12-Jan-2026

(ଡୋଲେଶ୍ୱର ବାଗ)
 ନୂଆପଡ଼ା ଜିଲ୍ଲା ପ୍ରଶାସନ ଦ୍ବାରା ବୋଡ଼େନ ବି ଡି ଓ ସୁଶାନ୍ତ କୁମାର ରଣାଙ୍କ ଅଧ୍ୟକ୍ଷତାରେ ବିଜୁ ପଟ୍ଟନାୟକ ଉଚ୍ଚ ମାଧ୍ୟମିକ ବିଦ୍ୟାଳୟ ବୋଡ଼େନ ଠାରେ ବ୍ଲକ ସ୍ତରୀୟ ବନ୍ଦେ ମାତରମ୍ ପ୍ରଶିକ୍ଷଣ ଶିବିର ଆୟୋଜିତ ହୋଇଥିଲା । ଶିବିରରେ ବ୍ଲକର ବିଭିନ୍ନ ଶିକ୍ଷାନୁଷ୍ଠାନରୁ ଚୟନିତ ଶିକ୍ଷକ-ଶିକ୍ଷୟତ୍ରୀମାନେ ଯୋଗଦେଇଥିଲେ । କଲେଜର ଭାରପ୍ରାପ୍ତ ଅଧ୍ୟକ୍ଷ ସାମୂଆଲ ଦାନି ଉପସ୍ଥିତ ରହି, ବନ୍ଦେ ମାତରମ୍ ସଙ୍ଗୀତର ଇତିହାସ ଉପରେ ଆଲୋକପାତ କରିଥିଲେ । ଏହି ସଙ୍ଗୀତ କିପରି ଦେଶବାସୀଙ୍କ ଉଦ୍ଦେଶ୍ୟରେ ଉତ୍ସର୍ଗୀକୃତ ତାହାରି ଉପରେ ଉପସ୍ଥିତ ସମସ୍ତଙ୍କୁ ବିସ୍ତାରିତ ଭାବରେ ବୁଝାଇଥିଲେ ।ପ୍ରଶିକ୍ଷକ ଭାବରେ ପ୍ରାଧ୍ୟାପକ ଗୟାଧର ମହାନ୍ତି,ଶିକ୍ଷକ ଉମାକାନ୍ତ ବାଗ ଓ ମାଧବ ବାଗ ଯୋଗଦାନ କରି ବନ୍ଦେ ମାତରଂ ସଙ୍ଗୀତ ଗାନ କରିବାର ଶୈଳୀ ସହିତ ଏହାର ବିଶେଷତ୍ୱ ଉପରେ ଅବଗତ କରାଇଥିଲେ । ଏହି ପ୍ରଶିକ୍ଷଣ ଶିବିର ମାଧ୍ୟମରେ ଶିକ୍ଷକ-ଶିକ୍ଷୟତ୍ରୀମାନେ ବନ୍ଦେ ମାତରମ୍ ସଙ୍ଗୀତର ସଠିକ୍ ଗାୟନ ଶୈଳୀ ସହିତ ଏହାର ଦେଶଭକ୍ତି ମୂଲ୍ୟବୋଧକୁ ଅଧିକ ଭାବରେ ଅନୁଭବ କରିପାରିଥିଲେ ।ବ୍ଲକ ପ୍ରଶାସନ ପକ୍ଷରୁ ଜି ପି ଡି ଓ ଭୀଷ୍ମ କୁମାର, ଏ ପି ଓ ରବିନାରାୟଣ ରାଉତ, ଏ ବି ଏଫ୍ ରାକେଶ କୁମାର ଷଡଙ୍ଗୀ, ବି ଏସ ଏସ ଓ କୁମର ମାଝୀ,ବି ପି ସି ହେରାମ୍ବ ବିଶ୍ଵାଳଙ୍କ ସମେତ ଅନ୍ୟ ଅଧିକାରୀ ତଥା କଲେଜର ସମସ୍ତ ଷ୍ଟାଫ ସହଯୋଗ କରିଥିଲେ।