23-Jul-2026

      ସମ୍ବଲପୁର :(ସଂଜୀବ ପାଣିଗ୍ରାହୀ - ଆଜି ସମ୍ବଲପୁର ଗୋଲବଜାର ଛକରେ ଭାରତୀୟ ଜନତା ପାର୍ଟି ପକ୍ଷରୁ ବିଶାଳ ପ୍ରତିବାଦ ସଭା ଅନୁଷ୍ଠିତ ହୋଇଯାଇଛି । ଦିଲ୍ଲୀ ଜନ୍ତର-ମନ୍ତରଠାରେ ଚାଲିଥିବା ଆନ୍ଦୋଳନ ନାଁରେ ଦେଶବିରୋଧୀ ନାରାବାଜି, ହିଂସା ସୃଷ୍ଟି ଏବଂ ବିଜେଡ଼ି-କଂଗ୍ରେସର ଅପବିତ୍ର ସାଲିସ୍ ରାଜନୀତି ବିରୋଧରେ ବିଜେପି ନେତୃବୃନ୍ଦ ଓ କାର୍ଯ୍ୟକର୍ତ୍ତାମାନେ ରାଜରାସ୍ତାକୁ ଓହ୍ଲାଇ ଦୃଢ଼ ବିରୋଧ ପ୍ରଦର୍ଶନ କରିଛନ୍ତି।

      ଏହି ପ୍ରତିବାଦ ସଭାରେ ବିଜେପି ନେତାମାନେ ବିଜେଡି ଓ କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ନେତୃବୃନ୍ଦମାନେ କହିଛନ୍ତି ଯେ ଦୀର୍ଘ ୨୪ ବର୍ଷ ଧରି ନିଜକୁ 'କଂଗ୍ରେସ ବିରୋଧୀ' ବୋଲି ଡିଣ୍ଡିମ ପିଟୁଥିବା ବିଜେଡିର ଦୋମୁହାଁ ନୀତି ଓ ପ୍ରକୃତ ମୁଖା ଆଜି ପଦାରେ ପଡ଼ିଛି। ନିଜ ଶାସନ କାଳରେ କନେଷ୍ଟବଳ ପରୀକ୍ଷା, ୨୦୧୮ ଓ ୨୦୨୨ର ମାଟ୍ରିକ ପରୀକ୍ଷା ସମେତ ବିଭିନ୍ନ ନିଯୁକ୍ତି ପରୀକ୍ଷାରେ ବ୍ୟାପକ ପ୍ରଶ୍ନପତ୍ର ଲିକ୍‌ ଓ ଦୁର୍ନୀତି କରିଥିବା ବିଜେଡି ସରକାର ଆଜି କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବି କରିବା ଅତ୍ୟନ୍ତ ହାସ୍ୟାସ୍ପଦ। 'ଚଟୁ ଆଇଁଷ, ବେଣ୍ଟ ନିରାମିଷ' ନ୍ୟାୟରେ ବିଜେଡି ଆଜି ଆଚରଣ କରୁଥିବା ବେଳେ, ନବୀନ ବାବୁ ସ୍ପଷ୍ଟ କରନ୍ତୁ ସେ କଂଗ୍ରେସ ସହ ଅଛନ୍ତି ନା ଓଡ଼ିଶାର ରାଜ୍ୟବାସୀଙ୍କ ସହ ଅଛନ୍ତି।

