03-Feb-2021

ମୁମ୍ବାଇ (ପ୍ରେରଣା ଖବର ବ୍ୟୁରୋ) : ଅଷ୍ଟ୍ରେଲିଆ କ୍ରିକେଟ୍‌ ଟିମ୍‌ର ଆଗାମୀ ଦକ୍ଷିଣ ଆଫ୍ରିକା ଗସ୍ତ ବାତିଲ । କରୋନା ସଂକ୍ରମଣକୁ ଦୃଷ୍ଟିରେ ରଖି ଏହି ଗସ୍ତକୁ ବାତିଲ କରାଯାଇଛି । ଦକ୍ଷିଣ ଆଫ୍ରିକାରେ ବର୍ତ୍ତିମାନ କରୋନା ସଂକ୍ରମଣ ୨ୟ ଲହରୀ ବ୍ୟାପିଛି । ଯାହାକି ଏକ ଚିନ୍ତାଜନକ ବିଷୟ ରହିଛି । ତେବେ ଦକ୍ଷିଣ ଆଫ୍ରିକାର କରୋନା ପରିସ୍ଥିତିକୁ ଦେଖି ଅଷ୍ଟ୍ରେଲିଆ ସରକାର ନିଜ ଦେଶର କ୍ରିକେଟ୍‌ ଟିମ୍‌ର ଗସ୍ତ ଉପରେ ରୋକ ଲଗାଯାଇଛନ୍ତି । ଯାହାଫଳରେ ଦକ୍ଷିଣ ଆଫ୍ରିକା-ଅଷ୍ଟ୍ରେଲିଆ ସିରିଜ୍ ବାତିଲ ହୋଇଛି ।

ତେବେ ଅଷ୍ଟ୍ରେଲିଆ-ଦକ୍ଷିଣ ଆଫ୍ରିକା ସିରିଜ୍‌ ବାତିଲ ହେବା ଫଳରେ ନ୍ୟୁଜିଲାଣ୍ଡ କ୍ରିକେଟ୍‌ ଟିମ୍‌ ଟେଷ୍ଟ ଚାମ୍ପିଆନ୍‌ସିପ୍‌ ଫାଇନାଲରେ ପହଞ୍ଚିବା ନିଶ୍ଚିତ । ପ୍ରଥମ ଟିମ୍‌ ଭାବେ ନ୍ୟୁଜିଲାଣ୍ଡ ଟିମ୍‌ ଫାଇନାଲରେ ସ୍ଥାନ ପାଇବା ପ୍ରାୟତଃ ପକ୍କା ହୋଇଯାଇଛି । ଆଉ କେଉଁ ଟିମ୍ ଫାଇନାଲରେ ପହଞ୍ଚି ତାହା ଭାରତ-ଇଂଲଣ୍ଡ ଟେଷ୍ଟ ସିରିଜ୍‌ ପରେ ସ୍ପଷ୍ଟ ହୋଇଯିବ । ତେବେ ଟେଷ୍ଟ ଚାମ୍ପିଆନ୍‌ସିପ୍‌ ଫାଇନାଲ୍‌ ଦୌଡରୁ ଅଷ୍ଟ୍ରେଲିଆ ଟିମ୍‌ ବାଦ୍‌ ପଡିବା ପରେ ଭାରତୀୟ ଟିମ୍‌ ପାଇଁ ଏକ ସୁଯୋଗ ରହିଛି । ଟିମ୍‌ ଇଣ୍ଡିଆକୁ ଫାଇନାଲରେ ନିଜ ସ୍ଥାନ ପକ୍କା କରିବାକୁ ହେଲେ ଆଗାମୀ ଇଂଲଣ୍ଡ ସିରିଜରେ ଉଚ୍ଚ ପ୍ରଦର୍ଶନ କରିବାକୁ ପଡିବ । ଯଦି ଟିମ୍‌ ଇଣ୍ଡିଆର ଇଂଲଣ୍ଡ ସିରିଜରେ ପରାଜୟ ହେଲେ ହିଁ ଅଷ୍ଟ୍ରେଲିଆ ଫାଇନାଲ ମୁକାବିଲା ଖେଳିପାରେ। ଜୁନ୍‌ ମାସରେ ଇଂଲଣ୍ଡର ଲର୍ଡସ ଗ୍ରାଉଣ୍ଡରେ ଟେଷ୍ଟ ଚାମ୍ପିଆନ୍‌ସିପ୍‌ ଟ୍ରଫିର ଫାଇନାଲ ମୁକାବିଲା ଖେଳାଯିବ।

