10-Feb-2021

ବଲାଙ୍ଗୀର, (ସନ୍ତୋଷ କୁମାର ଠାକୁର)- ଆଗକୁ ଅଛି ବିଧାନସଭାର ଅଧିବେଶନ । ଏହାକୁ ଦୃଷ୍ଟିରେ ରଖି ବଲାଙ୍ଗୀର ଜିଲ୍ଲାର ବିଭିନ୍ନ ସମସ୍ୟା ତଥା ସାଧାରଣ ଲୋକଙ୍କ ସ୍ୱରକୁ ବିଧାନସଭାରେ ପହଞ୍ଚାଇବା ପାଇଁ ଆଜି ବଲାଙ୍ଗୀର ବିଧାୟକ ନରସିଂହ ମିଶ୍ର ମିଶ୍ରଙ୍କ ପକ୍ଷରୁ ଏକ  ମତବିନିମୟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ସ୍ଥାନୀୟ ସାର୍କିଟ ହାଇସ ଠାରେ ଜିଲ୍ଲାର କାର୍ଯ୍ୟରତ ଗଣମାଧ୍ୟମ ପ୍ରତିନିଧି ମାନଙ୍କ ସହ ବିଧାୟକ ଶ୍ରୀ ମିଶ୍ର ବଲାଙ୍ଗୀର ଜିଲ୍ଲାର ବିଭିନ୍ନ ସମସ୍ୟା ଉପରେ ସବିଶେଷ ଆଲୋଚନା କରିଥିଲେ । ଗଣମାଧ୍ୟମ ପ୍ରତିନିଧି ମାନେ ଜିଲ୍ଲାରେ ଦେଖାଦେଇଥିବା ବିବିଧ ସମସ୍ୟା ଓ ତାର ସମାଧାନ ପାଇଁ ରାଜ୍ୟ ସରକାରଙ୍କ ଉପରେ ଚାପ ସୃଷ୍ଟି କରିବା ପାଇଁ ବିଧାୟକ ଶ୍ରୀ ମିଶ୍ରଙ୍କୁ ଅନୁରୋଧ କରିିଥିଲେ । ବର୍ତ୍ତମାନ ଜିଲ୍ଲାର ବହୁପ୍ରତୀକ୍ଷିତ  ଲୋୟର ସୁକତେଲ ପ୍ରକଳ୍ପର କାମ କଛପ ଗତିରେ ଚାଲିଥିବା ବେଳେ ଏହି ପ୍ରକଳ୍ପର ତ୍ୱରାନ୍ୱିତ ଉପରେ ଜୋର ଦେଇଥିଲେ । ସେହିପରି ଜିଲ୍ଲାର ବିଭିନ୍ନ ଧାନମଣ୍ଡିରେ ଚାଲିଥିବା ଦଲାଲରାଜ ଓ ଅସାଧୁ ମିଲର ମାନଙ୍କ ଶୋଷଣ ମନୋବୃତ୍ତିକୁ ବିଧାୟକ ଶ୍ରୀ ମିଶ୍ର ଦୃଢ଼ ନିନ୍ଦା କରିବା ସହ ମଣ୍ଡି  ସମସ୍ୟାକୁ ନେଇ ଆସନ୍ତା ବିଧାନସଭାରେ ସରଗରମ ଆଲୋଚନା ହେବ ବୋଲି କହିଥିଲେ । ଜିଲ୍ଲାର ଗନ୍ଧରେଲ ଡ୍ୟାମର ସୌନ୍ଦର୍ଯ୍ୟକରଣ ଓ ଏହାର ପୁନଃରୁଦ୍ଧାର ଉପରେ ସାମ୍ବାଦିକ ମାନଙ୍କ ବିଭିନ୍ନ ପ୍ରସ୍ତାବ ଉପରେ ଉତ୍ତର ଦେଇ ଏହି ପ୍ରକଳ୍ପ କାମକୁ ଶେଷ କରିବା ପାଇଁ ସବୁ ପ୍ରକାର ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶୃତି ଦେଇଥିଲେ । ଏଥିସହ ବଲାଙ୍ଗୀର ଜିଲ୍ଲାର ବିଭିନ୍ନ ଉନ୍ନୟନମୂଳକ କାମ ପାଇଁ ପଶ୍ଚିମ ଓଡ଼ିଶା ବିକାଶ ପରିଷଦ ପାଣ୍ଠିରୁ ଅଧିକ ଅର୍ଥ ବ୍ୟୟ ବରାଦ ପାଇଁ ସେ ବିଧାନସଭାରେ ସ୍ୱର ଉତ୍ତୋଳନ କରିବେ ବୋଲି ପ୍ରତିଶୃତି ଦେଇଥିଲେ । ଅନ୍ୟ ମାନଙ୍କ ମଧ୍ୟରେ ସାମ୍ବାଦିକ ପାର୍ଥବନ୍ଧୁ ମହାପାତ୍ର, ବିରେନ୍ଦ୍ର ଝାଙ୍କର, ଚନ୍ଦ୍ରଭାନୁ ମୌଲାନା ପ୍ରମୁଖ ଜିଲ୍ଲାର ବିଭିନ୍ନ ସମସ୍ୟାକୁ ବିଧାୟକଙ୍କ ଆଗରେ ଉତ୍‌ଥାପନ କରି ଏହାର ସମାଧାନ ଦିଗରେ ବିଧାୟକ ସମୟୋଚିତ ପଦକ୍ଷେପ ଗ୍ରହଣ କରିବେ ବୋଲି ଆଶାବ୍ୟକ୍ତ କରିଥିଲେ । ଚଳିତ ବିଧାନସଭାରେ ଜିଲ୍ଲାର ପ୍ରମୁଖ ସମସ୍ୟା ଗୁଡିକୁ ବିଧାନସଭାରେ ଉତ୍‌ଥାପନ କରାଯିବା ସହ ବଲାଙ୍ଗୀରବାସୀଙ୍କ ହକ୍ ପାଇଁ ଆଗାମୀ ଦିନରେ ଲଢ଼େଇ କରାଯିବ ବୋଲି ଶ୍ରୀ ମିଶ୍ର ପ୍ରତିଶୃତି ଦେଇଛନ୍ତି ।  ଏହି ମତବିନିମୟ କାର୍ଯ୍ୟକ୍ରମରେ ବିଧାୟକ ଶ୍ରୀ ମିଶ୍ରଙ୍କ ସମେତ କଂଗ୍ରେସ ଜିଲ୍ଲା ସଭାପତି ଦିଲୀପ ବେହେରା ଓ କାଉନସିଲର ମିଲନୀ ସାହୁ ପ୍ରମୁଖ ମଂଚାସୀନ ରହି ସାମ୍ବାଦିକଙ୍କ ବିଭିନ୍ନ ପ୍ରସ୍ତାବ ଉପରେ  ନିଜର ଆଭିମୁଖ୍ୟ ସ୍ପଷ୍ଟ କରିଥିଲେ ।