23-Apr-2021

ସଇଁତଲା(ପ୍ରେରଣା ଖବର) ଦିନକୁ ଦିନ କରୋନା ଦ୍ୱିତୀୟ ଲହର ସଂକ୍ରମଣ ହାର ବୃଦ୍ଧିକୁ ଲୋକମାନଙ୍କୁ ସତର୍କ ହୋଇ ଭୟଭିତ ନ ହେବା ପାଇଁ ଜିଲ୍ଲା ଜୁନିୟର ରେଡକ୍ରସ ତରଫରୁ ସଇଁତଲା ବ୍ଲକ ଅନ୍ତର୍ଗତ ଭଦ୍ରା ପଞ୍ଚାୟତର ଚିତାମରା ଗ୍ରାମରେ କରୋନା ସଚେତନତା କାର୍ଯ୍ୟକ୍ରମ ସହ ହାଇଜେନିକ୍ କିଟ୍ ସାବୁନ, ମାସ୍କ ବଣ୍ଟନ କରାଯାଇଛି ।  କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ସଇଁତଲା ବ୍ଲକ ଶିକ୍ଷା ଅଧିକାରୀ ଗୋବର୍ଦ୍ଧନ ଭୋଇ ଓ ସମ୍ମାନୀତ ଅତିଥି ଭାବରେ ସଇଁତଲା ଡାକ୍ତରଖାନାର ଡା. ରାମ ପ୍ରସାଦ ପଣ୍ଡା ଯୋଗଦାନ ଦେଇଥିଲେ ।  ସାମାଜିକ ଦୂରତା ବଜାୟ ରଖିବା, ସାବୁନ କିମ୍ବା ସାନିଟାଇଜର ସାହାଯ୍ୟରେ ହାତକୁ ବାରମ୍ବାର ଧୋଇବା, ମାସ୍କକୁ ଠିକ ଭାବରେ ପରିଧାନ କରିବା ଏବଂ କାର୍ଯ୍ୟ ନ ଥିଲେ ଘରୁ ବାହାରନ୍ତୁ ନାହିଁ ବୋଲି ଅତିଥିଗଣ ସୂଚନା ଦେଇଥିଲେ । ରାଜ୍ୟ ସାଧନକର୍ମୀ ବିକାଶ ଚନ୍ଦ୍ର ସାହୁ ହାତ ଧୁଆର ଛଅଟି ସୋପାନକୁ ପ୍ରଦର୍ଶନ କରିବା ସହ ୨୦ ରୁ ୪୦ ସେକେଣ୍ଡ ପର୍ଯ୍ୟନ୍ତ ନିୟମିତ କରିବା ପାଇଁ ଗ୍ରାମବାସୀଙ୍କୁ ବୁଝାଇଥିଲେ । ଏହି ଅବସରରେ ଭାରତ ରେଡକ୍ରସ ସୋସାଇଟି, ଓଡିଶା ଶାଖା ତରଫରୁ ଯୋଗାଇ ଦିଆଯାଇଥିବା ହାଇଜେନିକ କିଟ୍‌, ମାସ୍କ, ସାବୁନକୁ ଚିତାମରାର ଆର୍ଥିକ ଅନଗ୍ରସର ଜୀବନ ଅତିବାହିତ କରୁଥିବା ୨୦ ଗୋଟି ପରିବାରଙ୍କୁ ଜିଲ୍ଲା ଜୁନିୟର ରେଡକ୍ରସ କର୍ମକର୍ତ୍ତା ମାନଙ୍କ ଦ୍ୱାରା ବଣ୍ଟନ କରାଯାଇଥିଲା ।

କାର୍ଯ୍ୟକ୍ରମରେ ସରକାରୀ ବ୍ଲକ ଶିକ୍ଷା ଅଧିକାରୀ ଗୋକୁଳାନନ୍ଦ ନନ୍ଦ, ସିଆରସି ଉଦୟ ଶଙ୍କର ବାଗ, ନିରଞ୍ଜନ ମାଝି, ଆଶା କର୍ମୀ ଜାନକୀ ବାଗ, ମହିଳା ସ୍ୱୟଂ ସହାୟିକା ଗୋଷ୍ଠୀର ତପିସା ସେଲମା ଉପସ୍ଥିତ ଥିଲେ । ଜିଲ୍ଲା ଶିକ୍ଷା ଅଧିକାରୀ ଧ୍ରୁବ ଚରଣ ବେହେରା ଓ ଜିଲ୍ଲା ଜୁନିୟର ରେଡକ୍ରସ ସମ୍ପାଦକ ଜ୍ୟୋତି ପ୍ରସାଦ ପରିଡାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ କାର୍ଯର୍୍ୟକ୍ରମକୁ ଜିଲ୍ଲା ଜୁୁନିୟର ରେଡକ୍ରସ ଅଫିସର ସୁବାଷ ଚନ୍ଦ୍ର ପଟେଲ ଓ ବ୍ଲକ ସଂଗଠକ ହେମନ୍ତ ବେମାଲ ପରିଚାଳନା କରିଥିଲେ । ଡେଙ୍ଗ ହାଇସ୍କୁଲର ଜୁନିୟର ରେଡକ୍ରସ କାଉନ୍ସେଲର ରାମ ନାରାୟଣ ଦାଶ କାର୍ଯ୍ୟକ୍ରମର ଉଦ୍ଦେଶ୍ୟ ପ୍ରଦାନ କରିଥିବା ସମୟରେ ଗ୍ରାମର ୱାର୍ଡ ମେମ୍ବର ବଳଦେବ କୁମାର ଧନ୍ୟବାଦ ଦେଇଥିଲେ ।