21-Mar-2026

ନୂଆପଡ଼ା (ରାମନାଥ ପଣ୍ଡା )
 ନୂଆପଡ଼ା ଜିଲ୍ଲା ବୋଡ଼େନ ବ୍ଲକ ସୁନାମୁଦି ଗ୍ରାମଠାରେ ବାଙ୍ଗାଲୋରସ୍ଥିତ ଆଜିମ୍ ପ୍ରେମଜୀ ଫାଉଣ୍ଡେସନ୍‌ର ସହାୟତାରେ ପରିଚାଳିତ ଆଦିବାସୀ ପ୍ରକଳ୍ପ ଏବଂ ଖଡ଼ିଆଳସ୍ଥିତ 'ୟାର' (YAR) ଅନୁଷ୍ଠାନର ମିଳିତ ଆନୁକୁଲ୍ୟରେ ଏକ ପଡ଼ା ସ୍ତରୀୟ "ଗରମ ପୃଷ୍ଟିକର ଖାଦ୍ୟ" ସଚେତନତା କାର୍ଯ୍ୟକ୍ରମ ସଫଳତାର ସହ ସମ୍ପନ୍ନ ହୋଇଯାଇଛି ।
ଏହି କାର୍ଯ୍ୟକ୍ରମରେ 'ୟାର' ଅନୁଷ୍ଠାନର ସଭାପତି ମହେନ୍ଦ୍ର କୁମାର ଯୋଶୀ ମୁଖ୍ୟ ପରାମର୍ଶଦାତା ଭାବେ ଯୋଗଦେଇ ଆଦିବାସୀ ଅଞ୍ଚଳରେ ଶିଶୁ ଓ ମାଆ ମାନଙ୍କ ସ୍ୱାସ୍ଥ୍ୟ ସୁଧାର ତଥା କୁପୋଷଣ ଦୂରୀକରଣ ଉପରେ ଗୁରୁତ୍ୱାରୋପ କରିଥିଲେ।ଆକାଂକ୍ଷି ବ୍ଲକ ସହଯୋଗୀ ରାକେଶ କୁମାର ଷଡଙ୍ଗୀ,ପ୍ରଶିକ୍ଷିକା ଭାବେ ମହିଳା ସୁପରଭାଇଜର ବୈଦେହୀ ମାଝି ଯୋଗଦେଇ ଅଙ୍ଗନବାଡ଼ି କେନ୍ଦ୍ରରେ ପ୍ରଦାନ କରାଯାଉଥିବା ରନ୍ଧା ଖାଦ୍ୟର ଗୁଣବତ୍ତା ଓ ଏହାର ନିୟମିତ ସେବନର ଉପକାରିତା ସମ୍ପର୍କରେ ଉପସ୍ଥିତ ମା’ମାନଙ୍କୁ ପ୍ରଶିକ୍ଷଣ ପ୍ରଦାନ କରିଥିଲେ ।
ଅନ୍ୟମାନଙ୍କ ମଧ୍ୟରେ ସ୍ଥାନୀୟ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର ସ୍ୱାସ୍ଥ୍ୟ ବିଶେଷଜ୍ଞ  ଅଙ୍କିତ ଦାସ ଏବଂ  ରାକେଶ କୁମାର ନାୟକ ଯୋଗଦେଇ ଶିଶୁମାନଙ୍କ ନିୟମିତ ସ୍ୱାସ୍ଥ୍ୟ ପରୀକ୍ଷା, ଓଜନ ବୃଦ୍ଧି ଓ ପରିଷ୍କାର ପରିଚ୍ଛନ୍ନତା ଉପରେ ପରାମର୍ଶ ଦେଇଥିଲେ । ସେହିପରି ଆୟୁଷ ମେଡିକାଲ ଅଫିସର ପ୍ରାକୃତିକ ଖାଦ୍ୟ ମାଧ୍ୟମରେ ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବା ପାଇଁ ଗୁରୁମନ୍ତ୍ର ଦେଇଥିଲେ ।
ସମ୍ପୂର୍ଣ୍ଣ କାର୍ଯ୍ୟକ୍ରମକୁ 'ୟାର' ଅନୁଷ୍ଠାନର କର୍ମକର୍ତ୍ତା ଖୁସିରାମ ଭୋଇ, ପ୍ରବୀଣ ପଟେଲ ଏବଂ  ଋଷି ରାମ ମାଝୀ ସୁଚାରୁରୂପେ ପରିଚାଳନା କରିଥିଲେ। ଏହି ଅଭିଯାନରେ ସୁନାମୁଦି ଗ୍ରାମର ବହୁ ସଂଖ୍ୟକ ମହିଳା ଓ ଅଭିଭାବକ ସାମିଲ ହୋଇ ଶିଶୁଙ୍କୁ ପୃଷ୍ଟିକର ଖାଦ୍ୟ ପ୍ରଦାନ ପାଇଁ ସାମୂହିକ ଶପଥ ନେଇଥିଲେ । ପରିଶେଷରେ  ଖୁସିରାମ ଭୋଇ ଉପସ୍ଥିତ ସମସ୍ତ ଅତିଥି ଓ ଗ୍ରାମବାସୀଙ୍କୁ ଧନ୍ୟବାଦ ଅର୍ପଣ କରିଥିଲେ ।