20-Jun-2026

ପାର୍ବତୀଗିରି ମହିଳା ମହାବିଦ୍ୟାଳୟରେ ଡ଼ଃ. ନାରାୟଣ ପୃଷେଠଙ୍କ ୮୪ତମ ଜନ୍ମଜୟନ୍ତୀ 

ବରଗଡ଼(ତୁଳସୀ ଚରଣ ଦାଶ):  ଆଜି ପାର୍ବତୀଗିରି ମହିଳା ମହାବିଦ୍ୟାଳୟ, ବରଗଡ଼ରେ ବିଶିଷ୍ଟ ଶିକ୍ଷାବିତ୍ ଓ ପୂର୍ବତନ ଅଧ୍ୟକ୍ଷ ସ୍ୱର୍ଗତ ଡ଼ଃ.ନାରାୟଣ ପୃଷେଠଙ୍କ ୮୪ତମ ଜନ୍ମଜୟନ୍ତୀ ଶ୍ରଦ୍ଧା ଓ ସମ୍ମାନର ସହ ପାଳନ କରାଯାଇଥିଲା। ମହାବିଦ୍ୟାଳୟର ଅଧ୍ୟକ୍ଷା ଶ୍ରୀମତୀ ନନ୍ଦିନୀ ନିରୋଦ ପଣ୍ଡାଙ୍କ ସଭାପତିତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ଅଧ୍ୟାପକ, ଅଧ୍ୟାପିକା, କର୍ମଚାରୀ ଯୋଗଦେଇ ଡ଼. ପୃଷେଠଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରିଥିଲେ।

ଏହି ଅବସରରେ ସ୍ୱର୍ଗତ ଡ଼. ପୃଷେଠଙ୍କ ସ୍ମୃତିଚାରଣ କରାଯିବା ସହ ତାଙ୍କ ଆଦର୍ଶ, ଶିକ୍ଷା କ୍ଷେତ୍ରରେ ଅବଦାନ ଏବଂ ମହାବିଦ୍ୟାଳୟର ବିକାଶ ପ୍ରତି ତାଙ୍କର ଉଲ୍ଲେଖନୀୟ ଭୂମିକା ଉପରେ ଆଲୋଚନା କରାଯାଇଥିଲା। ଉପସ୍ଥିତ ସମସ୍ତେ ସ୍ୱର୍ଗତ ପୃଷେଠଙ୍କ ଅମର ଆତ୍ମାର ସଦ୍‌ଗତି କାମନା କରି ଏକ ମିନିଟ୍ ନିରବ ପ୍ରାର୍ଥନା କରିଥିଲେ।

ଅଧ୍ୟକ୍ଷା ଶ୍ରୀମତୀ ପଣ୍ଡା ତାଙ୍କ ଅଭିଭାଷଣରେ କହିଥିଲେ ଯେ, ଡ଼. ନାରାୟଣ ପୃଷେଠ କେବଳ ଜଣେ ଶିକ୍ଷାବିତ୍ ନୁହେଁ, ବରଂ ଛାତ୍ରଛାତ୍ରୀଙ୍କ ମନରେ ମାନବୀୟ ମୂଲ୍ୟବୋଧ ଓ ଶୃଙ୍ଖଳାର ବିକାଶ ପାଇଁ ସଦା ପ୍ରୟାସରତ ଥିଲେ। ତାଙ୍କ ଜୀବନ ଓ କାର୍ଯ୍ୟଧାରା ଆଗାମୀ ପିଢ଼ି ପାଇଁ ପ୍ରେରଣାର ଉତ୍ସ ହୋଇ ରହିବ।

କାର୍ଯ୍ୟକ୍ରମଟିକୁ ମହାବିଦ୍ୟାଳୟର ସୋସିଆଲ ମିଡିଆ ସେଲର ଫ୍ୟାକଲ୍ଟି କୋ-ଅର୍ଡିନେଟର ଡ଼ଃ.ପ୍ରଶାନ୍ତ କୁମାର ଦାଶ ସଂଯୋଜନା କରିଥିଲେ । ଶେଷରେ ଅଧ୍ଯାପକ ଡଃ.ଚନ୍ଦ୍ରମଣି ଦେବତା ଧନ୍ୟବାଦ ଅର୍ପଣ କରିଥିଲେ । 
         ---------×××---------