29-Mar-2026

ବରପାଲି :-(ସୁଦାମ ଦୀପ)ବରଗଡ଼ ସାଂସଦ ପ୍ରଦୀପ ପୁରୋହିତ ସଂସଦରେ ଓଡ଼ିଶାର ଅମର ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ଐତିହାସିକ ଅବଦାନ ସମ୍ପର୍କରେ ଦୃଷ୍ଟି ଆକର୍ଷଣ କରିଛନ୍ତି। ୧୮୨୭ ମସିହାରୁ ଆରମ୍ଭ ହୋଇଥିବା ତାଙ୍କର ସଶସ୍ତ୍ର ବିଦ୍ରୋହ ଭାରତର ସ୍ୱାଧୀନତା ସଂଗ୍ରାମ ଇତିହାସରେ ଏକ ଅନନ୍ୟ ଅଧ୍ୟାୟ ବୋଲି ସେ ଉଲ୍ଲେଖ କରିଥିଲେ।ସମ୍ବଲପୁରର ଦେବ୍ରୀଗଡ଼ ଏବଂ ବାରପାହାଡ଼ ଭଳି ଦୁର୍ଗମ ଅଞ୍ଚଳରେ ସ୍ଥାନୀୟ ଜନଜାତି ଓ ଜମିଦାରଙ୍କ ସହଯୋଗରେ ବୀର ସୁରେନ୍ଦ୍ର ସାଏ ଯେପରି ଗରିଲା ଯୁଦ୍ଧ ଚଳାଇଥିଲେ, ତାହା ବ୍ରିଟିଶ ଶାସନ ପାଇଁ ବଡ଼ ଆହ୍ୱାନ ସୃଷ୍ଟି କରିଥିଲା। ୧୮୫୭ର ପ୍ରଥମ ସ୍ୱାଧୀନତା ସଂଗ୍ରାମର ପ୍ରାୟ ତିନି ଦଶକ ପୂର୍ବରୁ, ମାତ୍ର ୧୮ ବର୍ଷ ବୟସରେ ସେ ଏହି ସଂଗ୍ରାମର ନେତୃତ୍ୱ ନେଇଥିବା କଥା ସାଂସଦ ଉଲ୍ଲେଖ କରିଥିଲେ। ସେ ଆହୁରି କହିଥିଲେ ଯେ, ୨୦୨୭ ମସିହାରେ ଏହି ଐତିହାସିକ ବିଦ୍ରୋହର ୨୦୦ ବର୍ଷ ପୂର୍ଣ୍ଣ ହେବାକୁ ଯାଉଛି। ଏହି ଦ୍ୱିଶତାବ୍ଦୀ ଅବସରରେ ସମ୍ବଲପୁର, ଭୁବନେଶ୍ୱର ଓ ନୂଆଦିଲ୍ଲୀରେ ବର୍ଷବ୍ୟାପୀ ଜାତୀୟ ସ୍ତରର ସେମିନାର, ପ୍ରଦର୍ଶନୀ, ସ୍ମାରକୀ ପ୍ରକାଶନ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ପାଇଁ ସେ ଦାବି କରିଛନ୍ତି। ଏହା ସହ ଦେବ୍ରୀଗଡ଼ ରଣକ୍ଷେତ୍ରର ସଂରକ୍ଷଣ ଓ ପ୍ରଚାର ପାଇଁ ବିଶେଷ ପଦକ୍ଷେପ ନେବାକୁ ସେ ପ୍ରସ୍ତାବ ଦେଇଛନ୍ତି। ଦେବ୍ରୀଗଡ଼ରେ ଏକ ଅତ୍ୟାଧୁନିକ ଡିଜିଟାଲ୍ ସଂଗ୍ରହାଳୟ, ଲାଇଟ୍ ଏଣ୍ଡ ସାଉଣ୍ଡ ଶୋ’ ଏବଂ ପ୍ରବେଶ ପଥରେ ଏକ ବିଶାଳ ବିଜୟ ସ୍ତମ୍ଭ ନିର୍ମାଣ କରିବା ପାଇଁ ସେ ଅନୁରୋଧ କରିଛନ୍ତି। ଦେବ୍ରୀଗଡ଼ ଓ ବାରପାହାଡ଼କୁ ‘ଐତିହାସିକ ପର୍ଯ୍ୟଟନ ସର୍କିଟ୍’ ଭାବେ ଘୋଷଣା କରି ପର୍ଯ୍ୟଟନ ସୁବିଧା ବୃଦ୍ଧି କରାଯାଉ ବୋଲି ସେ କହିଛନ୍ତି।ସେହିପରି, ସୋସିଆଲ ମିଡ଼ିଆ ମାଧ୍ୟମରେ “ସଶସ୍ତ୍ର ସଂଗ୍ରାମର ଅଲିଭା ଶିଖା: ବୀର ସୁରେନ୍ଦ୍ର ସାଏ”, “୧୮୨୭ ରୁ ୨୦୨୭: ବୀରତ୍ୱର ୨୦୦ ବର୍ଷ” ପରି ସ୍ଲୋଗାନ୍‌ ଚାଲୁ କରିବାକୁ ସେ ପ୍ରସ୍ତାବ ରଖିଛନ୍ତି। ଏହା ସହ ଏକ ସ୍ମାରକୀ ଡାକ ଟିକଟ, ବୃତ୍ତଚିତ୍ର ପ୍ରସ୍ତୁତି ଓ ଏକ ଦୂରଗାମୀ ଟ୍ରେନକୁ “ବୀର ସୁରେନ୍ଦ୍ର ସାଏ ଏକ୍ସପ୍ରେସ” ନାମକରଣ କରିବା ପାଇଁ ମଧ୍ୟ ଦାବି କରିଛନ୍ତି।ବରଗଡ଼ ସଂସଦୀୟ କ୍ଷେତ୍ରର ପ୍ରତିନିଧି ଭାବରେ ଏହି ଗୌରବମୟ ଇତିହାସକୁ ଜାତୀୟ ମଞ୍ଚରେ ଉତ୍ତୋଳନ କରିବା ପାଇଁ ସାଂସଦଙ୍କ ଏହି ପଦକ୍ଷେପକୁ ବିଭିନ୍ନ ମହଳରୁ ପ୍ରଶଂସା ମିଳୁଛି।