06-Feb-2026

ଲାଙ୍ଗୀର: ଲୋଇସିଂହା ବ୍ଳକ ରେଙ୍ଗାଲି ଠାରେ ଭାରତୀୟ କୃତ୍ରିମ ଅଙ୍ଗ ନିର୍ମାଣ ନିଗମ (ALIMCO) ସହାୟତାରେ ସାମାଜିକ ଅନୁଷ୍ଠାନ ଦିଶା ଏବଂ ରେଙ୍ଗାଲି ଗ୍ରାମବାସୀଙ୍କ ଦ୍ବାରା ଅଧିକାର ଓ ସ୍ବାଭିମାନ ମେଳା ଅନୁଷ୍ଠିତ ହୋଇଥିଲା। ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ଏବଂ ଦିବ୍ୟାଙ୍ଗଜନ ସଶକ୍ତିକରଣ  ମନ୍ତ୍ରଣାଳୟ, ଭାରତ ସରକାର ଙ୍କ କାର୍ଯ୍ୟକ୍ରମରେ ବରିଷ୍ଠ ନାଗରିକ ଏବଂ ଦିଵ୍ୟାଙ୍ଗଜନ ଙ୍କୁ ବିଭିନ୍ନ ସହାୟତା ଉପକରଣ ବିତରଣ କରାଯାଇଥିଲା। କାର୍ଯ୍ୟକ୍ରମରେ ଆଖପାଖ ଗ୍ରାମର ୭୫ ଜଣ ମହିଳା ଓ ୬୧ ଜଣ ପୁରୁଷ ଯୋଗଦାନ କରି ବିଭିନ୍ନ ଉପକରଣ ନେଇଥିଲେ। ଏ ଅବସରରେ ଆୟୋଜିତ ସଭାରେ ଶ୍ରୀ ହୃଷୀକେଶ ସାହୁ ଅଧିକାର ଓ ସ୍ବାଭିମାନ ମେଳାର ଲକ୍ଷ୍ୟ ଉଦେଶ୍ୟ ଏବଂ ଯୋଜନାର ରୂପରେଖ ସମ୍ପର୍କରେ ସୂଚନା ଦେଇଥିଲେ। ଯନ୍ତ୍ରଣାମୁକ୍ତ ଓଡ଼ିଶା ଗଠନ    ଏବଂ ବରିଷ୍ଠ ନାଗରିକ ତଥା ଦିବ୍ୟାଙ୍ଗ ଜନଙ୍କ ଦୈନନ୍ଦିନ ଜୀବନକୁ ଅପେକ୍ଷାକୃତ ସହଜ, ସରସ କରିବା ପାଇଁ ରେଙ୍ଗାଲି ଗ୍ରାମବାସୀଙ୍କ ଉଦ୍ୟମକୁ ସମସ୍ତେ ପ୍ରଶଂସା କରିଥିଲେ। ସୂଚାଇ ଦିଆଯାଏ ଯେ, କିଛି ଦିନ ପୂର୍ବରୁ ଏକ ବୃହତ୍ ଚିକିତ୍ସା ଶିବିର ଆୟୋଜିତ ହୋଇଥିଲା। ସୂଚନା, ଯୋଗାଯୋଗ ଇତ୍ୟାଦି କାରଣରୁ ସରକାରଙ୍କ ଜନ କଲ୍ୟାଣ ମୂଳକ ଯୋଜନା ଗୁଡିକ ସମସ୍ତ ଲୋକଙ୍କ ପାଖରେ ଅନେକ ସମୟରେ ପହଞ୍ଚି ନ ଥାଏ। ରେଙ୍ଗାଲି ଗ୍ରାମର ସ୍ବେଚ୍ଛାସେବୀ ମାନେ ବିଭିନ୍ନ ସରକାରୀ ବିଭାଗ ଓ ଲୋକଙ୍କ ମଧ୍ୟରେ ସମନ୍ୱୟ ରକ୍ଷା କରି ଅବସର ସମୟକୁ ମାନବସେବାରେ ବିନିଯୋଗ କରିବା ପାଇଁ ଅଣ୍ଟା ଭିଡ଼ିଛନ୍ତି। କେବଳ ସରକାରଙ୍କ ଅନୁଦାନ ଉପରେ ନିର୍ଭର ନ କରି ଗ୍ରାମକୁ ସଂଯୋଗ କରୁଥିବା ରାସ୍ତାର ଉଭୟ ପାର୍ଶ୍ବରେ

ବୃକ୍ଷରୋପଣ ସହ ନିରନ୍ତର ଗଛର ଯତ୍ନ ନେଉଛନ୍ତି। ସେହିପରି ଶିକ୍ଷା ମାନ ବୃଦ୍ଧି ପାଇଁ ହାଇସ୍କୁଲରେ ଘରୋଇ ଶିକ୍ଷକ ବ୍ୟବସ୍ଥା ସହ ନୂଆଖାଇ ଭେଟଘାଟ ଭଳି କାର୍ଯ୍ୟକ୍ରମରେ ପ୍ରତିବର୍ଷ ଛାତ୍ରଛାତ୍ରୀ ଏବଂ କୃତି ଛାତ୍ରଛାତ୍ରୀମାନଙ୍କ ଅଭିଭାବକଙ୍କୁ ସମ୍ମାନିତ ଭଳି ନିଆରା ପଦକ୍ଷେପ ନେଉଛନ୍ତି। ନିଜସ୍ବ ପ୍ରଚାର ପ୍ରସାର ଠାରୁ ଦୂରରେ ରହି ଗଠନମୂଳକ କାର୍ଯ୍ୟକ୍ରମ ପାଇଁ ରେଙ୍ଗାଲି ଗ୍ରାମ ଅନ୍ୟ ଠାରୁ ଭିନ୍ନ ଏବଂ ଅନୁକରଣୀୟ ବୋଲି ମତ ପ୍ରକାଶ ପାଇଛି। ଆଜିର ଏହି କାର୍ଯ୍ୟକ୍ରମ ରେ ଏଲିମକୋ ତରଫରୁ ଡ ଧରିତ୍ରୀ ଗଡତ୍ୟା, ସୁରେନ୍ଦ୍ର ଭୋଇ, ସୌମ୍ୟ ରଂଜନ ପ୍ରମୁଖ ଯୋଗଦାନ କରି ବିଭିନ୍ନ ଉପକରଣର ବ୍ୟବହାର ବିଷୟରେ ତାଲିମ ପ୍ରଦାନ କରିଥିଲେ।

❌