13-Jun-2026

ରେଙ୍ଗାଲିକ୍ୟାମ୍ପ(ଆକାଶ ମିଶ୍ର): ରାଜ୍ୟରେ ରବି ଧାନ ସଂଗ୍ରହ ପ୍ରକ୍ରିୟାରେ ଟୋକନ ସମସ୍ୟା ଏବେ ଚାଷୀଙ୍କ ପାଇଁ ଗୁରୁତର ରୂପ ଧାରଣ କରିଛି। ସରକାରୀ ସ୍ତରରେ ଜୁନ୍ ଶେଷ ସୁଦ୍ଧା ଧାନ ସଂଗ୍ରହ ଶେଷ କରିବାକୁ ଲକ୍ଷ୍ୟ ରଖାଯାଇଥିଲେ ହେଁ, ଜୁନ୍ ମାସର ପ୍ରାୟ ଅଧା ବିତିଯାଇଥିଲେ ସୁଦ୍ଧା ବହୁ ଚାଷୀଙ୍କ ଦ୍ୱିତୀୟ ଓ ତୃତୀୟ ଟୋକନ ଆସିନାହିଁ। ଏପରିକି ଜମି ପରିମାଣ ଅନୁଯାୟୀ କମ୍ ଟୋକନ ପାଇଥିବା ଚାଷୀଙ୍କ ବାକିତକ ଟୋକନ ମଧ୍ୟ ମିଳିନାହିଁ। ଏହାର ପ୍ରତିବାଦରେ ଓଡ଼ିଶା ରାଜ୍ୟ କୃଷକ ସଂଗଠନ ଆସନ୍ତା ମଙ୍ଗଳବାର ଦିନ ରେଂଗାଲିକେମ୍ପରୁ ଗୋଡ଼ଭଗା ମଧ୍ୟରେ ରାସ୍ତାରୋକ କରିବାକୁ ଚୂଡ଼ାନ୍ତ ନିଷ୍ପତ୍ତି ନେଇଛି।
ପ୍ରଶାସନ ପକ୍ଷରୁ ଚାଷୀଙ୍କୁ ଟୋକନ ପ୍ରଦାନ କରିବାର ଡେଡ୍‌ଲାଇନ୍ ଗତ ଶୁକ୍ରବାର ସରିଯାଇଥିବାରୁ, ଶନିବାର ସଂଧ୍ୟାରେ ଗୋଡ଼ଭଗା ମାର୍କେଟ୍ ୟାର୍ଡରେ ସଂଗଠନର ସଭାପତି ଭୁବନ ପ୍ରଧାନଙ୍କ ସଭାପତିତ୍ୱରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଅତାବିରା ବ୍ଳକ ଏବଂ ଭେଡେନ ବ୍ଳକର ଥୁଆପାଲି ଓ ଖୁଣ୍ଟୁଲିପାଲି ଅଞ୍ଚଳର ବହୁସଂଖ୍ୟାରେ ଚାଷୀ ଯୋଗ ଦେଇଥିଲେ। ମଝିରେ ଦୁଇ ଦିନ ରଜ ସରକାରୀ ଛୁଟି ଥିବାରୁ, ମଙ୍ଗଳବାର ଦିନ ବ୍ୟାପକ ଭାବେ ରାସ୍ତାରୋକ କରିବାକୁ ସମସ୍ତେ ସହମତି ପ୍ରକାଶ କରିଛନ୍ତି।ମଙ୍ଗଳବାର ହେବାକୁ ଥିବା ଏହି ଆନ୍ଦୋଳନକୁ ସଫଳ କରିବା ପାଇଁ ବୈଠକରେ ବ୍ଲୁ-ପ୍ରିଣ୍ଟ ପ୍ରସ୍ତୁତ କରାଯାଇଛି। ଧାନ ଗାଡ଼ି ସହ ଚାଷୀ ସମାବେଶ କରିବା, ଆନ୍ଦୋଳନକାରୀଙ୍କ ଖାଇବା ଏବଂ ପ୍ରବଳ ଖରାକୁ ଦୃଷ୍ଟିରେ ରଖି ପାନୀୟ ଜଳର ସୁବ୍ୟବସ୍ଥା କରିବା ପାଇଁ ଯୋଜନା କରାଯାଇଛି।
ଉଲ୍ଲେଖଯୋଗ୍ୟ ଯେ, ଚାଷୀଙ୍କ ସମସ୍ତ ଟୋକନ ପ୍ରଦାନ ଦାବିରେ ଗତ ୧ ତାରିଖ ଦିନ ଅତାବିରା ବ୍ଳକ କାର୍ଯ୍ୟାଳୟରେ ଓଡ଼ିଶା ରାଜ୍ୟ କୃଷକ ସଂଗଠନ ପକ୍ଷରୁ ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ଏହାପରେ ଗତ ୧୦ ତାରିଖରେ ବୈଠକ କରି ଶୁକ୍ରବାର ସୁଦ୍ଧା ଟୋକନ ନଆସିଲେ ଆନ୍ଦୋଳନର ଚେତାବନୀ ଦିଆଯାଇଥିଲା। ମାତ୍ର ପ୍ରଶାସନର ଉଦାସୀନତା ଯୋଗୁଁ ଟୋକନ ନଆସିବାରୁ ଶେଷରେ ଚାଷୀ ସଂଗଠନ ରାଜପଥକୁ ଓହ୍ଲାଇବାକୁ ବାଧ୍ୟ ହୋଇଛି।
ଶନିବାରର ଏହି ବୈଠକରେ ସଂଗଠନର ସମ୍ପାଦକ ନରେନ୍ଦ୍ର ପ୍ରଧାନ, ଚାଷୀ ନେତା ବୀରେନ୍ଦ୍ର କର, ବୁଦ୍ଧଦେବ ନନ୍ଦ, ମନୋରଞ୍ଜନ ସାହୁ, ଦେବେନ୍ଦ୍ର ସାହୁ, ସୁରେଶ କର୍ଣ୍ଣ, ସମୀର ପ୍ରଧାନ, ରାଜେଶ ପ୍ରଧାନ, ଗୁରୁଦେବ ଭୋଇ, ବି ପାପାରାଓ, ସଂକ୍ରାନ୍ତି ଭେଙ୍କଟେଶ୍ୱର ରାଓ, ଭି କ୍ରିଷ୍ଣ ମୂର୍ତ୍ତି, ଏମ୍ ସତ୍ୟ ପ୍ରକାଶ, ଜେ ସୂର୍ଯ୍ୟପ୍ରକାଶ ଏବଂ କେ ରାମ ବାବୁଙ୍କ ସମେତ ଅଞ୍ଚଳର ଶତାଧିକ ଚାଷୀ ଉପସ୍ଥିତ ଥିଲେ