15-Jun-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ସହରରେ ଅନେକଗୁଡିଏ ବିକାଶପ୍ରକଲ୍ପ ହାତକୁ ନିଆଯାଇଛି । ସେଥିରୁ ଚଳିତବର୍ଷ ସହରର ୧୧ଟି ବନ୍ଧକଟାର ପୁନଃରୁଦ୍ଧାର କାମ ପ୍ରାୟ ସରିବା ଉପରେ ରହିଛି। ମୁଖ୍ୟତଃ ପଙ୍କୋଦ୍ଧାର କାମ ସଫଳରୂପେ ସମ୍ପନ୍ନ ହୋଇଛି। ଆଗକୁ ସୌନ୍ଦର୍ଯ୍ୟକରଣ କାମ କରାଯିବ । ତେଣୁ ବଲାଙ୍ଗୀର ସହରର ବୁଦ୍ଧିଜୀବୀଙ୍କୁ ଡାକି ଆଜି ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ଓ ପୌରାଧ୍ୟକ୍ଷା ଲିକା ସାହୁ ଆଲୋଚନା କରିଛନ୍ତି । ଆଜି ସଂଧ୍ୟାରେ କଚେରୀଛକରେ ନିର୍ମିତ ଟ୍ରାଫିକ ଷ୍ଟାଣ୍ଡିଂସେଡର ଉଦଘାଟନ ପରେ ଐତିହାସିକ କରଙ୍ଗାକଟାଠାରେ ଆୟୋଜିତ ଏହି ବୈଠକରେ ସହରର ବିଭିନ୍ନ ବିକାଶ ପ୍ରକଲ୍ପନେଇ ଆଲୋଚନା 

ହୋଇଥିଲା। ବିଧାୟକ ତାଙ୍କ ବକ୍ତବ୍ୟରେ କହିଲେ ଯେ, ଆମେ ନିର୍ବାଚନ ସମୟରେ ଲୋକଙ୍କୁ ଦେଇଥିବା ପ୍ରତୃଶୃତି ମୁତାବକ କାମ କରିଚାଲିଛୁ। ଏଥିରେ ବଲାଙ୍ଗୀରବାସୀଙ୍କର ସବୁବେଳେ ସହଯୋଗ ରହିଆସିଛି। ବର୍ତ୍ତମାନ ଚାଲିଥିବା ବନ୍ଧକଟାର ପୁନଃରୁଦ୍ଧାର କାମକୁ ବ୍ୟକ୍ତିଗତ ଭାବରେ ଅନେକ ବୁଦ୍ଧିଜୀବୀ ଓ ସଂଗଠନ ବୁଲି ଦେଖିସାରିଥିବା କହିଥିଲେ ଓ କାମକୁ ସନ୍ତୋଷ ବ୍ୟକ୍ତ କରିଥିଲେ। ବହୁବର୍ଷ ପରେ ଏକାଥରକୁ ବଲାଙ୍ଗୀର ସହରର ୧୧ଟି ବନ୍ଧର ପୁନଃରୁଦ୍ଧାର କାମକୁ କରାଇ ବଲାଙ୍ଗୀର ପୌରପାଳିକା ସଫଳ କରାଇଛି ତେଣୁ ସେମାନେ ଧନ୍ୟବାଦର ପାତ୍ର ବୋଲି ବଲାଙ୍ଗୀର ନାଗରିକ କମିଟିର ସଭାପତି ଡ.