08-Apr-2026

(ପ୍ରିୟଦର୍ଶିନୀ ପାତ୍ର)
ପାପଡ଼ାହାଣ୍ଡି ବ୍ଲକର ସେମଳା କ୍ଲଷ୍ଟରରେ ଓଡ଼ିଆ ପକ୍ଷ ପାଳନ ଅବସରରେ “ମଧୁ ବର୍ଣ୍ଣବୋଧ ଦିବସ” ଉତ୍ସାହ ଓ ଉତ୍ସବମୂଖର ପରିବେଶରେ ପାଳିତ ହୋଇଥିଲା। ଏହି ଅବସରରେ କ୍ଲଷ୍ଟର ରିସୋର୍ସ ସେଣ୍ଟର କୋଓର୍ଡିନେଟର (ସିଆରସିସି) ବାବୁଲାଲ ସାଗରଙ୍କ ତରଫରୁ ସେମଳା କ୍ଲଷ୍ଟର ଅଧୀନରେ ଥିବା ସରକାରୀ ଉଚ୍ଚ ବିଦ୍ୟାଳୟ ସେମଳା ଓ ଡୁମୁରିପଦର ବିଦ୍ୟାଳୟରେ ଛାତ୍ରଛାତ୍ରୀମାନଙ୍କୁ “ମଧୁ ବର୍ଣ୍ଣବୋଧ” ପୁସ୍ତକ ବଣ୍ଟନ କରାଯାଇଥିଲା।
କାର୍ଯ୍ୟକ୍ରମରେ ଉତ୍କଳ ମାଟିର ପିଲାମାନଙ୍କ ମନରେ ଓଡ଼ିଆ ଭାଷା ପ୍ରତି ଆସକ୍ତି ଓ ଭଲପାଇବା ବୃଦ୍ଧି ପାଇଁ “ମଧୁ ବର୍ଣ୍ଣବୋଧ” ପୁସ୍ତକର ଗୁରୁତ୍ୱ ବିଷୟରେ ଆଲୋକପାତ କରାଯାଇଥିଲା। ପ୍ରାଥମିକ ସ୍ତରରେ ଭାଷା ଶିକ୍ଷାର ଭିତ୍ତି ସୁଦୃଢ କରିବାରେ ଏହି ପୁସ୍ତକର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଅଭିଭାଷଣରେ ଉଲ୍ଲେଖ କରାଯାଇଥିଲା। ସିଆରସିସି ବାବୁଲାଲ ସାଗର ଛାତ୍ରଛାତ୍ରୀମାନଙ୍କୁ ଓଡ଼ିଆ ଭାଷାର ସମୃଦ୍ଧ ପାରମ୍ପରିକତା ଓ ସଂସ୍କୃତି ସମ୍ବନ୍ଧରେ ଜଣାଇ ଦେଇଥିଲେ ଏବଂ ମଧୁସୂଦନ ରାଓଙ୍କ ରଚିତ “ମଧୁ ବର୍ଣ୍ଣବୋଧ” ପୁସ୍ତକ ଓଡ଼ିଆ ଶିଶୁ ଶିକ୍ଷାରେ କେତେଟା ଗୁରୁତ୍ୱ ବହନ କରେ ସେଥିପାଇଁ ଛାତ୍ରଛାତ୍ରୀଙ୍କୁ ପ୍ରେରଣା ଦେଇଥିଲେ।
ଏହି କାର୍ଯ୍ୟକ୍ରମରେ ଶିକ୍ଷକ ନିର୍ମଳ କୁମାର ବେହେରା ଓ ଶିକ୍ଷୟିତ୍ରୀ ମିନତୀ ମାଝୀ ଉପସ୍ଥିତ ରହି ଛାତ୍ରଛାତ୍ରୀମାନଙ୍କୁ ଓଡ଼ିଆ ଭାଷା ଶିକ୍ଷାର ଗୁରୁତ୍ୱ, ସଠିକ ଉଚ୍ଚାରଣ ଓ ଶୁଦ୍ଧ ଲେଖନୀ ଅଭ୍ୟାସ ବିଷୟରେ ଜଣାଇଥିଲେ। ସେମାନେ କହିଥିଲେ ଯେ “ମଧୁ ବର୍ଣ୍ଣବୋଧ” ହେଉଛି ଓଡ଼ିଆ ଶିଶୁ ଶିକ୍ଷାର ଏକ ଅମୂଲ୍ୟ ଗ୍ରନ୍ଥ, ଯାହା ଛୋଟ ପିଲାମାନଙ୍କ ଭାଷା ଜ୍ଞାନ ବିକାଶରେ ବହୁତ ସାହାଯ୍ୟ କରେ।
କାର୍ଯ୍ୟକ୍ରମ ସମୟରେ ଛାତ୍ରଛାତ୍ରୀମାନଙ୍କ ମଧ୍ୟରେ ଓଡ଼ିଆ ଭାଷା ପ୍ରତି ଆଗ୍ରହ ଓ ଉତ୍ସାହ ଦେଖିବାକୁ ମିଳିଥିଲା। ଶେଷରେ ଉପସ୍ଥିତ ଶିକ୍ଷକମାନେ ସିଆରସିସି ବାବୁଲାଲ ସାଗରଙ୍କ ଏହି ସୁନ୍ଦର ପ୍ରୟାସ ପାଇଁ ଧନ୍ୟବାଦ ଜଣାଇଥିଲେ ଓ ଏପରି କାର୍ଯ୍ୟକ୍ରମ ଆଗାମୀ ଦିନରେ ମଧ୍ୟ ଚାଲୁ ରହିବାକୁ ଆଶା ପ୍ରକାଶ କରିଥିଲେ।