18-Jan-2026

ବୌଦ୍ଧ/ପଳସାଗୋରା/କଣ୍ଟାମାଳ(ପ୍ରେରଣା ଖବର): ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ପଳସାଗୋରା ମକର ମହୋତ୍ସବ   ଅବସରରେ ପଳସାଗୋରା କଲ୍ୟାଣ ମଣ୍ଡପ ଠାରେ ବୌଦ୍ଧ ଜିଲ୍ଲା କୃଷକ ଉତ୍ପାଦକ ସଂଗଠନ ଫେଡେରେସନର ଆୟୋଜନ କ୍ରମେ ଓ ପଳସାଗୋରା ମକର ମହୋତ୍ସବ କମିଟି ସହାୟତାରେ ଏକ ବିଶାଳ କୃଷକ ସମାବେଶ ଅନୁଷ୍ଠିତ ହୋଇଯାଇଛି l ଫେଡେରେସନ ସଭାପତି ରାଜକିଶୋର ଅଗ୍ରୱାଲ ଙ୍କ ସଭାପତିତ୍ୱରେ ଓ ସମ୍ପାଦକ କୃତ୍ତିବାସ ପଲିଆଙ୍କ ସଂଯୋଜନାରେ ମୁଖ୍ୟ ଅତିଥି ଭାବେ ବୌଦ୍ଧ ଜିଲ୍ଲା ପରିଷଦ ଉପାଧ୍ୟାକ୍ଷ ଶଙ୍କର୍ଷଣ  ପ୍ରଧାନ ଯୋଗ ଦେଇ ବୌଦ୍ଧ ଜିଲ୍ଲାର ଚାଷୀ ଓ ଚାଷର  ସାମଗ୍ରିକ ବିକାଶ ନିମନ୍ତେ ଦୃଢ ପ୍ରତିଶୃତି ଦେଇଥିଲେ l 

ମୁଖ୍ୟ ବକ୍ତା ଭାବେ ସହକାର ଭାରତୀ ଓଡିଶା ପ୍ରାନ୍ତ ସମ୍ପାଦକ ସୋନାଶିଷ ଜେନା,ସଂମ୍ମାନିତ ଅତିଥି ଭାବେ ଡ଼ିଡ଼ିଏମ ନାବାର୍ଡ ଡ଼ ସତ୍ୟ ସ୍ୱରୂପ ବିଦାନ୍ତ, ବୌଦ୍ଧ କୃଷି ବିଜ୍ଞାନ କେନ୍ଦ୍ର ମୁଖ୍ୟ ଓ ବରିଷ୍ଠ ବୈଜ୍ଞାନିକ ଡ. ତପନ କୁମାର ଦାସ, ସହକାର ଭାରତୀ ବୌଦ୍ଧ ଜିଲ୍ଲା ସଭାପତି ଶ୍ରୀକାନ୍ତ କୁମାର ମିଶ୍ର, ବରିଷ୍ଠ କୃଷକ ରମଣୀ ରଞ୍ଜନ ପ୍ରଧାନ,କୃଷକ ନେତା ବିଶିକେଶନ ପ୍ରଧାନ, ସହକାରୀ ପ୍ରାଣୀ ଚିକିତ୍ସକ ଡା ଯତୀନ କୁମାର ସାହୁ, ପଳସାଗୋରା ସରପଞ୍ଚ ସୌଦାମିନୀ ମଲ୍ଲିକ, ମାତୃଶକ୍ତି ଏଫପିଓ ର ମାର୍ଗଦର୍ଶକ ପୁର୍ଣଚନ୍ଦ୍ର ଖଟୁଆ ପ୍ରମୁଖ ମଞ୍ଚାସିନ ଥାଇ ଉପସ୍ଥିତ କୃଷକ ମାନଙ୍କୁ ଉଦବୋଧନ ଦେଇଥିଲେ l ଏହି ଅବସରରେ 11 ଜଣ ସଫଳ ଚାଷୀଙ୍କୁ ସମର୍ଦ୍ଧିତ କରାଯାଇଥିଲା l ଉକ୍ତ କାର୍ଯ୍ୟକ୍ରମକୁ ସଫଳ କରିବା ପାଇଁ ଫେଡେରେସନର ସକ୍ରିୟ କାର୍ଯ୍ୟକର୍ତ୍ତା ପ୍ରବୀର ମହାର,ସନ୍ତୋଷ କୁମାର ମହାକୁଡ଼, ଗିରିଶ ଚନ୍ଦ୍ର ବଘାର, ଜଗନ୍ନାଥ ବାରିକ, ଆଦିତ୍ୟ ପ୍ରଧାନ, ମହୋତ୍ସବ କମିଟି ସଭାପତି ରବୀନ୍ଦ୍ର କୁମାର ପ୍ରଧାନ ଓ ମକର ମହୋତ୍ସବ କମିଟିର ସମସ୍ତ କର୍ମକର୍ତ୍ତା

ସହଯୋଗ କରିଥିଲେ l ଏହି ଅବସରରେ ବିଭିନ୍ନ ଦାବିକୁ ବୌଦ୍ଧ ଜିଲ୍ଲା ପ୍ରଶାସନ ମାଧ୍ୟମରେ ବିଭିନ୍ନ ଦାଵୀକୁ ପୂରଣ ନିମନ୍ତେ ଅନୁରୋଧ କରାଯାଇଥିଲା l
ଦାବୀ ସମୂହ ମଧ୍ୟରେ ବୌଦ୍ଧ ଜିଲ୍ଲା ଏକ ଶିଳ୍ପ ବିହୀନ ଓ ଅବହେଳିତ ହୋଇଥିବାରୁ ଏଠାରେ 80% ଲୋକ କୃଷି ଉପରେ ନିର୍ଭର କରନ୍ତି l ଏହି ଜିଲ୍ଲାରେ ମହାନଦୀ, ଖଡ଼ଙ୍ଗ, ବାଘ, ତେଲ,ସାଲୁଙ୍କି, ଲକ୍ଷ୍ମୀନାଳ, ଶଗଡିଆ ନାଳ ଥାଇ ମଧ୍ୟ ବର୍ଷା ଅଭାବ ହେଲେ ମରୁଡି ହୋଇଥାଏ lଏଣୁ ଚାଷୀକୁଳର ଉନ୍ନତି ପାଇଁ ହେଲେ ସର୍ବପ୍ରଥମେ ଜଳସେଚନର ଆବଶ୍ୟକତା ରହିଛି ଓ ଫେଡେରେସନ ଦାବିକୁ ପ୍ରାଥମିକତା ସହିତ ଗୁରୁତ୍ୱ ଦେଇ ବୌଦ୍ଧ ଜିଲ୍ଲାରେ ପ୍ରବାହିତ  ନଦୀ ଓ ନାଳ ମାନଙ୍କରେ ଡ୍ୟାମ ନିର୍ମାଣ କରିବା ସହିତ ଚାଷୀର ଅର୍ଥନୌତିକ ଅଭିବୃଦ୍ଧି  ପାଇଁ ବିଭିନ୍ନ ଦାବୀ ଗୁଟିକ ଆନ୍ତରିକତା ସହିତ ପୂରଣ କରିବାକୁ ସବିନୟ ଅନୁରୋଧ କରିଛନ୍ତି l