28-Apr-2026

କଟକ(ତପନ ମହାନ୍ତି): କଟକ  ଜିଲ୍ଲାରେ ସରକାରୀ  କାଗଜପତ୍ରରେ ପଞ୍ଜୀକୃତ ନସିଂହୋମ୍ ତଥା ଘରୋଇ ହସ୍‌ପିଟାଲ୍ ସଂଖ୍ୟା ୨୬୦ ରହିଛି। ଜିଲ୍ଲାରେ ପଞ୍ଜୀକୃତ ଅପେକ୍ଷା ଅଣପଞ୍ଜୀକୃତ ନସିଂହୋମ୍ ସଂଖ୍ୟା ଅଧିକ, ସେହିପରି ଯେଉଁ ୨୬୦ଟି  ପଞ୍ଜୀକୃତ ସଂସ୍ଥା ରହିଛି। ସେଥିମଧ୍ୟରୁ ୬୦ଟି ଘରୋଇ ହସ୍‌ପିଟାଲ୍‌ର ଅଗ୍ନି ନିରାପତ୍ତା ପ୍ରମାଣପତ୍ର(ଫାୟାର୍ ସେଫ୍‌ଟି ସାର୍ଟିଫିକେଟ୍) ନେବା ବଦଳରେ ସେଲ୍‌ଫ ରେଗୁଲେଟରୀ କାଟାଗୋରିରେ ସତ୍ୟପାଠ ଦେଇ ବର୍ଷବର୍ଷ ହେଲା ବେପାର ଚଳାଇ ଆସୁଛନ୍ତି। ସେହିପରି ଆଉ ଅବଶିଷ୍ଟ ସରକାରୀ କାଗଜପତ୍ରରେ ନସିଂହୋମ୍ ଗୁଡ଼ିକ ବିଭାଗ ଓ ଅଗ୍ନିଶମ ସେବା ସଂସ୍ଥାକୁ ଚକମା ଦେଇ ନିଜ ବ୍ୟବସାୟୀକ ସାମ୍ରାଜ୍ୟ ଚଳାଇଛନ୍ତି। ଅଗ୍ନି ନିର୍ବାପକ ବ୍ୟବସ୍ଥା ନଥାଇ ଶହ ଶହ ନସିଂହୋମ୍‌ରେ ରୋଗୀଙ୍କ ଚିକିତ୍ସା ଚାଲିଛି। ଏପରିସ୍ଥଳେ ଯଦି କୌଣସି ନସିଂହୋମ୍‌ରେ ଅଗ୍ନିକାଣ୍ଡଜନିତ ଦୁର୍ଘଟଣା ଘଟି ରୋଗୀଙ୍କର ଯଦି କିଛି କ୍ଷତି ହୁଏ ତେବେ ଏଥିପାଇଁ କାହାକୁ ଦାୟୀ କରାଯିବ ବୋଲି ପ୍ରଶ୍ନ ଉଠୁଛି।ଆବଶ୍ୟକ ଅଗ୍ନି ନିର୍ବାପକ ବ୍ୟବସ୍ଥା ନ ଥାଇ ନସିଂହୋମ୍‌ ଗୁଡ଼ିକରେ ରୋଗୀଙ୍କ ଚିକିତ୍ସା ଚାଲିଥିଲେ ହେଁ ଏଥିପ୍ରତି ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। କାର୍ଯ୍ୟାନୁଷ୍ଠାନ ନେବା ତ ଦୂରର କଥା ଜିଲ୍ଲା  ପ୍ରଶାସନ  ବିଭାଗ କିମ୍ବା ଅଗ୍ନିଶମ ସେବା ସଂସ୍ଥା ପକ୍ଷରୁ ଅଗ୍ନି ନିରାପତ୍ତା ବ୍ୟବସ୍ଥାର ଅନୁଧ୍ୟାନ କରାଯାଉ ନାହିଁ। ଜିଲ୍ଲା ପ୍ରଶାସନର ଏକ ଏନ୍‌ଫୋର୍ସମେଣ୍ଟ୍‌ ସ୍ଟ୍ରାଡ୍ କେବଳ କାଗଜପତ୍ର ରେ ଥିଲା ପରି ମନେହେଉଛି।

