବରେ ବଣ୍ଟନ କରାଯାଇ ନାହିଁ । ଫଳରେ ଲକ୍ଷାଧିକ ହିତାଧିକାରୀ ଏହି ସହାୟତାରେ ବଂଚିତ ହୋଇଛନ୍ତି ବୋଲି ଅଣସଂଗଠିତ ଶ୍ରମିକ କଂଗ୍ରେସ ଅଭିଯୋଗ କରିଛି । ଅଣସଂଗଠିତ କ୍ଷେତ୍ରରେ ମଧ୍ୟ ଉଠା ଦୋକାନୀଙ୍କ ପାଇଁ ଘୋଷଣା ହୋଇଥିବା ସହାୟତାରୁ ପ୍ରକୃତ ହିତାଧିକାରୀ ବଂଚିତ ହେବାର ଅନେକ ସମ୍ଭାବନା ରହିଛି । କାରଣ ୨୦୧୪ ଉଠା ଦୋକାନି ଆଇନକୁ ପୌରସଂସ୍ଥା ମାନଙ୍କ ଦ୍ୱାରା ସଠିକ୍ ଭାବରେ କାର୍ଯ୍ୟକାରୀ କରାଯାଇନାହିଁ ଏବଂ ଗ୍ରାମାଞ୍ଚଳର ବିଭିନ୍ନ ବଜାରକୁ ଆସୁଥିବା ବୁଲା ବିକାଳି ଓ ଉଠା ଦୋକାନୀଙ୍କୁ ଚିହ୍ନଟ କରାଯାଇନାହିଁ । ସେମାନଙ୍କୁ ମଧ୍ୟ ଉକ୍ତ ସହାୟତାରେ ଅନ୍ତର୍ଭୁକ୍ତ କରାଯାଉ । ପ୍ରବାସୀ ଶ୍ରମିକ ଅନ୍ୟାନ୍ୟ କର୍ମନିଯୁକ୍ତି ଯୋଜନାରେ କାର୍ଯ୍ୟ କରୁଥିବା ଘରୋଇ ଶ୍ରମିକ, ଅଟୋ, ଟେକ୍ସି, ରିକ୍ସା ଚାଳକ ଇତ୍ୟାଦି ବର୍ଗର ଶ୍ରମିକଙ୍କୁ 

ମାସିକ ୬ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯାଉ । ଏଭଳି ବିଭିନ୍ନ ଦାବି ନେଇ ଆଜି ବଲାଙ୍ଗିର ଜିଲ୍ଲାପାଳଙ୍କ ଜରିଆରେ ଅଣସଂଗଠିତ ଶ୍ରମିକ କଂଗ୍ରେସର ନିର୍ମାଣ କ୍ଷେତ୍ର ରାଜ୍ୟ ସଂଯୋଜକ କୃଷ୍ଣ ଚନ୍ଦ୍ର ସାହୁଙ୍କ ନେତୃତ୍ୱରେ ମୁଖ୍ୟମନ୍ତ୍ରୀଙ୍କୁ ୬ ଦଫା ସମ୍ବଳିତ ଦାବିପତ୍ର ଜିଲ୍ଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲ୍ଲାପାଳ ଅନନ୍ତ ନାରାୟଣ ସିଂ ଲାଗୁରିଙ୍କୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଥିଲା । ଏଥିରେ ଜିଲ୍ଲା ସଂଯୋଜକ ଯୋଗେଶ ଭୋଇ, କୃଷକ ସେଲ ସଭାପତି ପ୍ରେମାନନ୍ଦ ଭୋଇ, ଦେଓଗାଁ ବ୍ଲକ ସଭାପତି ପୁରନ୍ଦର ଭୋଇ, ସଇଁନ୍ତଲା ସଭାପତି ରମାକାନ୍ତ ମାଝି ତଥା ବିଭିନ୍ନ ବ୍ଲକର ସଭାପତି ଓ କର୍ମକର୍ତ୍ତା ଉପସ୍ଥିତ ଥିଲେ ।