26-Feb-2026

ବିନିକା(ହିମାଂଶୁ ଶେଖର ପୁଟେଲ) ବିନିକା ବ୍ଲକ ଅଧିନସ୍ତ ଚରଦା ପଞ୍ଚାୟତ ଫୁଲମୁଠୀ ଗ୍ରାମରେ ନବ ନିର୍ମିତ ମାଁ ମାହେଶ୍ୱରୀ ଦେବୀଙ୍କ ମନ୍ଦିର ପ୍ରତିଷ୍ଠା ଉତ୍ସବ ବିପୁଳ ଉତ୍ସାହ ଉଦ୍ଦୀପନା ମଧ୍ୟରେ ଗୁରୁବାର ସମ୍ପନ୍ନ ହୋଇଯାଇଛି l ଦେବୀଙ୍କ ଦର୍ଶନ ପାଇଁ ଆଜି ୨୦ହଜାରରୁ ଉର୍ଦ୍ଧ୍ବ ଶ୍ରଦ୍ଧାଳୁ ଭକ୍ତଙ୍କ ସମାଗମ ହୋଇଥିଲା।ରୀତିନୀତି ଅନୁଯାୟୀ ସକାଳେ ପୀଠରେ ଷୋଡ଼ଶ ଖମ୍ବ ପୂଜା,ତୋରଣ ପୂଜା,ମାହେଶ୍ୱରୀ ଦେବୀଙ୍କ ୧୦୮ ଉପଚାର ପୂଜା, ସହ ହୋମ ଆହୁତି କରାଯାଇଥିଲା l ଦିନ ୧୧ଘଣ୍ଟା ୨୪ମିନିଟରୁ ୧୧ଟା ୩୭ ମଧ୍ୟେ ଧ୍ଵଜା ଓ କଳସ ଶିଖରେ ସ୍ଥାପନ ସହ ଜୁପ ମହାରାଜଙ୍କ ଐସାନ୍ୟ ସ୍ଥାପନ ଓ ପୂଜା,ପୀଠ ପୂଜା, ବ୍ରହ୍ମଶିଳା,କୁର୍ମଶିଳା ସ୍ଥାପନ କରାଯାଇଥିଲା l ପରେ ପରେ ମାହେଶ୍ୱରୀ ଦେବୀଙ୍କୁ ରତ୍ନ ସିଂହାସନରେ ବିଜେ ପୁଷ୍ପାଞ୍ଜଳି ସହ ପୂର୍ଣ୍ଣାହୂତି ହୋଇଥିଲା l ଏଥିରେ ମୁଖ୍ୟ ଆଚାର୍ଯ୍ୟ ଭାବେ ବାସୁଦେବ ହୋତା,ସହଯୋଗୀ ପୂଜକ ଭାବେ ଅଭିନାସ ମିଶ୍ର, ଦାମୋଦର ନନ୍ଦ,ଦେବାନନ୍ଦ ହୋତା,ବିଷ୍ଣୁ ପଣ୍ଡା,ମୋହନ ଦେହେରୀ ଓ ମୁଖ୍ୟ କର୍ତ୍ତା ଭାବେ ବନ ବିହାରୀ ମହାକୁର ଓ ତାଙ୍କ ଧର୍ମପତ୍ନୀ ମାଳତୀ ମହାକୁର, ନାମଯଜ୍ଞ କର୍ତ୍ତା ଭାବେ ରାଖାଲ ବରିହା ଓ ତାଙ୍କ ଧର୍ମପତ୍ନୀ ସସ୍ମିତା ବରିହା ଦାୟିତ୍ଵ ତୁଲାଇଥିଲେ l ଏହି ଅବସରରେ ବକ୍ତା ବିନୋଦ ସାହୁ (ଭଗବତ ବାବା)ଙ୍କ ଦ୍ଵାରା  ପ୍ରବଚନ କାର୍ଯ୍ୟକ୍ରମ ସହ ମଧ୍ୟାହ୍ନରେ ୨୪ ପ୍ରହର ନାମ ଯଜ୍ଞ ପୂର୍ଣ୍ଣାହୂତି ହୋଇଥିଲା l ପରେ ଅପରାହ୍ନରେ ପୂଟୁରୁପାଲି ଗାୟିକା ଦଶମୀ ଭୋଇ ଓ ଭଟଗାଁ ସୁନୀତା ପୁଟେଲଙ୍କ ମଧ୍ୟରେ ବୈଠକୀ କିର୍ତ୍ତନ୍ୟ ଅନୁଷ୍ଠିତ ହୋଇଥିଲା l ହଜାର ହଜାର ଶ୍ରଦ୍ଧାଳୁ ଭକ୍ତମାନେ   ମା ମାହେଶ୍ୱରୀ ଦେବୀଙ୍କ ଦର୍ଶନ କରିବା ସହ ସାଂସ୍କୃତିକ କାର୍ଯ୍ୟକ୍ରମ ଉପଭୋଗ କରିଥିଲେ ।ସେହିପରି ନୂତନ ମନ୍ଦିର ନିର୍ମାଣରେ ପ୍ରମୁଖ ଭୂମିକା ନିଭାଇ ଅନୁଦାନ ଦେଇଥିବା ପୂର୍ବତନ ବିଧାୟକ ପଦ୍ମନାଭ ବେହେରା ମନ୍ଦିର ପ୍ରତିଷ୍ଠା ଉତ୍ସବରେ ଆସି ମାଁ ଇଷ୍ଟଦେବୀଙ୍କୁ ଦର୍ଶନ କରିଥିଲେ ।ଗ୍ରାମବାସୀଙ୍କ ପ୍ରିୟ ବିଧାୟକଙ୍କୁ ଉତ୍ସର୍ସିତ ସମ୍ବର୍ଦ୍ଧନା ଦିଆଯାଇଥିଲା ।ଦୀର୍ଘ ଏକ ସପ୍ତାହ ଧରି ଚାଲିଥିବା ଏହି ଆଧ୍ୟାତ୍ମିକ ତଥା ଭକ୍ତିମୟ କାର୍ଯ୍ୟକ୍ରମ ପରିଚାଳନାରେ  ଫୁଲମୁଠୀ ଗ୍ରାମବାସୀଙ୍କ ସମେତ ଆଖ ପାଖ ଗ୍ରାମର ଲୋକେ ମଧ୍ୟ ବହୁ ମାତ୍ରାରେ ସାମିଲ ହୋଇ ସହଯୋଗ କରିଥିଲେ l