13-May-2026

ଲୋଇସିଂହା, (ପ୍ରେରଣା ଖବର) ସରକାରୀ କାର୍ଯ୍ୟରେ ସ୍ବଚ୍ଛତା ଆଣିବା ସକାଶେ ଜଣେ ସରକାରୀ କର୍ମଚାରୀ ଗୋଟିଏ ସ୍ଥାନରେ ତିନିବର୍ଷ କାର୍ଯ୍ୟ କରିବା ପରେ ଅନ୍ୟତ୍ର ବଦଳି କରିବା ପାଇଁ ସରକାର ନିୟମ ପ୍ରଣୟନ କରିଛନ୍ତି । ହେଲେ ବଲାଙ୍ଗୀର ଜିଲ୍ଲା ଲୋଇସିଂହା ବ୍ଲକରେ ଏହି ନିୟମ କାମ କରୁ ନାହିଁ । ସ୍ଥାନୀୟ ବ୍ଲକ କାର୍ଯ୍ୟାଳୟ ସମେତ ବିଭିନ୍ନ କାର୍ଯ୍ୟାଳୟରେ ସରକାରୀ କର୍ମଚାରୀ ମାନେ ୫ ବର୍ଷରୁ ଅଧିକ ସମୟ ଧରି ଆସ୍ଥାନ ଜମାଇ ରହିଥିବା ଦେଖିବାକୁ ମିଳିଛି । ଲୋଇସିଂହା ବ୍ଲକ କାର୍ଯ୍ୟାଳୟର ଉନ୍ନୟନ କିରାଣୀ ଜଣକୁ ଆଗଲପୁର ବ୍ଲକ କାର୍ଯ୍ୟାଳୟକୁ ବଦଳି ହୋଇଥିଲା । ମାସେ ଦୁଇମାସ କାମ କରିବା ପରେ କରିତକର୍ମା ବାବୁ ଜଣକ ସେଠାରୁ ଲୋଇସିଂହା ଆଇସିଡିଏସ ଅଫିସ ଓ ପରେ ପୁଣି ନିଜର ପୂର୍ବ ସ୍ଥାନ ଲୋଇସିଂହା ବ୍ଲକ ଅଫିସକୁ ବଦଳି ହୋଇ ଆସିଛନ୍ତି । କୌଣସି କାରଣରୁ ବାବୁଙ୍କୁ ଚୌକି ମୋହ ଛାଡୁନାହିଁ । ଉପରିସ୍ଥ ଅଧିକାରୀଙ୍କୁ ହାତ କରି ନିଜର ଆସ୍ଥାନ ଜମାଇ ରଖିବାରେ ବାବୁ ବେଶ ମାହିର ।  ବ୍ଲକର କୌଣସି ଉନ୍ନୟନ ପ୍ରକଳ୍ପର ଫାଇଲ ଖୋଲିବା ସକାଶେ ଉନ୍ନୟନ କିରାଣୀ ସ୍ତରରେ ଲାଞ୍ଚ ନ ଦେଲେ ଫାଇଲ ଖୋଲୁ ନାହିଁ । ଏପରିକି ବ୍ଲକ କାର୍ଯ୍ୟାଳୟର ଅନେକ ଗୁରୁତ୍ୱପୂର୍ଣ୍ଣ ଫାଇଲ ହଜି ଯାଉଥିବା ଅଭିଯୋଗ ହେଉଛି । ପୂର୍ବ ବର୍ଷ ଅପେକ୍ଷା ଏହି ବର୍ଷ ଫାଇଲ ଖୋଲିବା ରେ ବିଳମ୍ବ ହେଉଛି ଯାହା ଫଳରେ ଠିକାଦାର ସମେତ ସାଧାରଣ ଲୋକେ ହଇରାଣ ହେବାକୁ ପଡୁଛି l ରାଜନୈତିକ ଛକାପଞ୍ଝା ଯୋଗୁଁ ଏସବୁ ହେଉଥିବା ନେଇ ସାଧାରଣରେ ଚର୍ଚ୍ଚା ହେଉଛି l ଜିଲ୍ଲା ପଶାସନ ଏଥିପ୍ରତି ଦୃଷ୍ଟି ଦେଇ ଉଚିତ ପଦକ୍ଷେପ ନେବାକୁ ଦାବି ହେଉଛି l