24-Mar-2026

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ)
ସାମାଜିକ ଗଣମାଧ୍ୟମରେ ବ୍ୟକ୍ତିଗତ ଆକ୍ଷେପ ତଥା ମିଥ୍ୟା ଖବର ପୋଷ୍ଟ କରି ଅପପ୍ରଚାର କରୁଥିବା ଅଭିଯୋଗ ନେଇ ସୋନପୁର ଜିଲ୍ଲା ରାମପୁର ଥାନାରେ ସ୍ଥାନୀୟ ଯୁବ ସମାଜସେବୀ ଉମେଶ ପୂଜାରୀ ଗତ ୧୯ ତାରିଖ ଅଭିଯୋଗ କରିଥିଲେ । ଶ୍ରୀ ପୂଜାରୀ ଙ୍କ ଅଭିଯୋଗ ଅନୁଯାୟୀ ତାଙ୍କ ନାମରେ ଗତ କିଛିଦିନ ହେଲା ପ୍ରଦ୍ୟୁମ୍ନ କୁମାର ପାଢ଼ୀ ନାମକ ଜଣେ ଯୁବକ ମିଥ୍ୟା ତଥା ଆପତ୍ତିଜନକ ବ୍ୟକ୍ତିଗତ ଆକ୍ଷେପ ଖବର ସାମଜିକ ଗଣମାଧ୍ୟମରେ ପୋଷ୍ଟ କରୁଥିବା ନେଇ ଶ୍ରୀ ପୂଜାରୀ ଥାନାର ଦ୍ୱାରସ୍ଥ ହୋଇଥିବା ବେଳେ ଆଉ ଜଣେ ସ୍ଥାନୀୟ ଯୁବକ ବିକି ମୁଖୀ ମଧ୍ୟ ଜାତିଆଣ ଆକ୍ଷେପ କରିଥିବା ନେଇ ଅଭିଯୋଗ କରିଥିଲେ । ସାମାଜିକ ଗଣମାଧ୍ୟମରେ ମିଥ୍ୟା ଅପପ୍ରଚାର କରି ମୋର ସାମାଜିକ ଛବିକୁ କଦର୍ଯ୍ୟ କରିବା ଓ ହୀନ ରାଜନୀତି ପାଇଁ ମୋତେ ଜାଣିଶୁଣି ବଦନାମ କରିବାର ଚକ୍ରାନ୍ତ କରୁଛନ୍ତି ବୋଲି ଶ୍ରୀ ପୂଜାରୀ ସୂଚନା ଦେଇଛନ୍ତି । ସେ  ରାମପୁର ହାଇସ୍କୁଲ ଖେଳ ପଡ଼ିଆ ନିକଟରେ ହଠାତ ଶ୍ରୀ ପାଢ଼ୀଙ୍କ ସହ ଦେଖା ହେବା ପରେ ଶ୍ରୀ ପୂଜାରୀ ମିଥ୍ୟା ପୋଷ୍ଟ କାହିଁକି କରୁଛୁ ବୋଲି ପଚାରିବାରୁ ୫୦ ହଜାର ଟଙ୍କା ଦେଲେ ପୋଷ୍ଟ ଡିଲିଟ କରିବି ବୋଲି ଧମକ ଦେବା ସହ ଉଭୟଙ୍କ ମଧ୍ୟରେ ବଚସା ହୋଇଥିବା ଅଭିଯୋଗରେ ଉଲ୍ଲେଖ ହୋଇଥିଲା ବେଳେ ପ୍ରଦ୍ୟୁମ୍ନ ପିସ୍ତଲ ଦେଖାଇ ମାରିଦେବାକୁ ଧମକ ଦେଇଥିବା ଶ୍ରୀ ପୂଜାରୀ ଦର୍ଶାଇଛନ୍ତି । ଘଟଣା ପରେ ଶ୍ରୀ ପୂଜାରୀଙ୍କ ସମର୍ଥକ, ସ୍ଥାନୀୟ ସମାଜସେବୀ, ବୁଦ୍ଧିଜୀବୀ, ଆଇନଜୀବୀ, ଯୁବଗୋଷ୍ଠୀ ଥାନାରେ ଏଫଆଇଆର ଦେବା ସହ କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲେ । ସେମାନେ କହିବା କଥା ଯେ ଶ୍ରୀ ପୂଜାରୀ ଜଣେ ସମାଜସେବୀ ତଥା ସ୍ଥାନୀୟ ଚାଷୀ ମାନଙ୍କ ସୁଖ ଦୁଃଖ ର ସାଥୀ ଅଟନ୍ତି । ଅଭିଯୋଗ ପାଇବା ପରେ ରାମପୁର ପୋଲିସ ମାମଲା ରୁଜୁ କରିବା ସହ ୨୦ ତାରିଖ ଶୁକ୍ରବାର ଦିନ ପ୍ରଦ୍ୟୁମ୍ନଙ୍କୁ ତାଙ୍କ ଘରୁ ଗିରଫ କରିଥିଲା । ତେବେ ନବ ନିର୍ମାଣ କୃଷକ ସଙ୍ଗଠନ ଏହି ଗିରଫଦାରୀକୁ ବେଆଇନ ଦର୍ଶାଇଛି । ଏପରିକି ପ୍ରଦ୍ୟୁମ୍ନ ସେଦିନ ସୋନପୁରରେ ଥିବା ସିସି ଟିଭି ଫୁଟେଜ ଥିବା କୃଷକ ସଂଗଠନ ଦାବୀ କରିଛି । ତେଣୁ ମାମଲାର ନିରପେକ୍ଷ ତଦନ୍ତ ପାଇଁ କୃଷକ ସଙ୍ଗଠନ ଦାବି କରିବା ସହ ସୋମବାର ଏସ୍‌ପିଙ୍କ ଅଫିସକୁ ଘେରାଉ କରିଥିଲା । ସଙ୍ଗଠନର ରାଜ୍ୟ ଉପ ସଭାନେତ୍ରୀ ସୋନାଲି ବିଶିଙ୍କ ନେତୃତ୍ବରେ ଏହି ଆନ୍ଦୋଳନ କରାଯାଇଥିଲା। ଏସପି ଶ୍ରୀ ନାରାୟଣ ନାୟକ କହିଛନ୍ତି ଶ୍ରୀ ପାଢ଼ୀ ଙ୍କ ନାମରେ ସମୁଦାୟ ୫ ଗୋଟି କେସ ଥିବା ଜଣାପଡିଛି ଏବଂ ଆଇନ ରୁ ଉର୍ଦ୍ଧ୍ବରେ କୌଣସି ବ୍ୟକ୍ତିତ୍ଵ ନୁହନ୍ତି ଆଇନ ତା ବାଟରେ ଯିବ । ସେପଟେ ଶ୍ରୀ ପୂଜାରୀ ଙ୍କ ସମର୍ଥକ ପୋଲିସ ଉପରେ ସମ୍ପୂର୍ଣ୍ଣ ଭରଷା ଥିବା କହିଛନ୍ତି ।