ଏନ୍‌ଫୋର୍ସମେଣ୍ଟ୍‌ ସ୍ଟାଡ୍‌ରେ ଜିଲ୍ଲାପାଳଙ୍କ ପ୍ରତିନିଧି ଏସ୍‌ପି କିମ୍ବା ଡିସିପିଙ୍କ ପ୍ରତିନିଧି ଜିଲ୍ଲା ମୁଖ୍ୟ ଚିକିତ୍ସାଧୂକାରୀଙ୍କ ପ୍ରତିନିଧି ମାନେ ମିଳିତ ଭାବେ ନିୟମିତ ବ୍ୟବଧାନରେ ଧରପଗଡ଼ କରିବା ପାଇଁ ସ୍ବାସ୍ଥ୍ୟ ବିଭାଗର ନିର୍ଦ୍ଦେଶ ରହିଛି। କିନ୍ତୁ ତାହା କରାଯାଉନାହିଁ। ଶେଷ ଥର ପାଇଁ ଗତ ଜାନୁଆରୀ ମାସରେ ଏନ୍‌ଫୋର୍ସମେଣ୍ଟ୍‌ ସ୍ଟାଡ୍ ଏକ ନସିଂହୋମ୍ ଓ ଦୁଇଟି ଲାବ୍‌ ଉପରେ ଚଢ଼ଉ କରିଥିଲା। ତିନି ମାସ ମଧ୍ୟରେ ଜିଲ୍ଲାରେ କୌଣସି ନସିଂହୋମ୍ କିମ୍ବା ସହର ଠୁ ମନମାନି ଡାଇଗୋଷ୍ଟିକ୍ ସେଣ୍ଟର୍‌ ୧ ସଣ୍ଟର୍‌ ଉପରେ ଆଉ ଚଢ଼ଉ ହୋଇନାହିଁ ବୋଲି ଜିଲ୍ଲା ସ୍ବାସ୍ଥ୍ୟ ବିଭାଗରୁ ସୂଚନା ମିଳିଛି। ଜିଲ୍ଲା ନ୍‌ଫୋର୍ସମେଣ୍ଟ୍‌ ସ୍ଟାଡ୍‌ର ଏପରି ନିଷ୍କ୍ରିୟତା ଯୋଗୁଁ ଗ୍ରାମାଞ୍ଚଳ ଯାଏ ଘରୋଇ ହସ୍‌ପିଟାଲ୍‌ଗୁଡ଼ିକ ଚଳାଇଛନ୍ତି ବୋଲି ଅଭିଯୋଗ ହେଉଛି।

ଆଇସିୟୁ ପାଇଁ ଅଗ୍ନି ନିରାପତ୍ତା ପ୍ରମାଣ ବାଧ୍ୟତାମୂଳକ ରହିଛି। ସେହିପରି ୩୦ରୁ ଅଧିକ ବେଡ୍ ଓ ୪ ହଲା ବିଶିଷ୍ଟ କୋଠାରେ ନସିଂହୋମ୍ ଥିଲେ ଉକ୍ତ ପ୍ରମାଣପତ୍ର ମଧ୍ୟ ଜରୁରି। ସ୍ବାସ୍ଥ୍ୟ ବିଭାଗର ଏସବୁ ନୀତିନିୟମ କେବଳ କାଗଜପତ୍ରରେ ରହିଛି । ଅଧିକାଂଶ ଘରୋଇ ହସ୍‌ପିଟାଲ୍‌ଗୁଡ଼ିକରେ ଆଇସିୟୁ  ଥିବାର ଦେଖ‌ିବାକୁ ମିଳୁଛି। ଆଇସିୟୁ ଖୋଲି ଗୁରୁତର ରୋଗୀ ଏବଂ ଟ୍ରମା କେୟାର୍ ଚିକିତ୍ସା ନାଁରେ ବେପାର ଚଳାଇଛନ୍ତି। ମାତ୍ର  କାଗଜପତ୍ରରେ ହସ୍‌ପିଟାଲ୍‌ରେ ଆଇସିୟୁ ସୁବିଧା ନଥିବା ହସ୍‌ପିଟାଲ୍‌ଗୁଡ଼ିକ ଦର୍ଶାଇଛନ୍ତି। ଏ ସଂପର୍କରେ ଜିଲ୍ଲା ମୁଖ୍ୟ ଚିକିତ୍ସାକାରୀ  ପ୍ରତିକ୍ରିୟାରେ କହିଛନ୍ତି, ଅଗ୍ନି ନିର୍ବାପକ ବ୍ୟବସ୍ଥା ରଖି ହସ୍ପିଟାଲ୍ ଚଳାଇବାକୁ ଆମେ ସବୁବେଳେ ଘରୋଇ ହସ୍‌ପିଟାଲ୍ ମାଲିକଙ୍କୁ ନିର୍ଦ୍ଦେଶ ଦେଉଛୁ। ଏନ୍‌ଫୋର୍ସମେଣ୍ଟ୍‌ ଏବେ କିଛି ମାସ ହେଲା ବନ୍ଦ ଥିଲେ ମଧ୍ୟ ଆଗକୁ ଧରପଗଡ଼ ହେବ।