25-Apr-2026

ବଲାଙ୍ଗିର(ପ୍ରେରଣା ଖବର): ରାଜ୍ୟ ସରକାରଙ୍କ ଭିନ୍ନକ୍ଷମ କଲ୍ୟାଣ ଯୋଜନାରେ ଗୁରୁତର ଅନିୟମିତତା ନେଇ ପୁନର୍ବାର ପ୍ରଶ୍ନ ଉଠିଛି । ୧୦୦% ଦୃଷ୍ଟିହୀନତା ଥିବା ସତ୍ତ୍ୱେ ଯେଉଁଠାରେ ମାସିକ ୩୫୦୦ ଟଙ୍କା ଭତ୍ତା ମିଳିବା କଥା, ସେଠାରେ କେବଳ ୧୨୦୦ ଟଙ୍କା ମିଳୁଥିବା ଅଭିଯୋଗ ସାମ୍ନାକୁ ଆସିଛି ।

ସୂଚନାନୁଯାୟୀ ବଲାଙ୍ଗିର ଜିଲ୍ଲା ବେଲପଡା ବ୍ଲକ ଗମ୍ଭାରୀ ଗ୍ରାମ ପଞ୍ଚାୟତ ଅଧିନସ୍ଥ କର୍ଲାବାହାଲି  ଗ୍ରାମର ବିମ୍ବାଧର କଠାର(୧୭) ସମ୍ପୂର୍ଣ ଭାବେ ଭିନ୍ନକ୍ଷମ ହୋଇଥିବା ସତ୍ତ୍ୱେ ସରକାରୀ ଯୋଜନାର ସଠିକ୍ ଲାଭ ପାଇପାରୁନାହାନ୍ତି। ପରିବାର ଲୋକଙ୍କ କହିବା ଅନୁଯାୟୀ, ସମସ୍ତ ପ୍ରମାଣପତ୍ର ଥିଲେ ମଧ୍ୟ ପ୍ରଶାସନିକ ଅବହେଳା କାରଣରୁ ପୂର୍ଣ୍ଣ ଭତ୍ତା ମିଳୁନାହିଁ।

ଏହା ସହିତ, ଉପମୁଖ୍ୟମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ଏପରି ଅବସ୍ଥା ଥିବାରୁ ସ୍ଥାନୀୟ ଲୋକମାନଙ୍କ ମଧ୍ୟରେ ଅସନ୍ତୋଷ ବଢ଼ୁଛି। ଶୁକ୍ରବାର ଦିନ  ମୁଖ୍ୟମନ୍ତ୍ରୀଙ୍କ ବଲାଙ୍ଗୀର ଗସ୍ତ ନିର୍ଦ୍ଧାରିତ ଥିବାବେଳେ, ଏହି ମୁଦ୍ଦା ଆଉ ଗୁରୁତ୍ୱ ପାଇଛି।

ସ୍ଥାନୀୟ ଅଞ୍ଚଳର ଲୋକ ଓ ସାମାଜିକ କର୍ମୀମାନେ ଏହାକୁ ଗଭୀର ଅବହେଳା ବୋଲି ଆଖ୍ୟା ଦେଇ, ଶୀଘ୍ର ତଦନ୍ତ କରି ଯୋଗ୍ୟ ଲାଭକୁ ସୁନିଶ୍ଚିତ କରିବାକୁ ପ୍ରଶାସନଙ୍କୁ ଦାବି କରିଛନ୍ତି  ।