ତେବେ ଫାଇନାଲ ମ୍ୟାଚ୍‌ରେ ଭାରତ ଖେଳିବାକୁ ହେଲେ କିଛି ଗଣନା ରହିଛି । ତେବେ ଆସନ୍ତୁ ଜାଣିବା କଣ ରହିଛି ଗଣନା…
ଭାରତ-ଇଂଲଣ୍ଡ ମଧ୍ୟରେ ହେବାକୁ ଥିବା ଟେଷ୍ଟ ସିରିଜରେ ଯଦି ଟିମ୍‌ ଇଣ୍ଡିଆ ୨-୦, ୨-୧, ୩-୦, ୩-୧, ୪-୦ରେ ବିଜୟୀ ହୁଏ ତେବେ ଭାରତୀୟ ଦଳ ଫାଇନାଲ ମ୍ୟାଚ୍‌ ଖେଳିବାର ସମ୍ଭାବନା ରହିଛି । ସେହିପରି ଭାରତ ବିପକ୍ଷ ଟେଷ୍ଟ ସିରିଜରେ ଇଂଲଣ୍ଡ ଟିମ୍‌ ୩-୦, ୩-୧, ୪-୦ରେ ସିରିଜ ବିଜୟୀ ହୁଏ । ତେବେ ଇଂଲଣ୍ଡ ଟିମ୍‌ ଟେଷ୍ଟ ଚାମ୍ପିଆନ୍‌ସିପ୍‌ର ଫାଇନାଲ ମୁକାବିଲା ଖେଳିପାରିବ।
ସେପଟେ ଅଷ୍ଟ୍ରେଲିଆ ଦଳ ଫାଇନାଲ ଖେଳିବା ନେଇ କିଛି ଗଣନା ରହିଛି । ଯଦି ଭାରତୀୟ ଟିମ୍‌ ୧-୦ ରେ ବିଜୟୀ ହୁଏ ତେବେ ଅଷ୍ଟ୍ରେଲିଆ ଦଳ ଫାଇନାଲ ମୁକାବିଲା ଖେଳି ପାରିବ। ସେହିପରି ଇଂଲଣ୍ଡ ଟିମ୍‌ ୧-୦, ୨-୦, ୨-୧ରେ ବିଜୟୀ ହୁଏ ତେବେ ମଧ୍ୟ ଅଷ୍ଟ୍ରେଲିଆ ଦଳ ଫାଇନାଲ ମୁକାବିଲା ଖେଳିପାରିବ।
ତେବେ ଆଇସିସି ଟେଷ୍ଟ ଚାମ୍ପିଅନସିପ୍‌ ଫାଇନାଲ ମୁକାବିଲାରେ ନ୍ୟୁଜିଲାଣ୍ଡ ସହ କେଉଁ ଟିମ୍‌ ଖେଳିବ । ସେହି ଟିମ୍‌କୁ ନେଇ ଏବେବି ସସ୍‌ପେନ୍ସ ଲାଗି ରହିଛି । ଆଗାମୀ ଦିନରେ ହେବାକୁ ଥିବା ଭାରତ-ଇଂଲଣ୍ଡ ଟେଷ୍ଟ ସିରିଜର ଫଳାଫଳ ଉପରେ ନିର୍ଭର କରେ , କିଏ ଖେଳିବ ଫାଇନାଲ ?।