22-Mar-2021

ବଲାଙ୍ଗୀର(ପ୍ରେରଣା ଖବର ବ୍ୟୁରୋ) : ବଲାଙ୍ଗିର ଜିଲ୍ଲା ସମବାୟ ସମିତି ଚତୁର୍ଥ ଶ୍ରେଣୀ କର୍ମଚାରୀ ସଂଘର ବାର୍ଷିକ ଅଧିବେଶନ ପାଟଣାଗଡ ଉପଖଣ୍ଡସ୍ଥ ବେଲପଡା ବ୍ଲକ କପାଣି ସେବା ସମବାୟ ସମିତି ପରିସରରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ସଭାପତି ଭାବେ ପୂର୍ବତନ ବିଧାୟକ ତଥା ରାଜ୍ୟ ସମବାୟ ବ୍ୟାଙ୍କର ପୂର୍ବତନ ରାଜ୍ୟ ସଭାପତି ସମବାୟ ସମ୍ରାଟ ଯଜ୍ଞେଶ୍ୱର ଏବଂ ସମ୍ପାଦକ ଭାବେ ପଶ୍ଚିମାଂଚଳ ମିଳିତ ଶ୍ରମିକ କର୍ମଚାରୀ ମଂଚର କାର୍ଯ୍ୟକାରୀ ସଭାପତି ନିରଞ୍ଜନ ବିଶିଙ୍କୁ ମନୋନୀତ କରାଯାଇଥିଲା ।

ଏହି ଅବସରରେ ଯଜ୍ଞେଶ୍ୱର କହିଥିଲେ ଯେ, ସମ୍ବିଧାନରେ ସମବାୟକୁ ଏକ ମୌଳିକ ଅଧିକାର ଦିଆଯାଇଛି । ବର୍ତମାନ ୬ ମାସରୁ ଉର୍ଦ୍ଧ୍ୱ ହେବ ମ୍ୟାନେଜମେଣ୍ଟ ଆଉ ନାହିଁ । ସମ୍ବିଧାନର ୯୭ତମ ସଂଶୋଧନ ଅନୁଯାୟୀ ୬ମାସରୁ ଉର୍ଦ୍ଧ୍ୱ କୌଣସି ପ୍ରଶାସକ ଦାୟିତ୍ୱରେ ରହି ପାରିବେ ନାହିଁ । ଏଣୁ ବର୍ତମାନ ରାଜ୍ୟ ସାରା ଯେତିକି ସମବାୟ ଅନୁଷ୍ଠାନ ଅଛି ତାହା ଏକ ସାମ୍ବିଧାନିକ ସଂକଟରେ ଗତି କରୁଛି । ଏହା ତୁରନ୍ତ ସମାଧାନ ନହେଲେ ସମବାୟ ସମିତିର ପ୍ରଭୃତ କ୍ଷତି ହେବ ବୋଲି ଯଜ୍ଞେଶ୍ୱର କହିଥିଲେ ।