ଶ୍ରୀକର ମିଶ୍ର କହିଥିଲେ। ବରିଷ୍ଠ ନାଗରିକ ପଦ୍ମଲୋଚନ ଆଚାର୍ଯ୍ୟ ତାଙ୍କ ବକ୍ତବ୍ୟରେ ବନ୍ଧକାମ ଗୁଡିକୁ ସ୍ୱାଗତଯୋଗ୍ୟ ପଦକ୍ଷେପ ବୋଲି କହି ପ୍ରଶଂସା କରିବା ସହିତ ଏହାର ସଠିକ ପରିଚାଳନା ଓ ବନ୍ଧଗୁଡିକର ସ୍ୱଚ୍ଛତା ଉପରେ ଆଲୋକପାତ କରିଥିଲେ। ପ୍ରଶାସନ ତତ୍ପରତାର ସହିତ ପଦକ୍ଷେପ ନେଇ କାର୍ଯ୍ୟକରିବାକୁ ସେ ପରାମର୍ଶ ଦେଇଥିଲେ । ନବକୃଷ୍ଣ ସାହୁ ବନ୍ଧଆଡି ଗୁଡିକରେ ନିଶାଖୋରଙ୍କ ଆଡ୍ଡାଜମୁଥିବାରୁ ଲୋକଙ୍କ ସୁରକ୍ଷାକୁ ନେଇ ଆଶଂକା ରହୁଛି। ଏହା ସହିତ ଲୋକମାନେ ପୂଜାସାମଗ୍ରୀ ଆଣି ଯେଭଳି ବନ୍ଧରେ ଫୋପାଡିବେ ନାହିଁ ସେଥିପାଇଁ ଲୋକଙ୍କୁ ସଚେତନ କରିବାର ଆବଶ୍ୟକତା ରହିଛି ବୋଲି ଶ୍ରୀ ସାହୁ କହିଥିଲେ। ବରିଷ୍ଠ ନାଗରିକମଞ୍ଚର ପ୍ରଭାକର ମିଶ୍ର ତାଙ୍କ ବକ୍ତବ୍ୟରେ ବିଧାୟକଙ୍କ ଉଦ୍ୟମରେ ବରିଷ୍ଠ ନାଗରିକ ମାନଙ୍କୁ ଏକ ସୁବିଧାକେନ୍ଦ୍ର ନିର୍ମାଣ ଚାଲିଥିବା କହିଥିବା ବେଳେ ବଲାଙ୍ଗୀରବାସୀ ସବୁବେଳେ ବିକାଶ ପ୍ରକଲ୍ପକାମଗୁଡିକୁ ସହଯୋଗ କରିବେ ବୋଲି କହିଥିଲେ ।

ରାମନାରାୟଣ ପାଢୀ, ପ୍ରଭାସ ପାଣିଗ୍ରାହୀଙ୍କ ସମେତ ଅନ୍ୟାନ୍ୟ ବୁଦ୍ଧିଜୀବୀ ପ୍ରମୁଖ ଆଲୋଚନାରେ ଅଂଶଗ୍ରହଣ କରି ପ୍ରତ୍ୟେକ ବନ୍ଧରେ ଟୟଲେଟର ବ୍ୟବସ୍ଥା କରିବାକୁ କହିଥିଲେ। ଶେଷରେ କପଳେଶ୍ୱର ଖମାରୀ ଧନ୍ୟବାଦ ଅର୍ପଣ କରିଥିଲେ । ଆଜିର ଏହି ବୈଠକରେ ସଦର ବ୍ଲକର ଅଧ୍ୟକ୍ଷା ସରିତା ବାଗ, କାଉନସିଲର ଶମ୍ଭୁ ନାଗ, ସରିତା ଦାସ, ନନ୍ଦନୀ ପୋଢ, ସନ୍ତୋଷିନୀ କୁଅଁର, ଗଙ୍ଗାଧର ଚାନ୍ଦ, ଶତୃଘ୍ନ ନାଗଙ୍କ ସମେତ ଅନ୍ୟାନ୍ୟ କାଉନସିଲର,ଡ.ଶିବପ୍ରସାଦ ନନ୍ଦ, ପ୍ରିୟବ୍ରତ ବହିଦାର, ବିଜେଡି ଦଳର ବିଧୁଭୂଷଣ ତ୍ରୀପାଠୀ, ସ୍ୱେଚ୍ଛସେବୀ ସଂଗଠନର ଗୋବିନ୍ଦ ଶତପଥି ପ୍ରମୁଖଙ୍କ ଶତାଧିକ ଲୋକ ଉପସ୍ଥିତ ରହିଥିଲେ ।