      ନେତୃବୃନ୍ଦ ଆହୁରି ମଧ୍ୟ କହିଛନ୍ତି ଯେ ଅତୀତରେ ବୁର୍ଲା ଛାତ୍ର ଆନ୍ଦୋଳନରୁ ଆରମ୍ଭ କରି ଛବିରାଣୀ ଘଟଣା ପର୍ଯ୍ୟନ୍ତ ନିନ୍ଦନୀୟ କାର୍ଯ୍ୟରେ ଲିପ୍ତ ଥିବା ଲୋକଙ୍କ ସହ ନବୀନ ବାବୁ ହାତ ମିଶାଇଛନ୍ତି, ଯାହା ପ୍ରମାଣ କରେ ନବୀନ ବାବୁ ଓ ରାହୁଲ ଗାନ୍ଧୀ ହେଉଛନ୍ତି ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ। ନିଟ୍ ପରୀକ୍ଷା ନାଁରେ ଚାଲିଥିବା ଆନ୍ଦୋଳନରେ ଦେଶବିରୋଧୀ ସଂଗଠନର ସଦସ୍ୟମାନଙ୍କୁ ସାମିଲ କରାଯାଇ ହିଂସାତ୍ମକ ପରିବେଶ ସୃଷ୍ଟି କରାଯାଉଛି। ଛାତ୍ରଛାତ୍ରୀମାନେ କେବେ ହେଲେ ଦେଶବିରୋଧୀ ନାରା ଦିଅନ୍ତି ନାହିଁ କିମ୍ବା ସମ୍ପତ୍ତି ନଷ୍ଟ କରନ୍ତି ନାହିଁ। ବିଜେଡି ଓ କଂଗ୍ରେସର ଏହି ଅପବିତ୍ର ବୁଝାମଣା ଏବଂ ଦେଶବିରୋଧୀ ଶକ୍ତିଙ୍କୁ ସମର୍ଥନ ବିରୋଧରେ ବିଜେପି ସାରା ରାଜ୍ୟରେ ଆନ୍ଦୋଳନ ଜାରି ରଖିବ ଏବଂ ଆଗାମୀ ଦିନରେ ରାଜ୍ୟବାସୀ ଏହାର ଯୋଗ୍ୟ ଜବାବ ଦେବେ।

    ଜିଲ୍ଲା ସଭାପତି ରାମଚନ୍ଦ୍ର ମେହେର ଙ୍କ ନେତୃତ୍ୱରେ ହୋଇଥିବା ଆଜିର କାର୍ଯ୍ୟକ୍ରମ ରେ ରାଜ୍ୟ ସାଧାରଣ ସଂପାଦକ ସୀମାଞ୍ଚଳ ଖଟେଇ, ପୂର୍ବତନ ଜିଲ୍ଲା ସଭାପତି ଗିରୀଶ ପଟେଲ , ରାଜ୍ୟ ପ୍ରବକ୍ତା ମାନସ ରଞ୍ଜନ ବକ୍ସି, ବରିଷ୍ଠ ନେତା ଦାମୋଦର କର, ଡ଼.ପ୍ରମୋଦ ରଥ, ମହିଳା ମୋର୍ଚ୍ଚା ଜିଲ୍ଲା ସଭାନେତ୍ରୀ ସୁଷମା ସାହୁ, ଯୁବ ମୋର୍ଚ୍ଚା ଜିଲ୍ଲା ସଭାପତି ପ୍ରଭୁଦତ୍ତ ପଣ୍ଡା , ଯୁବ ମୋର୍ଚ୍ଚା ରାଜ୍ୟ ସାମାଜିକ ଗଣମାଧ୍ୟମ ସଂଯୋଜକ ଉତ୍ତମ ବିଶ୍ଵାଳ, ଆଶିଷ ହୋତା, ନିଳାମ୍ବର ସିକନ୍ଦର, ହରବ୍ରତ ସେନାପତି, ଗୁରପ୍ରିତ୍ ସିଂହ, ଶମ୍ଭୁ ବରେଲିଆ, ଗୁଗା ସିଂହ, ଟିକୁ ମେହେର, ସୁଧୀର ବୋହିଦାର, ଅଶ୍ୱିନୀ ମାଝୀ, ତୁକୁ ମହାନ୍ତି, ମୋତିଲାଲ ତନ୍ତି ରୁନୁ ପ୍ରଧାନ, ପୁଷ୍ପାଞ୍ଜଳି ଜେନା, କଞ୍ଚନ ଲୁହା, ପୁଷ୍ପାଞ୍ଜଳି ପଣ୍ଡା , ଅନୁସୂୟା ସାମଲ ସମେତ ଶତାଧିକ କାର୍ଯ୍ୟକାର୍ତ୍ତା, ପାଦାଧିକାରୀ ଓ ସମର୍ଥକ ସମିଲ ଥିଲେ ।